Четверг, марта 28, 2024
Важное

Аволь умок яволявтозельть литературань коряс МР-нь Прявтонь премиянь лауреаттнэнь лемест. Изницятнень ютксо – эрзянь сёрмадыцясь Алёна Воронцова (Салдаева). Сон чачсь 1998 иестэ Орданьбуень Орозбие велесэ. Школасо тонавтнемстэ саезь сёрмады стихть ды ёвтнемат. Течи тейтересь минек редакциянь инже.


– Алёна, ёвтнек, кода ютась эйкакшпингеть?
– Мон чачинь ды касынь велесэ. Свал мельспаросо ледстнян эйкакшпингем: сон монь апак кола ошонь кольнематнесэ. Алкуксонь сырнень шка, чинь-чоп ушосо, кудов совилинек ансяк сахар марто кшиде ярсамо ды ёндолокс мекев – налксеме. Весть лиссь истямо тев: ульнесь ансяк кизэнь ушодовома шкась, мон пурнынь оян марто эрьке лангов калонь кундамо. Авам эзь нолда, мон жо салава оргодинь. Сынь чокшне ёнов, зярдо скалтнэнь пансть стадасто. Авам те шкане кузтемапесэ учось эйсэнь илевне марто. Сестэ ульнесь апаро, а ней монськак чарькодьса, кода авань седеесь ризнэсь кисэнь. Монень визькс сень кисэ, зярдо покордакшныя авань. Семиянь коряс пек сюпаван: авам, тетям, покштян-бабан, Даша сазоркам.

– Зярдо ушодыть сёрмадомо произведеният? Кие ульнесь превс путыцякс?

– Парсте а ледстявияк: вейксэце эли кеменце классо. Те тевсэнть васенце тонавтыцям ды превс путыцям Николай Иванович Аржаев. Зяро эйкакш марто сон важодсь! Зяронь кирвазтинзе мелест сёрмадомань тевентень! Пек покш мель явсь литературантень. Тонавтсь, кармавтсь варчамс виенек меленек-арсеманок сёрмадомасо. Ды монгак, лиятнень ладсо, ушодынь сёрмадомо. Сон свал лездыль тень муемс эрявикс валт, ёвтыль, кона ёнов велявтомс сюжетэнть, мезенть эряви ёртомс эли кода седе вадрясто эсь мельтнень ды мелявкстнэнь путомс ашо конёвонть лангс. Сонтемензэ, арсян, вейкеяк сёрмадовкс а лисевель.

Алёна лия тонавтницятнень марто пелькстась келень ды литературань коряс школань олимпиадатнесэ. Вейке истямосонть, 2015 иестэ Тиринь келень ды литературань регионъютконь XVII-це олимпиадань творческой секциясо сон сайсь омбоце тарка. Те ульнесь апак учне, сон пек кецнесь. Тейтеренть сёрмадовксонзо кармасть лиснеме «Чилисема» ды «Сятко» журналтнэсэ. «Лембе валсто стазь вечкемась…» васенце валморозо лиссь «Чилисемасо» 2014 иестэ. Кисэнзэ каштанчисэ ды мельспаросо аштесть весе малавиксэнзэ. Авазо нейгак вансты ды пурны сонзэ произведениятнень марто номертнэнь.

Школанть прядомадо мейле Алёна Воронцова кармась тонавтнеме Н. П. Огарёв лемсэ МГУ-нь Медицинань институтсо «Лечебное дело» специальностенть коряс.

– Алёна, мекс кочкик медицинанть?

– Врачонь профессиясь эйкакшпингстэ уш вечкевсь тень. А содангак, косто превезэнь саевсь, ансяк мелесь ульнесь кеме. Сюкпря тетянень-аванень, эзть моле каршо, парсте вастызь меленть тонавтнемс врачокс. Васень колмо курстнэсэ тонавтнемась стака марявсь. Предметтнэде ульнесть ламо, весе одт ды а содавикст. Мейле тонадовсь, совинь лувонтень, стакачитне ды мелявкстнэ ёмасть. Ков иля моле, тонавтнемс эрьва косо эряви. Медицинань институтсо тонавтнемась вечкевсь, пурнавсь пек паро группанок. Весе теевинек паро ялгакс.
2021 иестэ прядыя вузонть ды туинь тонавтнеме седе тов ординатурав. Ней важодян МР-нь ГБУЗ-нь 5№ РКБ-нь 2 № поликлиникасо терапиянь направлениянь коряс.

– Ёвтнек эсеть семиядот.
– Вишка шкане кортылинь: «Васня тонавтневан – мейле семия». Ансяк ней чарькодинь, кодат стяконь ульнесть валтнэ. Ней семиям седеяк покшолгадсь: мирдем, эйдем, атявтом-ававтом. А содан, мезе сынтемест теевлинь? Покш сюкпря вере Пазонтень, улить малавикс ломанень.

Сон видьксты, аволь свал сакшнось од сёрмадыцянь семинартнэс. Медицинань институтсо тонавтнемстэ юткошка тунь а эрси, ковгак а кенерят. Тень лангс апак вано, свал кучнесь сёрмадовксонзо журналтнэс. Авторось сёрмады пертьпелькстэ, эйкакшпингеде, авадонзо, шкадонть, ёжомарямотнеде...

Ней Алёна Воронцовань казизь МР-нь Прявтонь литературань премиясо. Ашо Кудов каземе сон эзь молеве, ормалгадсь. «Сюкпря ёвтавлинь МР-нь Писателень союзонь правлениянь прявтонтень Т. П. Швецованень. Сон путымим превс, лездась пурнамс эрявикс конёвтнень», – ёвтни Алёна.

Минь эсенек пельде арсетяно Алёнанень творчествасо од изнявкст, а кадомс литературанть, поладомс сёрмадоманть, истя жо парсте молевель тевезэ медицинасо.

Татьяна МАТОРКИНА


Валморонзо.

ЛЕМБЕ ВАЛТ
Авай, авинем, оям,
Лембе валт тонеть казян.
Розь паксясто, сэнь менельстэ
Тонеть уцяска кандан.

Цецянь пусмо тонеть пурнан,
Моран моро кувака.
Чаминезэть токшить турван,
Мизолкс сельместэнь неян.

* * *
Ули мелем морамс эрямодо,
Ёвтнемс валдо чипайденть,
Кода валске кувака налсонзо
Токши турван ды сельмень.

Ули мелем кутмордамс менеленть,
Ашо пельтнень потс ваямс.
Ули мелем тонадомс ливтнеме,
Тештень тошкамонть марямс.

ЭЙКАКШОНЬ УЦЯСКА
Тон казить монень эрямо,
Невтить васень зорянь нал.
Тонавтымик монь якамо,
Пачтят мазычи тень свал.

Тонь тюжа сельмесэть неян
Вечкемань толпандя прок.
Ансяк тон ки монень теят,
Свал идят эйсэнь курок.

Тонь вановксот чевте, авай,
Сонзэ кирдян оймесэнь.
Тонь пейдемат лембе, авай,
Седейкс гайги мештесэнь.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».