Наркоманиянь кажонть лепштямга ды эрямонь шумбра лувонть кепедемга МР-ва Россиянь МВД-нь Наркотиктнень тевс нолдамонть мельга ваномань управлениянь важодицятне неть читнестэ ютавтсть занятият Орданьбуень райононь Тургеневань ды Орданьбуень общеобразовательной школатнень тонавтницятнень туртов.
Мероприятиясь ютавтовсь Мордовия Республикава МВД-нть юрсо Общественной советэнь членэнть, Орданьбуень ды Отяжелень Епископонть Вениаминэнь мелензэ коряс.
Васняяк инжетне содавтызь Тургеневань средней общеобразовательной школанть. Владыкась Вениамин ды МР-ва МВД-нь Наркотиктнень тевс нолдамонть мельга ваномань управлениянь важодицясь Екатерина Александровна Жерноклеева вастовсть 9-це ды 10-це класстнэнь тонавтницятнень марто. Эйкакштненень пшкадемстэ Архипастыресь ледстизе, наркотиктнень тевс нолдамонь прявт тувталось – акемемась. Те пек покш пежеть, конась шкань ютазь пачти покш зыянс.
Екатерина Александровна домкасто, чарькодевиксстэ ёвтнесь эйкакштненень наркотикень кирдиця препараттнэнь зыяновчидест, кода сынь колыть шумбрачинть.
Мероприятиянть юрсо Архипастыресь ёвтась покш сюкпря МВД-нь важодицятненень – Екатерина Жерноклееванень ды Тургеневань школань прявтонтень С.Б. Дубровиннэнь од ломантнень марто важодеманть кис ды казсь тенст Благодарственной сёрмат.
Седе тов теке жо кортамось поладозель Орданьбуень основной общеобразовательной школасонть. Екатерина Жерноклеева ёвтнесь тонавтницятненень, наркоманиясь а лецяви! Куш кодамо наркотикесь, кода бу сон аволь лемдеве, – те бомба, конась зярдояк сезеви ды ёмавтсы ломаненть.
«Миненек чарькодема, наркотиктне – покш зыян ломантнень туртов, тень марто эряви бороцямс. А эряви улемс мельтемекс те зыянонтень, сонзэ кисэ ули уголовной ды административной ответственность, тень эряви содамс», – тешкстызе Екатерина Александровна.
Теде мейле Владыкась кевкстинзе тонавтницятнень, мезе сыненст макссь те лекциясь. Каршо валтнэде ульнесть ламо ды эрьва кодат. Архипастыресь жо тешкстызе, эрямось – сехте покш казне, конась максозь ломанентень Пазонть пельде, штобу сон эряволь ды теевель паро тевть. Наркотиктнень марто сюлмавозь жо, те казнесь ёмавтови.
Кемеви, неть кортамотнень эйкакштне сайсызь превс ды зярдояк а полавтсызь эсь эрямонть наркотиктнень лангс.
Юлия Еремина