Понедельник, апреля 19, 2021
Важное

Неень шкане республикасо эрязасто топавтови Мордовиянь Прявтонь тевтнень топавтыцянть Артём Здуновонь «Монь Мордовиям» республикань кадровой проектэнть эрямос совавтомась. Ледстясынек, те проектэнть тевс нолдамс лезды «Россиясь – мелень топавтомань мастор» АНО-сь.



Тешкстасынек, те проектэнть лангсо важодицятне, васняяк тевест алкукс топавтыцятне, лиятнеде парсте мелявтыцятне. Кенярдовты, ютксост ламо од ломанть ды сеть, кить таштасть сатышка опыт прявтонь тевсэнть. Течи сынь бажить невтемс ёрокчист. Паро, те пелькстамосонть улить аволь ансяк ошонь, истя жо республикань велетнесэ ды районтнэсэ важодицят.
Вейкесь эйстэст «Ромодановань райононь эрицятнень социальной ванстомань» государственной казенной учреждениянь прявтось Наталья Хомякова.

Те иень чадыковсто топодить колоньгемень иеть се шкастонть, кода Наталья Владимировна ушодсь важодеме Ромодановань муниципальной райононь эрицятнень социальной ванстомань учреждениясонть. Тешкстасынек, те ёнксось сонзэ чачома тарказо, эрицятне тензэ малав весе содавикст.

Вейксэньгеменце иетнестэ Мордовиянь Н.П. Огарев лемсэ государственной университетэнть прядомадо мейле кавтолдомат арасельть, сон велявтсь тиринь Ромоданова поселкав ды кармась важодеме психологокс-тонавтыцякс. Кавто иень ютазь од специалистэнть Наталья Хомяковань ладизь Ромодановань райононь эрицятнень социальной ванстомань отделэнь эйкакш марто семиятнень отделениянь прявтокс, 2005-2009 иетнестэ сон ульнесь МР-нь Ромодановань муниципальной райононь администрациянь социальной ванстомань управлениянь МУ-нь отделэнь прявтокс, 2009 иестэ саезь – те ведомствань руководитель.

Кода кортыть, сон ютынзе служебной весе кузтематнень. 2015 иестэ сонзэ прявтсо коллективесь республикань сынст кондят организациятнень ды предприятиятнень ютксо лиссь изницякс трудовой пелькстамосонть «Социальной ванстома» номинациянть коряс. Эрьва иестэ республикань эрицятненень социальной лезксэнь максомань коряс тевтне яла седе ламолгадыть. Неень шкане эрьва кодат услугатнеде кармасть сизьгеменде ламо.

Те а стяко, эдь сынст важодемаст сюлмави нужасо эрицятнень, ламо эйкакшонь триця семиятнень ды сеть ломантнень марто, кить понгсть эрямонь апак учонь кажос.
Важодемаст ков седе ламолгадсь пандемиянь шкастонть. Сеть ломантне, кить ветясть вишка ды средней бизнес, нурька шкас лоткавтызь тевест. Важодицяст туртов жо ялатеке савсь пандомс аволь ансяк зарплата, истя жо эрьва кодамо фондтнэс кисэст пандомат. Тень ловозь, ламот лезкс мельга пшкадсть эрицятнень социальной ванстомань учреждениятнес.

Кода пачтясь Наталья Хомякова, весе тевест государственной услугатнень максомань коряс: ломантнень кедьстэ документтнэнь саемась, кемекстамось ды сыненст одс максомась тееви «Вейкине вальма» системанть вельде.

– 2018-2020 иетнестэ те службантень эрьва кодамо тев марто пшкалесть 26427 ломанть, – ёвтни Наталья Владимировна. – Те шканть перть специалисттнэ тейсть 51310 межведомственной запрост, мезесь пек лездась киртямс ломантнень шкаст ды виест. Эрьва иестэ социальной лезксэнь максоманть вельде кемекставить ды максовить кемень тёжадо ламо ломантненень льготань коряс эрьва кодат пандомат. Невтемакс, 2018-2020 иетнестэ весе пандоматнеде ульнесть 293297,5 тёжат целковойть.

Сыретненень –башка мель

Ине Отечественной войнань участниктненень, сынст доватненень, тылэнь тружениктненень ды весе сыре ломантненень Ромодановасо свал явови башка мель. Те важодемась ков седе виевгавтозель Ине Изнямонь 75 иетнень тешкстамонтень анокстамсто ды ютавтомсто. Нама, икелень иетнестэяк неть ледстневиця читнень каршо ветерантнэнень максовильть казнеть Мордовия Республикань Прявтонть ды Ромодановань муниципальной райононь администрациянь прявтонть пельде. МР-нь Прявтонть Указонзо коряс Ине Изнямонь чинтень теезельть пандомат сетненень, кить совасть «Дети войны» категориянтень. Ине Изнямонь 75 иетнень тешкстамодо икеле «1941-1945 иетнестэ Ине Отечественной войнасо Изнямонь 75 иетнень топодемантень» юбилейной медальсэ казезельть те ёнксонь ламот ветерантнэ.

Наталья Хомяковань вановтонзо коряс, сынст учреждениясо а седе вишкине мель явить сынст ёнксонь эрицятненень «Сыре ломанень ковстонть», «Инвалидэнь декадникстэнть».
Меельце шкастонть эрьва кодамо лезкс максозель 8665 ломантненень 1636,13 тёжат целковоень питнес. Ютазь кавто иетнень перть куроконь социальной услугат теезельть кавто тежадо ламо ломантнень туртов.
Пандемиянь шкастонть те ёнксонь ськамост эрицятненень, стакасто сэредицятненень истя жо явозель башка мель. Те учреждениянь важодицятне сыненст кудос пачтясть ярсамопельть ды надобият. Невтемакс, ютазь иестэ истямо лезкс максозель колмосядто ламо эрицятненень.

Лездась «Демография» раськень проектэсь

– Минек Ромодановань районось совавтозь истямо проектс, конань коряс тееви покш лезкс сыре ломантнень ды стакасто сэредицятнень мельга, кувать шкань перть ваномань, сынст мельга якамонь коряс, – ёвтни Наталья Хомякова. – «Демография» национальной проектэнть вельде миненек явовсть ярмакт, истямо отделениянь витнемс ды эйзэнзэ эрявикс оборудованиянь путомс. Те минек мельспаронок ды каштанчинек.

Те таркасонть ули весемесь, штобу пенсияв лисицятне аволь ансяк «Сыре ломанень» ковстонть ды «Инвалидэнь декадникстэнть» пурнавольть вейсэ, свалгак. Тосо ули социальной библиотека, шахматонь-шашкань клуб ды лия мелень витемат.

– Виде, COVID-сь нурька шкас совавтсь полавтомат сыре ломантнень эрямос, – ёвтни Наталья Владимировна. – Те а шожда шканть лангс апак вано, муинек кить-янт важодеманок коряс ды занятиятнень карминек ютавтомо ушосо. Паро, покш лезкс тенек макссь «Демография» программась. Истя, сонзэ вельде федеральной ярмактнень лангс раминек ушосо кирдевиця тренажёрной комплекс.
Нама, минь пек учотано се шканть, зярдо прядовить 65+ граждантнэнь коряс ванстомань мератне, сестэ од центранок кенкштне сынст туртов панжовить. Койсэнь, сынь пек кенярдыть те од таркантень. Сынст туртов тосо анок оймсемань комната, ёжомарямонь паролгавтомань тарка. Истя жо ули башка тарка, косо аравтозь эрявикс оборудования шумбрачинь витемс.

Наталья Хомякова тенек пачтясь, кодамо мельспаросо сынь аштить арт-терапиянь, чуваронь (песочной) ды алмазной терапиянь занятиятнень анокчист коряс. Ламот неть ды лия занятиятне шумбралгавтыть рунгонть, лецить ламо потмо орматнень, вельмевтить памятенть. Теде башка, сынст туртов панжови буфет, косо вейсэ кармить симеме пси чайде, кортнеме эрямодонть.

Сыре ломантнень ды стакасто сэредицятнень мельга якамось, конась тевс нолдави те проектэнть эрямос совавтомга, явозь ламо ёнксонь коряс. Васняяк мельс саеви эрьва ломаненть шумбрачизэ. Веенстнэнень лезксэсь максови кудосо, те важодемась ютавтови вейсэ здравоохранениянь учреждениятнень марто. Эдь ломантненень пачтяма аволь ансяк ярсамопель, истя жо надобияткак. Виде, седе паро, бути сэредицянть мельга карми якамо малавикс ломань. Тень туртов тосо панжозь истямо школа, косо раськетне тонавтнить сыре ломаненть мельга видестэ якамо, сонзэ андомо. Истямо лезкс максозь малав тёжа ломанень туртов.

Ламо эйкакшонь триця семиятне – свалшкань инжеть

– Неень шкане ламо семиятне, сехте пек ламо эйкакшонь трицятне, свал пшкалить лезкс мельга эрицятнень социальной ванстомань учреждениятнес. Минь апак лотксе ды шкастонзо ванкшнотано ды пандтано эйкакштненень государственной пособият, – ёвтни Наталья Владимировна. – Теде башка бажатано теемс весементь, штобу кизэнь каникулатнестэ эйкакштне парсте оймсевельть ды витевлизь шумбрачист. Эдь миненек васняяк пшкалить аволь пешксе семиятне, ськамост эйкакшонь триця тетятне ды аватне, нужасо эрицятне.
Тешкстасынек, Наталья Владимировнанень парсте содавикст сыре ломантнень, стакасто сэредицятнень, ламо эйкакшонь триця семиятнень стакачист. Сонзэ ули сатышка опытэзэ ломантнень марто важодемасо, сынст мелявксост чарькодемасо. Сон соды, кода эряви ветямс важодеманть вейке покш командасо, штобу теде улевель лезэ аволь ансяк Ромоданова ёнкссо, истя жо весе республикасо эрицятненень.

Кемтяно, сонзэ сатыть содамочинзэ совамс изницятнень юткс «Монь Мордовиям» республикань кадрань пелькстамосонть.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».