Понедельник, августа 15, 2022
Важное

Ефимия Петровна Кривошеева, чачозекс Адамова, чачсь 1867 иень аштемковонь 1-це чистэ Саратовань губерниянь Петровской уездэнь Пылковской волостень Тарасовка велесэ.

Чачсь сон сокицянь-видицянь кажовчисэ эриця семиясо. Вишка пингстэ саезь, кода ульнеськак истят семиятнесэ, тейтерькантень савсь варчамс, мезе те истямось кажовчинь стака уцяскась. Васня лездась покштненень кудоютконь тевсэ, мейле сиведекшнесь сюпавнень. Важодеме якиль Равонть томбалев, сядот вайгельпень тарка. Школадонть арсемскак эзь савкшно: сёрмантень мокшэрзятне тонавтовомо кармасть ансяк Ине Октябрянь революциядонть мейле, эдь кезэрень шкатнестэ тиринь кельсэ школат арасельть ды тонавтома эзь ветяво.

Истя эрясть ламот. Ансяк Ефимиясо ульнесь лиятнень эйстэ явовтыця ёнкс: содась сон раськень пек ламо морот, ёвкст ды ёвтнемат ды маштсь сынст парсте морамо ды ёвтнеме. Мейле сонськак кармась ладсеме морот-ёвтамот. Вейкеяк буква эзь сода, тонавтнемась кажов семиясто тейтеренть туртов ульнесь а топавтовикс бажамокс. Секскак Ефимия превсэ кирдсь весе сень, мезенть арсизе. Ды весть эсь арсевть моротнень ды ёвкстнэнь пачтямсто редизе, ломантне вастызь сынст, прок истя эрявияк. Истя ладявськак. Истя жо Ефимия кармась содавикс эсь лайшематнесэ. Кезэрень шкатнестэ ломаненть эрямосо весе покш тевтне, седе пек эрзятнень ды мокшотнень, мазылгавтовсть кодамояк койсэ, улезэ те эйкакшонь чачома, урьвакстома эли эрямосто туема. Ды бути кенярксов тевтне эзть веше истят моротнень топавтыцятнень пельде седеймарямо, нусманятнень ульнесь эсь явовтыця ёнксост. Ды ломантне кармасть редямо, Ефимия истя лайши кулозенть велькссэ, мерят, ильти эсь малавикс ломанензэ. Ды ушодовсь се шкась, зярдо Ефимия теевсь содавикс лайшицякс ды кармась покш инжекс весе свадьбатнесэ, лемдематнесэ ды калмамотнесэ.

Мейле Ефимия вастызе эсь уцясканзо – Пётр Кривошеевень. Алкуксонь фамилиязо сонзэ ульнесь Стесин. Кривошеев фамилиянть жо раськентень казизе А.С. Пушкин. Ульнесь те истя. Сеть шкатнестэ, зярдо Александр Сергеевич пурнась материал Пугачёвонь каявомадо, сон теевсь содавиксэкс ямщикенть Иосиф Стесин марто. Поэтэнть мельс Иосиф тусь сеньсэ, што содась пек ламо раськень морот, кода рузокс, истя эрзякс, ёвтамот ды легендат, скрипкасо налксемасо. Ламо шка Пушкин ютавтсь ямщикенть марто ды сёрмадсь мельганзо сень, мезе тонась ёвтнесь ды морась. Туемадо икеле Александр Сергеевич вешсь Иосифень топавтомс вейке налксема: тарантасос кильдезь лишме лангсо кирнявтомс кирвазтезь олготнень велькска ды истя, штобу а киртамс Пушкинэнь прясто вейкеяк черь. Иосиф Стесин топавтызе те меленть. Ёвтнематнень ды эсь мелень топавтоманть кисэ поэтэсь казизе ямщикенть вете целковойсэ, мезесь сеть шкатнестэ ульнесь пек ламо, ды дарственной сёрмадовкс ды автограф марто эсь портретэнть. Неть ярмактнень лангс семиясь стявтсь кудо, портретэнть жо седеймарязь ванстсть. Весть жо хуторсонть, косо эрясь Стесинтнэнь семиясь, лиссь кирвазема ды палсь весе хуторось. Палсь портретэськак. Мейле Ефимия Петровна ёвтнекшнесь, сонськак некшнизе портретэнть. Истя жо Александр Сергеевич алтакшнось Иосифнень вешемс эстензэ ды семиянзо туртов вольной. Тевесь сеньсэ, Иосифень ульнесь лиятнень эйстэ явовтыця ёнкс, чирьгадозь кирьгазо. Александр Пушкин тень кисэ раськентень макссь фамилия – Кривошеевть. Иосиф тень лангсо пейдезевсь. Ансяк кодамо ульнесь абунгадома семиясонть, зярдо сась конёв, конась пачтясь олякстомтомадонть ды фамилиянть полавтомадо. Истя ладявськак, Стесинтнэ кармасть Кривошеевекс.

Пётр Кривошеев, кона Иосифнень савсь нуцькакс, кармась кузнецекс. Те ульнесь пек сэрей ды виев ломань, чевте седей. Сонзэ лемдизьгак – Маяк-Петя, лездыль весенень, кие пшкадиль. Кривошеевтнень семиясо прявт ёнксокс ульнесь чевтеседейчись. Ефимия якиль сэредицятнень мельга ды свал лездыль шабратненень.
Ефимиянь ды Пётр Кривошеевтнень семиясо чачсь 11 эйкакш, кадовсть жо ансяк ниле, сисемтне кулость вачочиде ды орматнеде. Ды авань ризксэнть Ефимия весе невтизе «Как мне горе свое выплакать?» лайшемасонть.

1918 иестэ кулось Ефимия Петровнань Пётр мирдезэяк. Сонзэ куломадо мейле авась эрясь эйкакштнень кедьсэ, лездась кудоютконь тевтнесэ. Ефимия ды Пётр Кривошеевтнень ульнесь покш мелест тонавтомс эйкакштнень. Ды те мелесь топавтовсь. Покшось, Никифор, кармась содавикс врачокс, Сталинэнь премиянь лауреатокс, Кривошеевтнень медицинань династиянь ушодыцякс, конась лови содавикс врачонь уш ниле поколеният. Иван кармась математикекс, Александра тейтерест кочкизе партийной кинть, а вана Илья поладызе аванзо ёрокчинть, кармась эрзянь сёрмадомань поэзиянь ушодыцякс.

А стяко кортыть, алкуксонь поэтэсь, раськень культурань алкуксонь морыцясь сонськак ютасынзе весе стакачитнень. Истя Ефимия Петровнаяк явинзе весе стакачитнень мокшэрзянь раськенть марто. Весементь сон кирдизе: сиведезь важодемань стакачитнень, кажочинь сэпенть, вачочиде эсь эйкакштнень куломанть, стака важодемадонть мирдензэ куломанть, вандынь чинтень акемеманть. Ансяк мезеяк эзизе синде сонзэ эрямонтень вечкеманть, вадрянтень кемеманть ды эсь раськень культурантень мелень явоманть.

Сонзэ ёвтнематнень весе сёрмадсь цёразо – Илья Петрович. Аванзо пельде эсь раськентень вечкеманть саезь, Илька-Морыцясь (поэтэнть псевдонимезэ) сёрмадынзе, ванстынзе ды пачтинзе ломантненень аванзо ламот ёвтнематнень. Неть произведениятне пек лездасть Илья Петровичнень ды лиятненень мокшэрзянь васенце литературанть теемасо.

Ефимия Петровна маштсь вейсэндямс фольклоронь койтнень художественной валонь пачтямонь од ёнкстнэнь марто. Мазый моротне ды ёвтнематне чачильть майсезь, секскак сынь пештязь седейризкстэ. Ульнесть шкат эрзянь раськентькак, зярдо эзь мереве морамс тиринь кельсэ, кортамс, зярдо сон стувтовиль, виздильть эйстэнзэ, эрзятнень культураськак ёмамо лангсоль. А эдь эрзянь раськенть истят мазыйть моронзо, истят вадрят ды тонавтыцят легенданзо.

Ефимия Петровнань шкинемань тёкшокс кармась «Плач о Кирове» произведениясь. Сергей Миронович Киров – советэнь шкань политической деятель. Ды пачтясь ланганзо сказительницась секс, што пек вечкилизь ломантне. «Плач о Кирове» лайшемась сырнень буквасо тешкстави Киров лемсэ Ленинградской музейсэ ды совавтозь масторлангонь фольклористикань сырнень фондс.

Кулось Ефимия Петровна 1936 иень аштемковонь 24-це чистэ. Кудосонть, косо сон эрясь меельце иетнестэ, ладязь мемориальной лаз. Сказительницанть покш мелекс ульнесь неемс эсь произведениятнень марто книганть. Ансяк нолдазель сон куломадонзо мейле иень ютазь.
Меельцекс ули мелем ёвтамс, штобу истят лемтне авольть стувтово, эдь сынь аштить раськень культурань фундаментэкс. М.Е. Евсевьевень, И.М. Яушевень, С.Д. Эрьзянь, ялакстнэнь Рябовтнень ды Мордовиянь культурань, наукань ды образованиянь лия содавикс ломантнень лемест улест свал марявикст, штобу лангаст содавольть од ломантне ды аштевельть кисэст каштанчисэ.

Анжелика Горбунова,
Россиянь писателень союзонь член,
Е.П. Кривошеевань нуцьканзо эйкакш
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».