Вторник, декабря 01, 2020
Важное


Аволь умок масторонь келес тешкставсь Автомобилистэнь кенярксчись. Эрьва чистэ минь важодема таркав сыргамсто, общественной транспортс озамсто, берянде апак арсе, эрямонок ванстоманть макстано руль экшсэ ардыцянтень.
Самай сондензэ (водителенть эйстэ) ашти минек зыянтомо килангось, шкастонзо-аволь эрявикс таркас пачкодеманок. Нама, васень таркасо ашти ломаненть шумбрачинзэ ды эрямонзо ванстомась.

Неень шкане ламо кортави килангонь зыянов тевтнень киртямодо, тевест содыця водителень анокстамодо, эдь неть ёнкстнэнень максови васень тарка ломантнень зыянов тевтнеде ванстомасо ды авариятнень аламолгавтомасо.

Течи ловныцятненень пачтятано эрзянь цёрадонть, кие весе эрямонзо алтызе водителень а шожда тевентень. Те – Покш Березникень райононь Шугурова велесэ чачозесь-касозесь, икелень СПАП-№1, ней «Мордовавтотранс» МР-нь ГУП-нь водителесь Иван Николаевич Пивкин.
Водителекс улемань мелесь ульнесь сонзэ эйкакшпингстэ. Нать, а стяко Шугуровань средней школанть прядомадо мейле, 1979 иестэ, Иван Пивкин прядсь ДОСААФ-нь курсат ды мейле сась важодеме тиринь велев. Истя, трудовой пингензэ ушодызе Калинин лемсэ колхозсонть водителень тевстэнть. Теке жо хозяйствасонть пингень перть важодсь тетязояк Николай Иванович. Авазо, Мария Ивановна, чарькодсь строителень тевентень. Маштсь кудонь вачкамо, штукатурямо ды артомо. Виде, аволь эрьва тейтерь-аванть ули ёрокчизэ неть а шожда тевтнень топавтомасо. Семиянь ды кудоютконь ламо тевтнень лангс апак вано, Мария Ивановна чинь-чоп ульнесь стройкасо. Теке марто тейтерь-аванть ульнесь шказо ды сатотсь седейлембезэ колмонест эйкакшост: Иванонь, Валянь, Людмилань туртовгак. Эйкакштнеяк эсь ёндо кода маштсть лездасть тетяст-аваст туртов, бажасть а коламс сынст ёжомарямост.

1981 иестэ, зярдо Иван Пивкинэнь саизь служамо Афганистанов, сон малавиксэнзэ туртов теде эзь пачтя. Армияв туемань пунктсонть сеске чарькодсь, косо сави тензэ топавтомс масторонть икеле долгонзо (сеть ломантнень, кить састь сынст мельга, чамаст ульнесть чипайсэ калязь, чопода-тюжат, Мордовиясо сестэ эштё ловоськак парсте эзь солакшно).
Весемева неявсь: мельгаст састь «лембе» масторсто. Лисни, сыненсткак сави ламо псилгалемс. Истя лисськак, сынст учось «пси точкась».
Кото ковонь перть малавиксэнзэ ловность цёраст пельде седейшкавань сёрматнень, ансяк косо сави кандомс службанть ды мезе сави тензэ неемс-марямс, вейкеяк вал арасель. Пельиень ютазь, Иванонь авазо чарькодсь, косо канды службанзо вейкине цёразо. Шугуровасто те ульнесь васенце ломань, кинь сестэ саизь служамо Афганистанов. Кодамо таркасо ульнесь ды мезе савсь цидярдомс од цёрантень, Иван Пивкинэнь арась мелезэ течи ледстнемс. Вановтонзо коряс, седе паро бу тень стувтомс… Ансяк истямось зярдояк превстэ а нолдави, пингень перть а стувтови. Ине тевдензэ кортыть ламо казнензэ, конатнень ютксо «За боевые заслуги» медалесь ды ламо лият.

Вечкеманзо вастызе тиринь велесэ

Васень маень кенярксчистэнть Иван Пивкин кавто иень перть служамодо мейле Саранскойстэ ардсь Шугурова тиринь велев. Марявсь, мельспарось потмозонзо а кельги. Рейсовой автобуссо ардомсто варштавксозо лоткась эсест велень тейтеренть Анна Кулавскаянь лангс. Сынь виздезь, салава ладсо вансть вейкест-вейкест лангс, ды весемева чарькодевсь, одтнэнь ютксо ули мезе-бути ялгаксчиде седе покш…
Одтнэ вастневсть малав кавто иеть. Анна Кулавская од тейтересь сестэ эрясь ды важодсь Саранскойсэ, Иван Пивкин поладызе тевензэ тиринь велесэ. Колхозсо тевензэ прядомадо мейле бажась лездамс тетянзо-аванзо туртов кудоютконь тевтнень топавтомасо, кавто сазоронзо кастомасо ды тонавтневтемасо. Шкань ютазь, 1985 иестэ, И.Н. Пивкин ды А.В. Кулавская сайсть мель венчамс-урьвакстомс ды туемс эрямо Саранскоев. Истя, Иван Пивкиннэнь сеске муевсь тев сестэ эштё Саранскоень пассажирской васенце номер автотранспортной предприятиясонть (СПАП-1), ней сон лемдеви «Мордовавтотранс» МР-нь ГУП-кс.

Се шкастонть саезь ушодовсть Иван Николаевичень васоло оштнева командировкатне. Ков ансяк эзь ардтне эрьва чинь тевензэ топавтомсто: Московов, Саратовав, Тамбовов, Чебоксаров, Пензав, Самарав ды истя седе тов. Се шкане, зярдо минь, килангов сыргицятне, удотано, сынь жо, водительтне, рейсэв сыргицятне, рана валске сыргить важодема таркав. Васняяк ванкшносызь весе-аволь анок килангов сыргамонтень, улить-арасть техникасонть кодаткак тапавкст, эдь эрьва ильведевксэсь пачтятанзат а витевикс кажос. Ансяк весементь ванкшнозь ды техниканть маштовомачисэнзэ кемевтезь, парсте тевензэ содыця водителесь сырги покш килангов.

Виде, ламо иень перть руль экшсэ улезь, сон истя парсте тонавтнизе техниканть, лиясто мик транспортонть урноманзо коряскак чарькодьсы, мейсэ сонзэ яжавомань тувталось.

Иван Николаевичень важодемань эрьва чизэ ушодови валскень вете чассто. Самай те шкастонть сон сырги васня Покш Березникев, мейле ютасынзе Рузонь Найман, Шугурова, Симкина, Парынзэле, Бозаёв, Ч.Промза велетнень. Эрьва чистэ арды малав 300 вайгельбеть, сизема лангс зярдояк а пеняци.

– Истят ломантне, кода Иван Николаевич Пивкин, – «Мордовавтотранс» МР-нь ГУП-нть каштанчизэ, – мерсь сондензэ те предприятиянь прявтось И.В. Кусайкин. – Сон эрьва тевенть топавтсы шкастонзо ды парсте. Иван Николаевичень кондят важодицятнень вийсэ кирдеви минек предприятиясь. Тензэ эрьва максозь тевенть кисэ седееть а карми ризнэме. Содат, сон тевенть топавтсы истя, кода вешить шкась ды таркась.

Уцяскав важодема таркасо, уцяскав
семиясо.

Иван Николаевич ды Анна Васильевна Пивкинтнэ трясть-кастсть кавто паро эйкакшт. Ольга Ивановна ды Николай Иванович муизь эсест эрямо кист, тейсть семият ды тетяст-аваст туртов казсть колмо нуцькат.
Эрьва юткошкасто сынь бажить самс малавиксэст туртов. Те семиясь эри покш ояксчисэ ды вейке вейкенень лездазь.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».