А. С. Пушкин лемсэ Раськень библиотекасо ютась «Эрзянь оймем панжса келес…» лементь ало регионъютконь онлайн-конференция. Сон алтазель эрзянь прозаикенть, МР-нь заслуженной поэтэнть, Россиянь Писателень союзс совицянть Числав Журавлевонь чачома чистэнзэ саезь 90 иетненень.
Эрзянь поэтэсь чачсь 1935 иень апрелень 27-це чистэ (те ульнесь Инечи) Самарань областень Похвистнева буень Покш Толкан велесэ. Тосо те шкас эрить малавиксэнзэ, содыцянзо. Сон чачсь се енкссонть, косо эрзянь литературась сюпалгадсь истямо лемсэ, кода: Т. А. Раптанов, В. К. Радаев, А. М. Моро, С.М. Люлякина, М. А. Втулкин.
Вастовомантень пурнавозтненень лембе вал марто пшкадсь Эрзянь ды мокшонь раськень регионъютконь Исполкомонь прявтось Татьяна Ларина:
– Числав Григорьевичень парсте содылия. Мон важодинь радиосо тесэ, сон – радиосо Самарасо. Ульнесть вейсэнь передачанок. Те шкас вансттано сонзэ вайгелензэ. Книганзо пек вадрят, чарькодевицят, шождасто ловновицят.
А. С. Пушкин лемсэ библиотекань национальной ды краеведениянь литературань отделэнь важодицятне Н. В. Бочканова ды В. Б. Бояркина анокстасть Журавлевонь книганзо выставка, пачтясть поэтэнть творческой эрямо кидензэ, ловность стихензэ.
– Числав Григорьевич чевте седеель, ломанень вечкицяль, лиянь кисэ мелявтыцяль, эрзянь келенть пек вечксь, ризнэсь кувалманзо. Ульнинь кедьсэнзэ инжекс Самарасо, натой якинь «Радио-7 из Самары» радиостанциянть панжомо. А кодат книганзо парт! Нурька стихтне пешксеть превей арсемадо. Кавто строчкасо маштсь евтамо виев мельть. Койсэнь, истят ломанть чачнить сядо иес весть. Минь аштетяно кувалманзо каштанчисэ, – кортась МР-нь культурань заслуженной роботникесь Раиса Щанкина.
Сонзэ валонзо поладынзе МР-нь заслуженной поэтэсь Геннадий Гребенцов. Ледстнесь, кода вейсэ ардтнесть эрзянь велетнева ды вастневсть ломантнень марто.
Вастовомасонть видео вельде сюлмавома ульнесь Покш Толкан велень библиотеканть марто, конань прявтсо Галина Шишкина. Сон евтнесь, сынст велесэ малав эрьва кудосо улить поэтэнть книганзо. Вейке юбилеензэ тешкстасть велень клубсо, Числав Григорьевич усксесь казнекс ламо книгат. Мелят Похвистневань районост тешкстась 95 иетнень, тосояк казсть книганзо. Библиотекась ютавты Журавлевонь ловномат.
Мельспароль неемс ды марямс Покш Толканонь эрицятнень. Вастовомантень сакшнось поэтэнть ялаксозо Николай Григорьевич.
– Числав Григорьевичнень ульнесть 14 иеть, кода мон чачинь. Сон тонавтымим явомо мель спортонтень, ульнесь тень эрямосо эталонокс эрьва мейсэ. Тей, сонзэ тиринь енксов, пачколесть эрзянь ламо содавикс писательтне, неизь, косо чачсь ды кассь поэтэсь. Сюкпря, пурныде истямо ледстнемань чокшне, – ледстнесь лелядонзо Н. Г. Журавлев.
Мазый морот казсть Покш Толканонь «Чуди лей» ды минек «Ламзурь» ансамблятне.
Московсто мартонок сюлмавсь поэтэнть церазо Алексей Вячеславович, сон евтась сюкпрянь валт тетянзо лемензэ а стувтоманть кисэ.
Числавонь эйкакш пингезэ ютась покштянзо ды сырькаензэ кедьсэ. Тетязо, Григорий Алексеевич, ды авазо, Наталья Григорьевна, кастсть кото эйкакшт. Тетязо пингензэ перть важодсь шоферэкс, авазо топавтсь паксянь ды кудоютконь эрьва кодат тевть. Сынь ульнесть моронь вечкицят, вайгелест пек мазыельть.
Стихень сермадомо ушодсь ветеце классо тонавтнемстэ. Васенце тонавтыцязо ульнесь эрзянь поэтэсь В.К. Радаев. 1950 иестэ Числав кармась тонавтнеме Вишка Толканонь педучилищасо, косо таго вастовсь В.К. Радаев марто. Сон тосо ветясь литературань куро. Училищанть прядомадо мейле Числав сонсь тонавтсь эйкакшт. 1954–57 иетнестэ служась армиясо. Мейле 12 иень перть важодсь Магадан енкссо стака атлетикань коряс тренерэкс, бортрадистэкс. 1967 иестэ велявтсь Самарав. Важодсь физкультурань тонавтыцякс, тренерэкс, спортонь судьякс. 1975 иестэ прядызе Волгоградонь физической культурань институтонть.
1990 иестэ Числав Журавлев ульнесь сеть васенце ломантнень ютксо, конат пурнызь «Масторава» Самарань областень эрзянь-мокшонь вейсэндявксонть. Зярыя иень перть ветясь эрзянь кельсэ передачат «Радио-7 из Самары» ламо раськень радиосонть. 1996 иестэнть саезь – Россиянь Писателень союзонь член.
Поэтэсь ламоксть ульнесь эрзянь велетнесэ, косо ломантне свал вастсть эйсэнзэ лембестэ. Перьканзо чарасть кода эйкакштне, истя покш ломантнеяк. Сон эрьванть марто муиль кель-вал, кортыль чевтестэ, седейшкава, прок паро ялга. Сцена лангсто ловныль стихензэ. Казиль книганзо, сермадыль паро валт. Журавлевонь стихензэ лангс сермадозь зярыя морот, сынст морыть Самарань ансамблятне ды ськамост морыцятне раськень кенярксчитнесэ.
Меельце шкастонть поэтэсь кундакшнось нурька стихень сермадомо. Эрзянь поэзиясо те од енкс. Косто сась те мелесь превзэнзэ, паряк, ансяк сонсь Пазось соды, ансяк тейсь поэтэсь видестэ, ушодсь нурькинестэ домка арсемань евтнеме. Мезть сепомс, кувака стихтне аволь свал кадновить мельс, а вана нурькинетне, валмеревкс, содамоевкс ладсо, аштить превсэ, кельпрясо. Сонзэ ловномсто мелеть а моли: пейдезеват, арсезеват, кой-косо дивазеват, вай, кода видестэ евтазь! Стихензэ валдот, превейть, мазыйть, лембеть...Кой-кона стихтнень ютавтсь рузонь кельскак. Числав Григорьевич нолдась кеветее книгат.
Меельце иетнестэ Ч. Г. Журавлев эрясь Московсо церанзо кедьсэ. Тосо эрямстояк сон сакшныль «Эрзянь вайгель» общественной вейсэндявксонь кенярксчитнес. Поэтэсь тусь эрямосто 2018 иень августонь 18-це чистэ, калмазь Московсо.
Татьяна Маторкина