Якшамковонь 27-це чистэ масторонь келес тешкставить истят ледстневиця тевтне, кода Ине Отечественной войнань шкасто Ленинград ошонть блокаданть эйстэ олякстомтомась, Россиянь воинской славань чись ды Холокостонь жертватнень астувтомась. Сыненст алтавсть ламо вастовомат, од ломантнень марто кортамот…
Самай те чистэнть 75 иеде икеле советской войскатне олякстомтызь нацистской куловтомань сехте покш лагерьсэнть пекстазтнень, конась ульнесь Польшань Освенцим ошсонть.
Ледстясынек, 2005 иень сундерьковонь 1-це чистэ ООО-нь Генеральной Ассамблеясь кемекстась резолюция, конань коряс тов совиця государстватненень мерезель анокстамс программат, штобу зярдояк а стувтомс Холокостонь уроктнень, ёвтнемс эйкакштненень те седейризксэнь кажодонть ды теемс весементь истямо зыянонть а нолдамга.
Якшамковонь 18-це чистэ 1941-1945 иетнень войнань ды трудонь подвигень мемориальной музейсэ панжозель «Холокост: уничтожение, сопротивление, спасение» выставкась. Теде мейле ютавтозельть вастовомат, ледстнемань урокт.
Седе тов, якшамковонь 27-це чистэ, Педагогической роботниктнень профессиянь ёрокчист свал кастомань центрасонть ульнесь республиканской конференция, ков пурнавкшность муниципальной службань специалисттнэ, педагогической сообществань прявттнэ, гуманитарной дисциплинань ды дополнительной образованиянь тонавтыцятне, средней профессиональной ды высшей образованиянь учреждениянь студенттнэ, исполнительной властень органонь ды местной самоуправлениянь представительтне, общественной организациятнес совицятне.
Седейризксэнь вастовоманть панжизе ды ветясь «Педагогической роботниктнень профессиянь ёрокчинь свал кастомань центра – «Педагог 13.ру» МР-нь ДПО-нь ГБУ-нь ректорось, педагогической наукань кандидатось, доцентэсь Татьяна Самсонова.
МР-нь Образованиянь министрань тевтнень топавтыцянть пельде пурнавозтнень марто кортась сонзэ полавтыцясь Иван Дугушкин. Те ризксэв тевенть коряс мелензэ-арсеманзо ёвтызе МР-нь Культурань, национальной политикань ды архивень тевтнень коряс министрань васенце полавтыцясь А.И. Карьгин.
Седейс токинзе кунсолыцятнень эсь пачтямосонзо Россиянь раськетнень Ассамблеянь Советэнь Председателень васенце полавтыцясь Евгения Михалева. Сон ледстинзе, кода ялганзо марто ульнесь Холокостонь жертватнень музейсэнть. Сельмезэст каявсь покш фотография, косо вейке омбоце мельга аштесть Венгриясто ансяк пачтязь узниктне. Евгения Абрамовнань валонзо коряс, снимкась пачкат юты, седееть соракавты. Ломантнень сельмсэ покш тандадома ды ачарькодема, мезень кисэ те таркантень сынст ускизь. Вейке таркасо те очередесь прок ластотсь, куншкасо башка аштесь 13 иесэ тейтерька, маласонзо, горобия лангсо, тетязо-авазо. Те тейтерькась ульнесь ялганзо авазо. Мартонзо сазь ялгась мерсь: те тейтерькась ульнесь сонзэ авазо. Весень маштызь, сонзэ Пазось ванстызе…
Нать, а стяко неень шкане масторонь келес пурнавить фотографиятне, сёрматне, конат сюлмавить те покш кажонть марто.
Покш тев теить тонавтыцятне, кить течи эйкакштненень ёвтнить минек историядонть мезеньгак апак сёпо, анокстыть мартост пелькстамот, тонавтыть видечинть кисэ аштеме.
Те конференциясонть домка докладт тейсть: республикань Лямбирь ёнксонь «Первомайская СОШ» МОУ-нь историянь ды обществознаниянь тонавтыцясь Нина Жаркова, Саранск ошонь «Луховский лицей» МОУ-нь прявтось Светлана Леухина, Рязань ошсто – Надежда Пушкова, Челябинской ёнкссто – Оксана Зазуляк ды лият.
1941-1945 иетнень войнань ды трудонь подвигень мемориальной музеень прявтось Николай Кручинкин пачтясь се таштазь опыттэнть, конань коряс Холокостонь темась тонавтневи аволь ансяк уроктнесэ, истя жо выставкатнень ванкшнозь ды тонавтнезь.
Конференциянть ютавтомсто свал палсь штатол, прядовсь сон чатьмонемань минутасо, мезесь кортась весе тосо маштовозтнень лемест ледстнемадо…
Валентина Юдина