Пятница, марта 29, 2024
Важное

Истямо лем ало январень 19-це чистэ А.С. Пушкин лемсэ Раськень библиотекасо ютавтозель Регионъютконь литературной конференция, кона алтазель Мордовия Республикань народной писателенть А. М. Доронинэнь чачома чистэ саезь 75 иетненень.

Сонзэ анокстызь библиотекань раськень ды краеведениянь литературань отделсэ важодицятне. Васенце арсематне ульнесть конференциянть ютавтомс Покш Игнатбуесэ, косо чачсь-кассь сёрмадеесь (сон чачсь 1947 иень январень 7-це чистэ Петровка велесэ). Ансяк меельце читнестэ стакалгадыця кезовонть кувалма савсь ютавтомс сонзэ онлайн-лувсо.
Тень лангс апак вано, конференциясь ютась келейстэ ды лезэвстэ. Эйзэнзэ пурнавкшность учёнойть, сёрмадейть, вейсэндявксонь прявтт, библиотекасо важодицят, тонавтыцят, вузсо ды школасо тонавтницят.

Конференцияв пурнавозтне васня теезельть содавиксэкс А. М. Доронинэнь шкинеманзо марто. Эрямонзо перть писателесь кенерсь нолдамо аволь вейке книга. Сынст ютксо кода валморонь пусмот («Чачома ёнкс» (1972), «Од порань валдо» (1984), «Велев кись юты седейгам» (1988), «Родословное дерево» (1992), истя жо ёвтнемань пусмот, ков совасть покш жанрань произведенияткак. Неть – «Кинть ютасы молицясь» (1994), «Баягань сулейть» (1996), «Кузьма Алексеев» (2001). Седе тов, 2009-2014 иетнестэ, лиссь сонзэ вете томсо пусмозо, ков совасть кочказь произведениянзо. Весе неть книгатне ванстовить А. С. Пушкин лемсэ раськень библиотекасо, косо писателесь ульнесь сеедьстэнь инжекс. Тосо ютасть ловныцятнень марто ламо вастовоманзо, книгань презентациянзо.

Кортыцятне тешкстызь, кодамо покш путовкс А. М. Доронин тейсь эрзянь-мокшонь литературантень. Произведениянзо седеяк тёкшс кепедизь минек литературанть, теизь сонзэ седеяк келеекс ды сюпавокс. А стяко ламотне эйстэст совасть вузонь ды школань программатнес. Пек ламо шка сынст тонавтомаст туртов максови М. Е. Евсевьев лемсэ МГПУ-нь филологиянь факультетсэяк. Теде пачтясь филологиянь наукань кандидатось, М.Е. Евсевьев лемсэ МГПУ-нь тиринь келень ды литературань кафедрань доцентэсь С. Н. Маскаева.
Кодамо питне кандыть А. М. Доронинэнь произведениянзо, кодамо кельсэ сынь сёрмадозь, ёвтнесь МР-нь Правительстванть юрсо Гуманитарной наукань НИИ-нь наукань прявт сотрудникесь Л.А. Гурьянова.

А. М. Доронин, кода ламо лия сёрмадыцятнеяк, шкинемань тёкшс кинть ушодызе «Эрзянь правда» газетасто. А.М. Горький лемсэ Литературной институтонть прядомадо мейле (1973 ие), зярыя шка ульнесь те газетань собкорокс. Кодамоль сон, кода журналист, кода ломань, савсь неемс моненьгак. Теде ловнодо седе тов.
«Сятко» журналсо прявт редакторокс улема шкась А. М. Доронинэнь туртов сехте кувакаль (1984 иестэ саезь 2000 иенть самс). Сонзэ пингстэ журналсонть теевсть ламо паро лиякстомат, сюпалгадсь од сёрмадыцянь произведениясо. Теде ёвтнесь журналонь ответственной секретаресь М. Левщанова.

Покш Игнатбуень боевой славань музеень прявтось Н. И. Макаров конференциясо улезтнень содавтынзе экспонаттнэнь марто, конат ёвтнить А. М. Дорониндэ.
Романтнэнь сёрмадомсто писателентень савкшнось ламо важодемс Нижегородской ёнксонь архивтнесэ. Теде ёвтнесь Нижегородской ёнксонь «Лисьмапря» эрзянь-мокшонь раськень Автономиянь прявтось М.К. Холодова.

«А. М. Доронинэнь «Кочкодыкесь – пакся нармунь» романсонть нравственно-этической проблематне, лиризмась, психологизмась, теориясь ды практикась» – неть кевкстематнень кепединзе эсензэ кортамосо М. Е. Евсевьев лемсэ МГПУ-нь филологиянь факультетэнь 4-це курсонь студентэсь Николай Кияткин.

А. М. Доронинэнь кой-кона валморонзо коряс ладсезь морот, конатне ней морсевить эрьва косо. Кавтотне эйстэст гайгсть конференциянть молемстэ, мезесь седеяк мазылгавтызе ды лембелгавтызе вастовоманть.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».