Четверг, декабря 02, 2021
Важное

А.С. Пушкин лемсэ библиотекасо ютась литературань чокшне, кона алтавсь рузонь поэтессанть Валентина Юдинань 70 иень юбилеентень.
«Женщина в Поэзии – Муза и Творец» проектэнть арсицясь – Ицялбуень райононь библиотекань важодицясь Анжелика Горбунова. Сонензэ ютавтомс лездась А.С. Пушкин лемсэ библиотекань раськень ды краеведениянь литературань отделэсь, кона пурнась книгань сюпав выставка. Сонсь Валентина Михайловна эзь саво, шумбрачись лавшомгадсь… Ансяк зяро те чистэнть сонзэ лемс гайгсть лембе валт! Тей сакшность сонзэ ялганзо ды тонавтницянзо.

В.М. Юдина чачсь Мордовиянь Ицяло велесэ. Школанзо прядызе сиянь медаль марто. Тонавтнесь Московонь М. Горький лемсэ Литературной институтсо. Стихть кармась сёрмадомо школасо тонавтнемстэ саезь. Яксесь литературань курынес, конань ветясь В.К. Радаев. Кода пачтясть ветицятне, сынст классост ульнесь виев ды лиятнень ёнов а молиця. Вейсэ тонавтнесть сы шкань музыкантось В. Ромашкин, сы шкань артыцясь А. Шадрин ды юткстост кассь поэтэсь Валя Юдина.
1974 иестэ саезь В.М. Юдина кармась роботамо «Трибуна строителя» ламо тиражонь газетань корреспондентэкс ды литсотрудникекс. 1982 иестэ саезь мирдензэ, поэтэнть А. Терентьев марто ушодсть ветямо «Пегас» литературань студия (важодсь «Строитель» Культурань кудосо).
«Журавушка» валморонь васенце пусмозо лиссь 1977 иестэ. Сонзэ кис Юдина кармась Мордовиянь Комсомолонь премиянь лауреатокс. Теде мейле нолдась «Подснежники» (1983), «Зимний колодец» (1988), «Цветочное поле» (1993) стихень пусмот ды лият. 1991 иестэ саезь – Россиянь Писателень союзонь член. МР-нь заслуженной поэт.
Нама, те чистэнть сцена лангсо гайгсть сонзэ валморонзо. Сынь – шождат ды теке марто виевть, эйсэст покш вечкема весе пертьпельксэнтень ды тиринь ёнксонтень, ломантненень.

– Минек литературасо Валентина Юдинань творчествась ашти васенце рядсо. Поэзиясь – те валонь ды мельтнень искусства. Сон пек парсте мари ды чарькоди валтнэнь, секскак истят мазыйть ды виевть валморонзо, – кортась историкесь, фольклористэсь А.М. Шаронов. Паро валт истя жо ёвтась МР-нь Сёрмадеень союзонь правлениянь прявтось А.А. Громыхин. Сонзэ поладызе поэтэсь ды писателесь Наталья Рузанкина:

– «Пегас» литературань студиянтень карминь яксеме 90-це иетнестэ. Валентина Михайловна ды мирдезэ кармасть монь вадря тонавтыцякс. Сынтемест аволинь уле поэтэкс. Студиясь вейсэндясь весень: поэттнэнь, артыцятнень, музыканттнэнь. Сон ульнесь таркакс, косо эжнесть минек сорныця ойменек. Тей яксесть од цёрат ды тейтерть, конат теевсть паро поэтэкс ды прозаикекс. Саемга, А. Арапов, К. Тангалычев, Г. Мелентьев, А. Немов, В. Бирюков ды ламо лият. В.М. Юдина минек туртов сестэ ульнесь паро тонавтыцякс, кунсолыцякс, превс путыцякс, весень оймавтыцякс. Мирдензэ куломадо мейле ськамонзо ветясь «Пегасонть». Сон – чевте седей ды ломанень вечкиця.

Вастовомасонть гайгсть мороткак. Сынст казизь МР-нь заслуженной артисткась Елена Воронина, «Ламзурь» фольклорной ансамблясь, Ицялбуестэ сазь Юлия Никишанина, Сергей Юфкин, Сергей Елфимов. Лиссь алкуксонь кенярксчи.

Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».