Вторник, марта 19, 2024
Важное

Эрьва иенть самозо канды минек эрямос од ёнкст ды полавтомат. 2021 иесь а явови лиятнень эйстэ. Течи тыненк ёвтнетяно, кода полавтовить лавкасо питнетне ды ЖКХ-нь тарифтне, кинь туртов касыть налогтне, кода карми лововомо МРОТ-сь ды мезе эштё учи Россиянь семиятнень, сыре ломантнень, госслужащейтнень, офиссэ важодицятнень ды весень лиятнень.


✅Путовить ливкст ковидтэнть

2021 иестэ Россиясо кармить тееме вакцинат коронавирусонь кезовдонть. Семс сон путневсь ансяк врачтнень, тонавтыцятнень, социальной сферасо важодицятнень ды сетнень туртов, кить важодить ламо ломань марто.
Вакцинациясь карми ветявомо мелень коряс ды ярмактомо. Зярс ливксэсь тееви ансяк вейке «Спутник V» препаратсонть. Вакцинанть лезэвчизэ тешкстави 95 процентсэ.

✅Касыть питнетне иредстиця симемапельтнень ды таргамопельтнень лангс


2021 иестэ таргамопельтнень лангс акцизтнэнь касомась редяви инфляциядонть седе ламо ды карми 20 процентт. Истямо закон кемекстазель уш ютазь иень сёксня.
Истя, налогонь законодательствасо полавтоматнень коряс, папиросатнень ды сигаретатнень лангс те иестэ акцизэсь тёжатнень кисэ касы 2359 целковойс, вейпнэнь ды электронной сигаретатнень – 60 целковойс вейкенть кисэ.

Финансонь министерстванть ванкшноманзо коряс, акцизтнэнь касомась пачти таргамопельтнень пачканть питниямонтень 20 целковойс. Ведомствасонть тешкстыть, те тееви таргицятнень аламолгавтомга.
Теке жо законсонть кемекставить акцизтнэ иредстиця симемапельтнень лангскак. Сынь кастовить седе аволь пек – 4 процентс, инфляциянть коряс. Неть акцизтнэнь кемекстазь пек а кастомс, эдь масторсонть виевгавтыть виноградтнэнь кастомань ды винань теемань ёнксонть.
Теке марто 2021 иестэ Россиясо миевиця иредстиця симемапельтне, кода омбо масторонсетне, истя эсенектнеяк, кармить миевеме «Госзнаконь» башка маркатнень ало.

✅Коммунальной услугатне питниить

Эксперттнэнь ванномаст коряс, тедеде ЖКХ-нь услугатнень лангс питнетне касыть ниле проценттэ седе ламос. Кода свал, тарифтне кепедевкшнить ниле-кото процентс, ансяк ней, специалисттнэнь арсемаст коряс, ресурсонь максыця организациятне питнетнень кепедьсызь седе пек, штобу пекстамс 2020 иень ёмавкстнэнь.
Теке марто тарифтнень а мереви кастомс инфляциянь невтематнеде седе ламос. Секскак Минэкономикась алты питнетнень кастомс ниле-вете процентс.

✅Чиновниктне аламолгавтовить

Те иестэ Россиясо аламолгавтовить чиновниктне. Правительствань Постановлениянть коряс, федеральной министерстватнень ды ведомстватнень центральной аппаратсонть важодицятне киртявить 5 процентс, территориальной органтнэсэ – 10 процентс.
Арсеви, те лувось вадрялгавтсы госаппаратонть важодеманзо. Весе неть тевтнень кемекстазь прядомс чадыковонь 1-це чинтень.

✅IT-компаниятнень туртов налогтне валгстовить

2021 иестэ ушодсы важодеманзо законось IT-отраслясонть налогонь пандоманть коряс. Сонзэ лувсо арсеви прибыленть лангс налогонть 20 % валгстомс 3 %. Страховой пандоматне валгстовить 14 процентстэ 7,6 процентс. Налогонь од ставкатне алтавить бизнесэнтень, конань доходонь 90 проценттнэ ютыть программной обеспечениянь ды сонзэ анокстамонь коряс услугатнень миемадонть.
Документэсь истя жо полавты ПО-нь миемань лангс нулевой НДС-нть. Ней льготась максови ансяк сеть компаниятненень, конат совить софтонь нолдыцятнень башка реестрантень.

Сюпавтне кармить пандомо седе ламо

13 процентстэ саезь 15 процентс касыть налогонь ставкатне сетнень туртов, кить иезэнзэ получить вете миллиондо ламо целковойть.
Сёксня примазь законсонть ванновить зярыя явомат. Истя, икелень 13 проценттнэ кадовить эсь ули-паронь миеманть лангс, ды истя жо страхованиянь ды пенсионной топавтомань договортнэнь коряс пандоматнень получамга. Теке шкасто НДФЛ-нь кепедемась токасы ансяк вете миллиондо седе покш сумманть.
Сеть ярмактне, конатнень казнась карми получамо сюпавтнень налогост вельде, кучовить чуросто вастневиця ормасо сэредиця эйкакштнень лецямонть лангс.

Авань капиталось кепедеви

2021 иестэ 3,7 процентс кастови авань капиталось. Васенце эйкакшонть лангс пандомась кепедеви 466617 целковойстэ 483882 целковойс, омбоценть лангс – 616617 целковойстэ 639432 целковойс.
Теке шкасто, бути семиясь уш получакшнось авань капитал васенце эйкакшонть лангс, омбоцентень пандоматнень покшолмась карми 155550 целковойть.
Ярмактнень мереви нолдамс эсь эрямонь условиятнень вадрялгавтомантень, эйкакштнень тонавтомантень, аванть пенсиянзо пурнамонтень, эйкакштнень-инвалидтнэнь социальной адаптациянть лангс ды истя жо омбоце эйкакшонтень эрьва ковонь пандоматнень лангс. Теке марто 2021 иестэ саезь авань капиталонь ярмактнень мереви ютавтомс садовой участкасо эрямо кудонь теемантень.

Пенсиятне истя жо кастовить

Якшамковонь 1-це чистэ а важодиця пенсионертнэнь туртов 6,3 процентс кепедевсть страховой пенсиятне. Пандоматнень средней покшолмась кармась 17 444 целковойть.
«Те кепедемась малав кавксть ютасы инфляциянть – сон учови 3,7-4 процентт. Пенсиясь косо-бути касы тёжа целковойс», – тешкстызе Федерациянь Советэнь Социальной политикань коряс комитетэнь прявтонь полавтыцясь Елена Бибикова.
Те иень чадыковонь 1-це чистэ 2,6 процентс кастовить социальной пенсиятне.

МРОТ-сь ловови лиякс

Тедедень якшамковсто саезь важодемань кисэ минимальной пандоматне кармасть лововомо од лувсо. Икеле те теевиль потребительской корзинанть коряс, ней жо карми лововомо медианной доходонть эйстэ (суммастонть, зярдо пелест эрицятне получить седе ламо, пелест – седе аламо). МРОТ-нть кемекстазь ладямс 42 процентт медиананть эйстэ. Истя, 2021 иестэ сон касы 5,5 процентс ды карми 12 792 целковойть.
Эрямонь минимумось карми 44,2 процентт ютазь иень медиананть эйстэ. 2021 иестэ сонзэ покшолмазо тешкстави 11 653 целковойть.

Важодемань од ёнкстнэ кемекстазь законсо

2020 иенть прядовомсто примазель удалённой важодемадо закон, конась тевс нолдазель тедедень якшамковонь 1-це чистэ.
Документсэнть ванновить истят ёнкстнэ, кода дистанционной (удалённой) важодемась, нурька шкас дистанционной важодемась ды комбинированной дистанционной важодемась. Васенценть юрсо кирдеви свалшкань робота аволь важодема таркасо договоронь коряс, омбоцесь – истямо жо робота, шкань ванноматнень коряс, колмоцесь – удалёнканть ды офиссэ важодеманть човорямось.

Теке марто, бути улить кодаткак тувталт (коронавирусонь кезовось), прявтось ютавты весень удалёнкас сынст мелест апак кевксте. Ансяк тень лувсо компаниясь важодицянтень максы эрявикс оборудования. Удалёнкась а ловови зарплатань валгстомань тувталокс.
Законтнэсэ кемекстазь эштё ламо лия полавтомат, конат токить оршамотнень маркировканть, гостиницатнень важодемань правилатнень, важодемань конёвонь книжкатнень, ламо квартирас кудотнесэ эрицятнень туртов од совавтоматнень ды эштё ламо лия мезенть. Шкась невтьсы, кодамо ёнов неть од совавтоматне полавтсызь минек эрямонок.

Анокстызе Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».