Четверг, марта 28, 2024
Важное

ЭРЗЯНЬ СОДАВИКС ФОЛЬКЛОРИСТЭСЬ, ПЕДАГОГОСЬ, ФИЛОЛОГИЯНЬ НАУКАНЬ ДОКТОРОСЬ, ПРОФЕССОРОСЬ А. Г. БОРИСОВ ЧАЧСЬ АТЯШЕВСКОЙ РАЙОНОНЬ САБАНЦЕЛЕСЭ 1925 ИЕНЬ СУНДЕРЬКОВОНЬ 26-це ЧИСТЭ СОКИЦЯНЬ-ВИДИЦЯНЬ СЕМИЯСО. ВАСНЯ ТОНАВТНЕСЬ ВЕЛЕНЬ ШКОЛАСО, МЕЙЛЕ – КОЗЛОВКАНЬ ПЕДУЧИЛИЩАСО.


Андрей Григорьевич – Ине Отечественной войнань участник. Войнадо мейле ульнесь Советской Армиянь кадровой офицерэкс. 1959 иестэ прядызе Н.П. Огарёв лемсэ МГУ-нь историко-филологической факультетэнть. Седе тов тонавтнеманзо поладокшнызе МНИИЯЛИЭ-сэ. 1964 иестэ аспирантуранть прядомадо мейле 1991 иес важодсь М. Е. Евсевьев лемсэ МГПИ-нь рузонь келень ды литературань, эрзянь-мокшонь кельтнень ды литературатнень кафедрасо. Васня ульнесь старшей преподавателекс, шкань ютазь – доцентэкс, мейле – профессорокс. 1988 иестэ идизе филологиянь наукань докторонь диссертациянть.

Фольклоронь пурнамонь тевентень А. Г. Борисов явсь пек покш мель ды тонавтнесь эйсэнзэ пингензэ перть: веледе велес яксезь, сёрмалесь ёвкст-морот, тень тееме кармавтсь ды тонавтсь студенттнэньгак. Меельцетнень марто пелень-пелень кизэ эрсесь фольклоронь практикасо. Минек раськень устно-поэтической творчествань сюпавчитнень пурнамга, сынь, ловт, ялго ютызь Мордовиянть, Самара ёнксонть ды Россиянь лия областтнень, пачколесть эрзянь ламодояк ламо велес.

«Раз, два, три...» эйкакштнень туртов васенце книганзо А. Г. Борисов сёрмадызе 1970 иестэ. Седе тов мельга-мельцек лиссть «Диво-дивное, чудо-чудное» (1979), «Летят, летят утушки» (1982), «Как волк колядовать ходил» (1983) книганзо. Эрзянь фольклоронть коряс седе ламо таштавксонзо совасть «Устно-поэтическое творчество мордовского народа» пусмонь котоце томонтень (1972). Теде башка, Андрей Григорьевич анокстась эрзянь келень ды литературань зярыя тонавтнемапельть, валкст, сёрмадсь литературоведческой ды критической статьят.

Важодевельгак А. Г. Борисов седе тов ды ламо мезе панжоволь наукасонть. Ансяк ормась эзь максо тень тееме. А. Г. Борисов кулось 1991 иень мартонь 19-це чистэ.
Икелень тонавтницятне ледстнить профессоронть, кона панжизе тенст тиринь раськень устно-поэтической творчествань мазычинть ды сюпавчинть. Те шкинеманть домкасто содыця ды певтеме вечкиця ломань, сон бажась совавтомс те вечкеманть студенттнэнь, аспиранттнэнь седейскак. Течи, зярдо раськень умок ладявозь-кемекставозь койтне стувтозь, Андрей Григорьевич Борисовонь шкинемазо ды важодевксэнзэ питнейчист седеяк касыть. Эрзя-мокшонь фольклорось, конань пурнызе ды тонавтнизе учёноесь, – те оймень ды превейчинь невтевкс.

А. Г. Борисовонь книганзо, конатнень питнейчист эзь алкиньгадо нейгак, ловныцясь мусынзе Мордовия Республикань А. С. Пушкин лемсэ НБ-нь раськень ды краеведениянь литературань нупальсэ.

В. Б. БОЯРКИНА,
МР-нь А. С. Пушкин лемсэ НБ-нь раськень ды краеведениянь литературань нупалень прявт библиотекарь.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».