Пятница, марта 29, 2024
Важное



Покш Березникень районсо «Образование» нацпроектэнть тевс нолдамосо васенце эскельксэкс кармась Шугуровань средней школанть юрсо «Точка роста» цифровой ды гуманитарной профилень центранть панжомазо. Сон лезды эйкакштнень тонавтомасо тевс нолдамс неень шкань од ёнкстнэнь ды одкстомтомс информатикань, технологиянь, ОБЖ-нь коряс тонавтомань программатнень.


Зярыя иетнень перть проектэнть тевс нолдамось арсеви райононь весе школатнесэ, штобу тонавтомань программась мейсэяк аволь явово масторонь школатнень эйстэ.

Теке жо «Образование» национальной проектэнть юрсо ветяви робота Дубёнкабуесэяк. Эряви меремс, проектэнть тевс нолдамось – аволь ансяк од школатнень ды эйдень кужотнень стявтома, истя жо арсеви образованиянь учреждениятнень капитальной витнемаськак ды эрявикс оборудованиясо ды спортонь инвентарьсэ сынст топавтомась.
Истя, Дубёнкабуень Кочкуровань средней школасонть «Образование» нацпроектэнть юрсо рамазь спортонь эрявикс инвентарь: футболсо, волейболсо, баскетболсо налксема оскат, гимнастиканть туртов матт, сокст, футболсо налксемань оршамопельть. Школасонть парсте витнезь латось.



Башка эряви ёвтамс Орданьбуень искусствань эйкакшонь школадонть. Сон понгсь республикань музыкальной тонавтомань ниле учреждениятнень юткс, конатненень сы иестэ арсеви явомс 5 миллионт целковоень покшолмасо президентэнь грант. Те весемесь юты «Культура» нацпроектэнть лувсо.

– Те пек вадря куля минек «музыкалканть» туртов, – корты учреждениянь прявтось Светлана Коробкова. – Ламот инструменттнэнень, конатнесэ налксить минек тонавтницятне, уш 50 ламо иеть. Сынь важодить ансяк вадрясто ванстоманть вельде. Неень шкане школасонть (Тургеневань отделениянть марто) тонавтнить весемезэ 295 од музыкантт ды киштицят. Зданиянтень эряви вадря витнема ды неень шкань оборудования. А концертной вейке баянонть питнезэ 400 тёжадо аволь седе аламо, сындест жо эрявить зярыя кементь. Истя жо покш меленек рамамс проектор ды ноутбук марто интерактивной лазт, штобу эйкакштненень максомс неень шкань музыкань, хореографиянь ды художественной содамочить.

Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».