Россиянь МВД-нь «Лямбирский» ММО-нь дежурной частев пшкадсь 28 иесэ юрист, конась ашти эйкакш марто отпусксо.

Од авась полицейскойтненень евтнесь, келя, неть читнестэ сонензэ гайневтсь а содавикс ломань, конась евтызе прянзо социальной фондонь важодицякс ды пачтясь важодемань стажонть одс ванномадо, мезенть туртов эряви СНИЛС-нь номерэзэ. Седе мейле, кода тейтерьавась сонзэ евтызе, телефонозонзо сась пачтямо, Госуслугасо личной кабинетэзэнзэ кие-бути совась. Те мелявксонть витемга меревсь гайневтемс максозь телефононь номерэнть коряс.
Госуслугатнень специалистэкс прянзо евтыцясь кемекстызе личной кабинетс совамодо тевенть ды мерсь сюлмавомс Центробанконь сотрудникенть марто, эдь мошенниктне снартнить саламс таштазь ярмактнень. Банконь важодицясь аванть кевкстизе улиця счеттнэнь коряс ды кудосо ванстовиця ярмактнеде. Седе тов кортамось поладовсь буто Следственной комитетэнь важодицянть марто. Тонась мерсь, келя, ярмактнень седе куроксто декларировамат, лиякс сынь кармить лововомо экстремистской тевень коряс получазекс, эсензэ аванть лангс жо панжить уголовной тев.

Те тевденть авась евтнесь мирденстэнь. Вейсэ сынь саизь кудосо ванстовиця 455 тежат целковойтнень ды, манчицятнень кармавтомаст топавтозь, путызь сынст «безопасной счетс». Седе, што манизь, чарькодсть зярыя часонь ютазь, веть. Валске марто тейтерь-авась пшкадсь полицияв. 

Мельвановикс эрицят! Содадо, «безопасной счетт» арасть. Бути тыненк гайневтсь а содавикс ломань ды евтась максомс эсь ярмактнень ванстоманть туртов, куроксто лоткавтынк телефонсо кортамонть. Зярдояк киненьгак илядо евта эсь персональной даннойтнень, банконь картань кодтнэнь, СНИЛС-нь номерэнть.