Ине Отечественной войнась, конань минек масторонть каршо ушодокшнызе фашистской Германиясь 1941-1945 иетнестэ, кандсь эрицятненень пек ламо кажо ды стакачить. Кодамояк лия войнасо арасель ломантнень ютксо истямо вейсэнь лув ды патриотизма.
Мордовиянь писательтне, кода лиятнеяк, войнань васенце читнестэ саезь стясть тиринь масторонть ванстомо. Писателень вейсэндявксонь 34 ломантнестэ 28-тне туекшнесть фронтов. Войнань участникекс ульнесть: К.Абрамов, Ф.Андрианов, И.Антонов, Ф.Атянин, М.Бебан, И.Брыжинский, С.Вечканов, П.Гайни, Ф.Дурнов, И.Девин, П.Кириллов, П.Любаев, Г.Меркушкин, П.Прохоров ды лият.
Аволь весенень савсь велявтомс тосто. Тюремань паксятнес кадовсть зярыя сёрмадыцят, конат састь эрзянь литературантень войнадо икелень иетнестэ. Неть – Алексей Рогожин, Григорий Ельмеев, Александр Зиньков, Фёдор Дурнов, Пётр Кономанин, Андрей Сафронов, Степан Прохоров. Сынь максызь минек кисэ сехте питнеест – эрямост. Войнасо маштовозь писательтне свал кармить миненек паро примерэкс, кода эряви вечкемс тиринь масторонть. Истямо примерэкс свал ульнесь поэтэсь, критикесь ды педагогось Алексей Владимирович Рогожин (Рав). Сень лангс апак вано, сон эрямосто тусь пек рана, творчествазо кеместэ саи эсь тарканзо эрзянь литературасонть. Писателенть седе ламо произведениянзо кармасть хрестоматийноекс.
А.В.Рогожин чачсь 1909 иень мартонь 7-це чистэ Чувашия Республикань Первомайской райононь Балабаш-Нурусова велесэ вирь ваныцянь семиясо. Кода ледстнесь сонсь писателесь, велесэнть ояксчисэ эрясть ламо раськень ломанть: эрзят, рузт, чуважт. Ютксост зярдояк кодаткак аладямкат арасельть. Эсь велесэ эриця ломантнень сэтьме лувось ютаськак икелепелень сёрмадыцянть обуцянтень.
Сонзэ вечкилизь оятне, мелензэ ловсть седе покштнеяк. Цёрась свал муиль кель-вал весень марто. Эйкакшпорась ютась истямо таркасо, косо пек мазыель пертьпельксэсь. Сёрмадыцянь ёнкстнэнь тензэ максызь тетязо ды авазо, конат содыльть эрзянь устной народной творчествань ламо произведеният. Чокшне ланга тетяст ёвтниль тенст ёвкст, авазо морыль эрзянь морот эрзятнень стака эрямодост. Тетянзо ёвкстнэсэ парось свал изнилизе беряненть. Семиянь коштось-лувось, мазый пертьпельксэнть марто вейсэ чачтсь А.Рогожинэнь оймесэ сёрмадомань лув.
Истямо лувонть эрявсь виевгавтомс, ансяк тиринь велесэ тонавтнемс ульнесь а косо. Сисем класстнэнь прядомадо мейле А.Рогожин сась Саранскоев. Мордовиясь сонзэ туртов кармась омбоце чачома таркакс. 1932 иестэ кармась студентэкс Мордовиянь А.И.Полежаев лемсэ педагогической институтонь рузонь келень ды литературань факультетэнь васенце курсонь студентэкс. Мартонзо вейсэ тонавтнесть Серафим Вечканов, Пётр Гайни, Андрей Сафронов, Фёдор Ермичев. А.Рогожин сеедьстэ совсиль эрзянь изданиятнень редакцияс. Тесэ роботыльть Емельян Пятаев, Александр Щеглов, конат уш ульнесть содавикс писателекс. Тонавтнемстэ теевсь содавиксэкс эрзянь произведениятнень марто. Эштё 1933 иестэ Рогожинэнь печатызь стихень васенце сборникензэ. Лемезэ: «Иетне жойнить» («Годы звенят»). 1936 иестэ прядокшнызе институтонть. Кода паро тонавтницянть, сонзэ кадызь роботамо институтс, рузонь келень ды литературань тонавтыцякс.
Курок А.Рогожин полавтызе эрямо тарканзо. Чаунза посёлкасо кармась роботамо эрзянь ды рузонь келень, литературань тонавтыцякс. Седе тов – тонавтнемань ды воспитательной роботань коряс школань директоронь полавтыцякс. Неень шкане Чаунзань общеобразовательной 1 № школасо ванстовить А.В.Рогожиндэ документт ды материалт.
Тестэ, Чаунзасто, А.В.Рогожин тусь фронтов. Седе мейлень шкатнеде материалт овсе аламо. Ансяк содазь, сон участвовась Украинань Дрогобыч ошонть маласо бойтнесэ ды маштовсь. Те ульнесь 1944 иень мартонь 24-це чистэ. Поэтэсь маштовсь, стихензэ жо кадовсть, истя жо кадовсь эрзянь литературасо лемезэяк. Ломаненть туртов те сехте паро памятник.
А.Рогожин сёрмадомо кармакшнось эштё школасо тонавтнемстэ. Рузонь кельсэ васенце стихензэ печатавкшность школань стенгазетасо. 1925 иестэ саезь сонзэ стихтне печатавсть «Якстере теште» («Красная звезда») газетасонть. Эрзянь кельсэ васенце стихензэ лемезэ: «Сёрма». Седе тов Рогожинэнь стихтне печатавсть Алатырь ды Саранск оштнень газетатнесэ. Ламо иень перть эсь стихтнень алов фамилиянзо таркас поэтэсь сёрмадыль (Рав) лементь. Букватнень коряс те – Рогожин Алексей Владимирович. Се шкань иетнестэ сёрмадыцятнень ютксо ульнесь истямо кой.
«Иетне жойнить» васенце сборникензэ поэтэсь алтакшнызе эрзянь раськень культурантень. Тозонь совавтозь 22 сехте паро стихотворениянзо. Рогожиннэнь удалась поэтэнь кельсэ, стихень лувсо ёвтнемс республикасонок од полавтоматнеде. «Колхозонь паксясо», «Пивсыть», «Дедам ударник» стихтнесэ ёвтневи велень эрямодонть, коллективсэ роботамодонть. Велесэ полавтоматнеде истя жо ёвтневи «Велев», «Васень май», «Чарькодсь» стихтнесэяк.
А.В.Рогожин эсь творчествасонзо ламо стихть алтась эйкакштненень. «Пандо прясо», «Лавсень моро», «Теле» стихтнесэ сон снартни совамс вишкинетнень оймес, сынст эрямонтень. Эряви тешкстамс, Рогожинэнь ламо стихензэ сёрмадозь рузонь поэттнэнь (А.Кольцовонь, И.Никитинэнь ды В.Маяковскоень) лувсо. А.Рогожинэнь сехте покш произведениянзо лемезэ – «Галё». Сон сёрмадозель 1935 иестэ. Тесэ поэтэсь невти тевтнень, конат ульнесть Россиясо 1905-1907 иетнень васенце рузонь революциядонть икеле. Сон невтинзе се шкань эрзянь ломантнень обуцяст, конат анокольть бороцямс эсь олячинть кис.
Произведениянть сёрмадомсто А.В.Рогожиннэнь лездасть устной народной творчествань койтне. Поэмасонть ламо морот, легендат, преданият, конат теить те художественной произведениянть пек мазыекс.
1939 иестэ А.В.Рогожинэнь лиси «Литува» эштё вейке поэмазо. Сон васенценть поладксозо. Поэтэсь невти эрзятнень стака эрямост.
Меельце поэмадонть мейле А.В.Рогожин кармась седе ламо мель явомо художественной критикантень. Периодической печатьсэ кармасть лиснеме сонзэ статьятне: «Эрзянь литературадонть», «Ф.И.Беззубовань творчествадо». Ф.В.Сульдянин марто вейсэ сёрмадсть «Эрзянь кель: грамматика ды орфография» тонавтнемань учебник. Теде башка, эрзянь кельс ютавтсь рузонь классиктнень произведенияст. Ютавтсь эрзякс чуважонь произведенияткак. Алексей Владимирович парсте содылизе ды кортыль чуважонь кельсэяк. Кавонест кельтне ульнесть тензэ малавикст.
Ине Отечественной войнанть шкасто поэтэсь сёрмадсь зярыя стихть патриотической темас. Фронтсо улемстэяк А.Рогожин эзь стувтне литературадонть. Сонзэ блокнотсонть свал ульнесть сёрмадовкст солдаттнэде, геройде очеркть, эрьва кодат миниатюрат, конатнесэ ёвтнесь минек ломантнень стакачитнеде. Изнямос кемема невтеви «Киска», «Народ-герой», «Колмонест» ды лия стихтнесэ. Вана мезе поэтэсь сёрмады «Цёранстэнь» стихсэнзэ.
Инегуй фашизмась
Каявсь минек лангс,
Мон содан, а кадыть
Сонзэ эйстэ панкст.
Ливтят, цёрам, менельс
Бойка нармуньсэнть,
Чачома масторось
Аштезэ мельсэть…
Ризксэнтень, А.В.Рогожинэнь творчествазо педе-пев эзь панжово. Войнась сезизе эрямонзо. Се, мезе поэтэсь сёрмадсь, совась эрзянь литературань сырнень фондс. Произведениянзо, эрямодонзо ды творчествадонзо литературась ванстови А.С.Пушкин лемсэ Национальной библиотекань фондтнэсэ.
В.БОЯРКИНА,
А.С.Пушкин лемсэ
Национальной
библиотекань национальной ды краеведческой
литературань отделэнь прявт библиотекарь.