Воскресенье, февраля 28, 2021
Важное

Эсень чачома веледе (те – Кочкурбуень Сабаевась (Сурвелесь)) книганть сёрмадомсто ламо савсь кевкстнемс ломанть, вешнемс фотографият, конатнесэ улевель невтезь, кодамоль минек велесь ютазь шкастонть.
Ламо фотографиятне эйсэнь аволь ансяк дивавтнесть, сынь лездасть седе ламо содамс седе, кода эрясь велесь седикеле, мейсэ сон сюпаволь, кодат лиякстомат теезельть икеле, мезесь полавтовсь ней. Сеске мерян, велесь икелень коряс неявиксстэ полавтовсь. Ансяк полавтовсь ламонь таркава аволь паро ёнов. Арасель мелем таго налкставтомс эйсэнк секеть арсематнесэ, конатне умок пицезь пицить седеем сень кувалма, кода сельме икеле кири ды чуролгады чачома велем (таго-зярдо 5 ды седеяк ламо тёжат эрицятнень эйстэ ней а пурнави вейке тёжаськак). Текентень пачкодсть ламо лия велетнеяк. Ансяк ялатеке кодаяк а ютават тень вакска. Ды кода иля снартне, пряпотстонть а ёртови вейкине кевкстемась: «Мекс истя лиссь? Мекс велетне кармасть чамомо?»

Весемеде пек велесь кармась чамомо, зярдо кармасть каладомо колхозтнэ. Минек велень колхозонть, кона кандтнесь Ленинэнь лементь, каладомадонзо мейле пекставсть животноводческой зярыя фермат, косо трясть скалт, тувот, саразт. Колхозонь фермасо ды паксясо важодемадонть башка ломантненень икеле ульнесь ков молемс лия таркав: вальцовочной ведьгевев, пилорамав. Колхозонть ульнесть техникань аштема эсензэ гаражонзо, зёрнань ванстома складонзо, зёрнань ванськавтома комплексэзэ, асфальтсо вельтязь тингезэ. Велень куншка куросо аштесть школась, эйдень кужось, милициянь кудось (велесэнек ульнесть зярыя участковойть), кшинь панема кудось, сельмагось, почтась, клубось. Эйстэст кадовсть ансяк школась, почтась, клубось. Сон ней витневсь «Культура» национальной проектэнть коряс – (ред). Лиятне – кавто этажсо кудось, косоль эйдень кужось, милициянь кудось – калавтозь. Пекарнясонть ней панжозь ознома кудо. Ашо кирьпецень кудось, косоль сельмагось, веленть куншкасо ашти кенкштеме ды вальмавтомо.

Каладсь се кудоськак, косо панжозель музей Александра Петровна Лавровскаянь лемс. Те ломанесь весе эрямонзо, ловт, максызе Сабаева велень школантень, 60 ламо иеть тонавтсь эйкакшт, макссь тенст содамочить.

Кадызь ды ёмавтызь умарьпирентькак, косо кассть умаринат, лия чувтот ды куракшт. Сынст мельга яксеме теезель цела бригада.
Секе шкастонть кармасть пекстневеме производствань лия таркатне ды социальной учреждениятне. Сындест минек велесэ ульнесть аволь аламо. Ве ёно аштесть зярыя предприятият: пенькозаводось, райпромкомбинатось (эйсэнзэ нолдасть чувтонь парть, ящикть, левштапт), лесничествась. Масторонок келес содавиксэкс ульнесь пухонь-толгань фабрикась, косо тейсть тодовт, лиякс сонензэ мерильть «пух-пера». Сонзэ ансяк вейке цехсэ важодсть зярыя кементь ломанть. Седе тов арсесть панжомс седеяк ламо цехть, козонь савольть важодеме 700-800 ломанть. Фабриканть эйстэ аволь васоло аштесь кирьпецень заводось, косо эзть сатно роботыцятнеде, тердтнесть натой покш класстнэсэ тонавтницят.

Неть предприятиятнень, кода телевизионной заводонь цехентькак, таркасо арась мезеяк. Та-кить калавтнизь ды эсест ланга явшизь яжазь-тапсезь кирьпецтненьгак.

Ней велесэнек ламо кудотнень рамсизь дачань таркас. Секс ломанде пешкели ансяк кизна. Тельня ютат куринкава, пеледест ламо кудотнень ёнов а неят ломанень эскельксткак. Школанть, ков икеле якасть тёжадо ламо тонавтницят (нилень-нилень класст ды эрьвасонть ниленьгеменде ламо эйкакшт ульнесть), учи истямо жо уцяска, кодамо стардынзе ламо лиятнень – пекстамось. Нейке уш васенце классос молиця эйкакштнеде эль-эль пурнавить кеменьшка. Те сеть велетнень ловозь, косто усксить эйкакшт тонавтнеме минек школас.

Кода ванстомс веленть? Кись вейке – эряви кепедемс велень хозяйстванть. Улезэ косо важодемс ломантненень. Велеськак вельми. Примерт, кода аграрной предприятиятнень вельде касыть-кемекстыть велетне, Мордовиясо ламо. Саемс Семилеенть, косо «Норовось», Отяжелень райононь Сабанцеленть, Покш Игнатбуень Ташто Чамзанть ды лиятнень. Паряк, киньгак вановтозо каяви минек Сабаеванть лангскак?

Раиса Щанкина.
Фототнень пурнамс ды теемс лездасть Н. Родионова, А. Данильчев (Саранск ош), В. Фомичев (Волгоград).
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».