Московсо невтизь ёвтнемань ды стихень омбоце вейспурнавксонть, конатнень авторост СВО-нь участниктне. Книгась нолдавсь «Защитники Отечества» фондонть лезксэнзэ пингстэ ды лемезэ – «Нет уз святее товарищества».

Пусмонтень совасть 43 произведеният, конатнень кочкинзе писателесь Захар Прилепин масторонть келес 750 историятнень ютксто, сынь кучозельть фондонь филиалтнэс. Ютксост Мордовиясто СВО-нь ветеранонть Сергей Пронькинэнь ёвтнемазо. Минек ёнкссо чачозесь фронтов туекшнесь эсь олясо. Топавтсь мотострелковой ротань командирэнь тевтнень, участвовась Мариупольсэ, Волновахасо, Счастье ды Кременная таркатнесэ молиця боевой тевтнесэ. Бойтнень шкасто понгсь артобстрел алов ды стакасто томбавсь, тень кувалма службанть савсь кадомс.

«Поляки напали» сонзэ ёвтнемасонть пачтяви «Эрьзя» позывной марто боецтэнть, конась чоподасонть човоризе лиянь «Урал» мотоцикланть эсензэнть марто ды ушодсь панеме Московонь военнослужащеенть техникастонть. Теке шкастонть «Эрьзя» кортась эсь тиринь кельсэнзэ. Удомань пачк сослуживецэсь тандадсь а содавикс кельденть ды арсесь, што каявсть поляктне, секс тревогань коряс стявтызе весе взводонть.

«Фронтовой весе историятне пек эрявикст, – корты Сергей Пронькин. – Тосо улезтнень ёвтнемаст вельде весе обществась карми содамо, мезе моли СВО-нь таркатнесэ, цёратнеде, конатне кандыть тосо стака службаст. Сюкпря «Защитники Отечества» фондонтень ветерантнэнень лезксэнь максоманть ды исторической видечинь ванстоманть кисэ! Минек историятне седеяк пек эрявикст эйкакштнень туртов, конатнень эрявить кастомс патриотизмань примертнэнь лангсо ды Тиринь масторонтень вечкезь».

Тешкстасынек, «Жизнь за други своя» СВО-нь ветерантнэнь ёвтнемань васенце вейспурнавксось нолдазель февральстэ. Эйзэнзэ истя жо совась Мордовиясто СВО-нь ветеранонть Ренат Исмаиловонь историязо, конасонть ёвтневи тетянзо Миразым (позывноезэ – «Батя») марто вейсэнь службадост.