«Эрзянь правдась» уш сёрмадсь Людмила Рябовань «Липалей» од книгадонзо. Ней сондензэ эсь мелензэ-арсеманзо ёвтынзе МР-нь заслуженной писателесь Геннадий Гребенцов.
Истя лемдизе эсь валморонь пусмонзо эрзянь сёрмадеесь Людмила Рябова. Валморонь сёрмадыцятнень ютксо те лемесь уш содавикс, вечкевикс. Эрьга, ней вана сёрмадсь од ловныцятненень пусмо. Ды кодамо вадря!
Паро конёв лангсо, мазылгавтозь ламо тюсонь эрьва кодамо артовкссо, прок эйдень мультфильмасто саезь… Нама, бути пусмодо кортамс, васняяк, эряви кортамс сёрмадозденть.
Пусмонтень совасть 38 валморот ды валкске.
«Ашо венчке» васенце валморось уевтимизь весе пусмованть. Сёрмадеесь тешкстась ламо эрьва мезде, эрьва киде. Весе валморотне сёрмадозь шождасто, чарькодевиксстэ, прок эрзянь фольклорсто саезь морынеть. Валморотнесэ валтнэ налксезь налксить, прок налксемань ловомкат (считалкат).
Мон ашо конёв саян
Ды вишка венчке теян.
«Уйть васов, иля вая», –
Састыне тензэ мерян.
…Мон ашо конёв саян
Ды сёрмадан: «Икелев!»
(«Ашо венчке»)
Сыргатано миньгак икелев, ловносынек лия валморотнень. Ве лопа ловнотано, омбоце. Эрьвась мазылгавтозь валтнэнь коряс.
Уцяскав эйкакшонь эрямос бажи сёрмадеесь «Мель» валморосонзо. Эдь а стяко кортыть: тештень прамось – уцяскас. Весе вишка ловныцятненень – уцяска.
Ниле пильгсэ ялганок вечкеме терди «Ёмавкс» валморось:
Ёмась ёнксом – кискам ёмась!
Ков сон ансяк тусь,
пайстомось?
Паряк, лыты ней та-кува…
Сёксень варма, иля пува,
Иляк кельмевте ялгинем,
Ашо пильгине кискинем.
Кискань вечкемадо «Ялга» валмороськак. Истя жо лембестэ сёрмадозь каткадо: «Пелиця катка», «Колы Вася» ды «Ципакине».
Л. Рябова прок эседензэ сёрмады «Няка» валморосонзо:
Ванодо, кодамо някам:
Кодат черензэ кувакат,
Кодат сэняжат сельмензэ,
Менчевицят пильгинензэ…
Ловнат неть сёрмадовкскетнень ды сельметь икеле прок вишка пингстэ сонсь Люда.
Налкшкеде ёвтни «Чебурашка» валморось. Кие а содасы, а вечксы те налкшкенть? Модань весе эйкакштне!
«Мекшке» валморосонть сёрмадеесь аволь ансяк мекшкенть мазычидензэ сёрмады, лезэвчидензэяк:
«…Мон а паньса важодицянть, –
Медесь иди сэредицянть.»
Кодамо валморо иля ловно – эрьвась лембе, чевте, эрьвасонть мезе-бути од, эрьвасонть поэтической муевкс.
Прядови пусмось ловныцятненень пшкадемасо:
«…Апак пеле мольть икелев
яла.
Бути потсот валдо толнэ палы,
Кодамояк вийнень а изняват.
Тон ёвксонь масторсо пек
эряват!»
(«Тон эряват!»)
Тиринь масторонь вечкемась «Сехте мазый» валморосонтькак:
«…Мон ёвтаса тензэ
Сехте питней мелем —
Свал эрязо мазый
Тиринь эрзянь келем!»
А карман эрьва валмородонть кортамо. Муеде шка, ловнынк эйкакшонк туртов неть гайтев, смустев, валдо валморотнень. Тынськак велявтадо эйкакшонь масторов, эдь весе минь тосто. Бути ловносынк вишкинетненень неть валморотнень удомадо икеле, сестэ сынь неить ёвксонь кондят мазый онт. Неть весе валморотне прок ёвкст, ёвксонь а вечкицят жо арасть.
Кадык ловныцянок туртов нолдавить седе ламо истят пусмот. Кадык седе ламо улить сёрмадеенек, ловныцянок ды весе улить шумбрат!