Сынь чачсть Ицялбуень Ламбаськесэ

 

Прончатов Иван Николаевич (1918-2000)

Чачсь 1918 иень эйзюрковонь 18-це чистэ Ицялбуень Ламбаське велесэ. Школанть прядомадо мейле сась тонавтнеме Саранской педагогической техникумов. Таго-зяро шка важодсь велень школасо тонавтыцякс. Тесэ ушодовсь войнась, ды Прончатов лия од ломантнень марто сыргась ятонть каршо тюреме. Ульнесь артиллеристэкс, разведчикекс. Аволь весть ранязель. Изнямонть вастызе Прагасо. Казезь «Якстере Знамянь», Отечественной войнань II степенень, Польшанть олякстомтоманзо кис ордентнэсэ, «За отвагу» ды  ламо лия медальсэ. Велявтсь кудов 1946 иестэ. Прядсь Мордовиянь педагогической институтонь филологической факультет, А.М. Горький лемсэ Литературной институтонь аспирантура. Ульнесь Мордовиянь книгань издательствань редакторокс, партиянь областной комитетэнь инструкторокс.

Литературас Прончатовонь кизэ ушодовсь 1934 иестэ. Эсензэ произведениятнень печатась эрзянь газетасо ды журналтнэсэ.  «Васень цвет» валморонь васенце пусмозо лиссь 1939 иестэ Саранскойсэ. Войнадо мейле эрзянь кельсэ лиссть сонзэ зярыя пусмонзо. Неть: «Стройсэ» (1950), «Сэняжа». Зярыя валморонзо ды балладанзо ютавтозь рузонь кельс ды нолдазь «Жернова» лем ало башка книгас (1971).

Фронтсо улемстэ Иван Прончатов эсензэ мелензэ-арсеманзо сёрмалесь башка тетрадьс. Неть сёрмадовкстнэсэ сон седейсэ ризнэма марто невтсь, кодамо зыян, кодат майсемат кандсь войнась. Пултазь кудонь куловт, овсе вишка эйкакш, конань маштызь тиринь аванзо сельме  икеле,  повазь ломанень уловт, маштовозь ялгатнень сельмест, – весе се, мезенть поэтэсь несь ды марясь ятонть каршо тюремстэ, совась сонзэ валморотнес седейсэ певтеме сэредьксэнть пачк.

 

Солдатонь блокнотсто

Масторсонть тундо… цёковт

                               моракстыть курок.

Но перькаст кеняркшнемс а зярдо.

 Тона ёно окопка фашистнэнь фигураст 

Сельмстэнь сянгордыть, прок сардот.

Каштмолезь мольдяно Германиянть эзга.

Фашист чарькодеме ломань кельс

                                               а маштыть.

Тень кисэ гвардейской миномётнэ лездаст 

Ёвтамо сень, мезе седейганок таштавсь.

Минь – а суд. Минь ансяк сонзэ

                                               топавтыцят.

Судьятне сеть, кить ней каштмолить эсь

                                                калмосост.

Сынь прамо шкастост, минек масторов

                                                сыцянть 

Тешкстызь: «Кулома тенст!» –

                               приговоронь валсост.

Якстере Знамясь Рейхстагонть прясо – 

Веренек кис пек питней казне.

Хоть Изнямось сась ломань ульцясо,

Но сон – минек ульцясонть праздник!

(1945 ие, Германия)

Шумилкин Иван Егорович  (1924-2006)

Чачсь 1924 иень сундерьковонь 20-це чистэ икелень Обран ёнксонь Лукояновабуень  (неень  Мордовиянь Ицялбуень) Ламбаське велесэ. Кемгавксово иесэ саизь армияв. Те ульнесь 1942 иестэ. Станциясо озавтызь «вазонь» усксема вагонс ды ильтизь васня Удмуртияв вирень керямо, мейле – Горьковской областев, косо тонавтнесь стройсэ якамо, седе тов – Ивановской  областьсэ чапсь-кепедсь баракт.

Тюремань толонть алкукс ладсо васенцеде варчизе Ташто Руссанть маласо. Вейке тюремадонть мейле совасть велес, сельмест икелев кудотнень таркас стясть  раужо трубат ды куловт. Те пек токизе сонзэ седеенть. Те сэредьксэсь эзь кадно эйсэнзэ семс, зярс эзь велявто кудов. Ульнесь связистэкс Северо-Западной фронтсо, мейле – 1-це Украинскойсэнть. Кудов нолдазель 1944 иестэ лавшо шумбрачинзэ кувалма. Казезь Отечественной войнань II степенень орденсэ, зярыя медальсэ.

1950 иестэ прядызе Мордовиянь педагогической институтонь филологической  факультетэнть, ветясь рузонь келень ды литературань урокт Покш Игнатбуень Чукало велень школасо, 1953 иестэ саезь 1974 иенть самс – Ламбаське велесэ. Пенсияв туемазонзо (1979 иес)  важодсь  школань библиотекасо.

Иван Шумилкин сёрмадомо кармась, зярдо тензэ топодсть кемнилее иеть. Васенце валморонзо («Лей», «Теле») печатазельть «Пионерэнь вайгель» журналсо 1940 иестэ. Валморонь васенце пусмозо («Минек морось») лиссь 1952 иестэ. Валмородо башка  сёрмадсь ламо баснят, фельетонт, мизолкст, секс эрзянь литературас сонзэ лемесь совась кода сатирань жанрасо сёрмадыця.  Нолдась кеменде ламо книгат эрзянь ды рузонь кельсэ. Ламо произведениянзо ютавтозь украинской, татаронь ды лия кельтнес. И.Е. Шумилкин пурнынзе фронтовиктнень сёрмаст ды нолдынзе башка пусмос «Толсо гувныця иень сёрмат» лем ало.

 

Сёрма аванень

Шумбрат, авинем! Течи сась

Тонь пельде вишка, лембе сёрма.

 Монь туртов сон ламоксть ёвтась,

Кодамо тонь седейсэ орма.

Кеман валозот – учат свал,

Зярдо велявтан родной кудов;

 Содан – ламо ютавтыть веть

Вейкеяк минута апак удо.

Мельтнесэть ансяк мон ды мон.

 Вальма суликас сельметь сялгат,

 Веленек пес кайсят вановт

Сыре, ловажав кедеть алга.

Монгак а стувтнетян зярскак,

Бажан седе куроксто само,

Секскак войнань кувака кинть

Капшан нурькине шкас ютамо.

Ламоксть куломась вакссон вешксь,

Сёвнось, пижнесь, морась ды ракась,

Вирьга, паксява каршон шешксь,

Разведкасо монь мельга якась.

 Нейгак мезть-бути кортни сон,

Ливтни а васоло монь велькссэ.

Но мон а пшкалян тензэ вал,

Молян икелев покш эскелькссэ.

 Эжди эйсэнь тюремань псись,

Врагонть тапамо мельть монь эйсэ.

Ки мерсь ды зярдо, што фашист

Ине мастором урекс тейсы?

Арась, а ули зярдояк,

Бути пси верь чуди санганок;

Народонь валдо счастьянть кис

Эрьвась сонзэ валомо анок.

Виенек покш. Маштсынек пест,

 Конат арсесть мацтеме чинек;

Сестэ учован тонеть мон,

Валовить вейс эрямонь кинек.

Таго вастовдано мартот

Вальмало или крыльця песэ;

Псистэ кутмордаса  кирьгат

Солдатонь виев, лембе кедьсэ.

Ютазенть весе сестэ минь

Кавонек мартот лецтясынек,

Кие эзь велявто кудов,

Сынсткак столь экшсэ мельс стявтсынек. (1943 ие).

Ведяшкин Иван Михайлович (1923-2009)

И.М.Ведяшкин чачсь 1923-це иень умарьковонь 17-це чистэ Орданьбуень Кельвядни велесэ. Прядсь тонавтыцянь институт. Зярыя шкань ютазь тонавтнесь Эрзя-мокшонь госуниверситетэнь филологиянь факультетсэ. Ниленьгеменде ламо иеть важодсь эрзянь келень ды литературань тонавтыцякс Орданьбуень Чукало велень средней школасо. Тесэ ветясь «Васень пургондавкст» литературной кужине. Иван Михайлович идизе филологиянь наукань кандидатонь диссертациянть. Ульнесь Ине Отечественной войнасо. Казезь зярыя медальсэ.

Зярдояк эзизе кадно сёрмадоманть. Произведениянзо секе-тев лиснесть «Сятко», «Чилисема» журналтнэсэ, «Эрзянь правда» газетасо.

Ловныцятнень мельс тусь эрзянь кельсэ стихсэ «Куцян веледе ёвтамозояк» (1998), «Чивалдо» (1998), «Ратор ёнксонь морот» (2006) стихень пусмонзояк. Зярыя стихензэ совасть хрестоматияс.

Содавиксэкс теевсть «Тиринь Модань кельть» (1997) лементь ало кавто валксонзо, конатнес совасть эрзянь стувтозь ламо валт.

И.М. Ведяшкин сёрмадсь зярыя нурька пьесаткак. Сынь печатазельть «Эрзянь правда» газетасо.

Неявикс тешкс Иван Михайлович Ведяшкин кадсь наукасояк. Весень мельс тусь «Залогонь  категориясь  эрзянь  литературной кельсэнть» статьязо, кона лиссь 1979-це иестэ «Сятко» журналсо.

И.М. Ведяшкин 2001-це иестэ совавтозель Россиянь Писателень союзс.

Кулось сёрмадеесь 2009-це иень таштамковонь 17-це чистэ, калмазь тиринь велесэ.

* * *

Кузинь пандо тёкшос

Сёксень вейке чистэ,

Варштынь мон пертьпельга

Эсь сельмтнесэ пштистэ:

Монь икеле – Юдма,

Кардавкс, Сёвонь туро,

Лунька ки, Покш пандо,

Одыре, Каль куро,

Родя латко, Нерьбе,

Мар, Кавто лей уло,

Лёмонь кужо, Урьцьке,

Чистя, Буйни пуло…

– Мастором! – серьгидинь, –

Монь Кельвядне велем!

Весе мазычисэть

Сравтовить икелем!

Монь велиненть-веленть

Мазыйгак лемезэ.

Монь велиненть-веленть

Лисьмапрянь танстезэ!

Седеем кенярды,

Пештязь вирень увтто.

Эрзянь гайги моро

Монь ойминенть пувты.

Потмо валон тарган, –

Мором апак прядо.

Мором апак прядо

Эсень уцяскадо!