Четверг, марта 28, 2024
Важное

Те ульнесь 1999 иень сундерьков. Мон сестэ тонавтнинь университетэнь 5-це курссо. Чокшне гайневтсь авам: «Сак кудов, бабат берянь».

Се весь марявсь пингекс, кода яла кортыль бабам: «Сув сельмень ланга эзь юта». Мелезэнь ледсть весе тевензэ ды лембе валонзо, конатнень сон алтылинзе миненек, нуцьканзо ды эйкакшонзо туртов. Козонь вейке, коськаня бабинес кельгсь зняро вечкема ды седеймарямо? Сон зярдояк киньгак эзь покордакшно аволь ансяк тевсэ эли валсо, мик варштавкссояк. Велесэ весе вечкезь мерильть тензэ Оля баба. Ламо ёвтнемс эсь прядонзо а вечкиль. Ялатеке лиясто, чокшне ланга, лембе каштомлангсо аштемстэ ушодыль ледстнеме.

Сырькаем (бабам, кода кортыть Отяжбуень Селища велесэ) чачсь 1911 иень ацамковонь 27-це чистэ Орданьбуень Чукало велесэ. Кудораськест се шканть коряс аволь покшоль: сырькаезэ, покштязо, авазо, тетязо, сон ды Минька вишка ялакскезэ, кона чачсь тетяст Васенце мировой войнас саемадонзо мейле. Бабань валонзо коряс, кода-бути удалакшнось пачтямс тетянзо туртов учозь цёрань чачомадо. Кенярксось кудораськесэнть покшоль, ансяк мольсь аволь кувать.

Позда сёксь, жойсэ валы пиземе. Кортыть, истямо шкане паро азор кисканзояк кардазсто а паньсы. Кудопотмонть валдомты ансяк чевкс. Каштомланго крайсэ озадо сырькай, вакссонзо мадезь ашо пря тейтерне (те бабам), кудованть яки од ава, нурси ды бажи оймавтомс эйкакш, конась авардемадонть ушодсь уш кирнэме. Вишка Минька ормалгадсь, сонзэ тиф. Вана вальмасуликантень прок кие-бути вачкодсь, мейле эштё весть. Кудазорось варштась вальмава ды абунгадсь – Миша сась. Бабань ледстнеманзо коряс, кудосонть кепететсь шалт, чийсть кенкшень панжомо. Кудос совась сэрей цёра, солдатонь оршамосо, мештесэнзэ колмо крёстт, кедьсэнзэ нагайка. Корты, Орданьбуестэ Чукало видьс пансь айгоронть апак лотксе, истя бажась седе курок пачкодемс кудов, сонзэ нолдызь нурька шкань отпускс. Вишка Оля видьстэ каштомлангсто каявсь кирьгазонзо, сась ваксозост авазо Минька марто. Вень пачк кандтнесь кедьсэ тетясь цёрынензэ, оймавтсь, кортась мартонзо. Валске марто Минька кулось. Тетянтеньгак эзь саво мекев велявтомс войнав, тифесь педясь сонзэ эйскак ды шкань ютазь «сэвизе». Истя ушодовсь урозокс эрямось.

Покштязо-бабазо Олянь ды аванзо эзть покорда зярдояк. Мекевлангт, ванстсть ды оймавтсть эйсэст. Зярдо жо шабра Мурзасто кавто эйкакш марто ськамонзо кадовозь цёрась сась аванзо чиямо, ильтизь паро ладсо. Максызь мартост Белянка скалонть, кшикс товзюро, коцт ды понань суреть. Од тетя марто эрямось ульнесь, эряви меремс, аволь берянь, ансяк ялатеке аволь кода тиринсенть марто. Од сазортнэнь марто эрясть ояксчисэ. Вана сынь уш од тейтерть, сась шка мирденень лисемскак. Бабань чиявтызь Отяжбуень Селищав, Николай Иванович Сульдиннэнь (Тягайсянь Микольнень). Васня эрясть атявт-ававт марто, мейле каршо порядкасто рамасть а покш кудыне. Чачсь Ваня цёрынест, мейле – Нина тейтерькаст, бабам пешксесэль колмоце эйкакшсо, зярдо покштянь саизь Ине Отечественной войнав, те ульнесь 1942 иень якшамков, даволковсто чачсь Нюра тейтерькаст. Покштям воёвась Ленинградонь фронтсо, кудов велявсть ансяк 1946 иестэ. Нюранень уш ульнесть ниле иеть, сон тандадсь а содавикс цёрадонть ды оргодсь кинь трокс покштянстэнь, совась орта алга ды пиже-ожо вайгельсэ кармась пижнеме: «Миненек кодамо-бути атя сась!» Кода войнань шканть бабам ютавтызе колмо эйкакш марто – содыль ансяк сонсь. Ёвтниль, хоть тюремат минек ёнкссо арасельть, ансяк вачочись ковгак эзь теевкшне.

Сюкпря Пазонтень – ванстовсть эйкакштне. Уш войнадо мейле кудораськесэнть чачсть эштё колмо эйкакшт, кавто цёрат ды тейтерь. Покштям эрясь аволь кувать. Тевелявозонзо педясь стака орма, ды 1975 иестэ сон кулось бабань кедь лангс. Эйкакштне уш покшольть, ансяк веженсесь, Таня, тонавтниль университетсэ, 3-це курссо. Бабам свал ледстнесь, школав промксос свал савкшныль якамс эстензэ, зярдо жо промкс пурныль Танянь классонь ветицясь, покштям мериль: «Молян монсь». Мельспаросо кунсолыль, кода тонавтыцятне шныть тейтерензэ, кудов самодо мейле валозо ульнесь вейке – молодец! Пек каштанчисэ аштесь, зярдо Татьяна кармась тонавтнеме университетсэ.

Бабам свал ульнесь Пазнэнь пек кемиця ломанекс. Школасо сонензэ кувать превть пурнамс эзь саво, кенерекшнесь ансяк тонавтнемс алфавитэнть, а валт букватнестэ ладсеме а маштыль. Ялатеке содыль пек ламо озномат, конатнень весе кирдсь мельсэнзэ. Тонавтниль сынст истя, кода мариль. Весе тевтнес кундыль конязонзо крёстонь теемадо мейле. Эрямонзо алтызе васня эйкакшонстэнь, мейле – нуцьканстэнь, конатнеде 9. Кенерсь озямс нуцькань кавксо эйкакш мартояк (ней эйстэст седе ламо). Течинь чис, кодамояк тевс кундамсто, эли ломаннень пшкадемстэ свал васняяк превезэнь сы мель: «А кода бу тень теевлизе бабам?» Сон монь туртов свалшкас кадови алкуксонь авань паро невтемакс. Нейгак, зярдо уш эстень 40-де ламо иеть, сон монень пек а сатны. Велев самсто, чаво кудонзо вакска ютамсто седеем «зуйк» теи. Уш сыредезь, свал аштиль озадо вальма вакссо ды училь самот. Валдо вейке нупальс кудынезэ свал пешксель каткалапа цецядо. Пецька вакссо, покштянь теевть стул лангсо, удыль колмо тюсонь Мурка катказо. Ламо бу максовлинь велявтомс куш аламошкас се шкантень.

Лина Сульдина
Артовксось Елена Мангилевань

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».