Мордовиясо эрить панжадо седей, лездамо бажиця ломанть. Ды специальной военной операциянть ушодоманзо марто арась истямо веле, конань эрицятне а лездыть сеть таркатнесэ эсь службанть кандыця цёратненень. Сыренек-однэк снартнить теемс эсь путовксонть изнямонть туртов.
Эсь газетань лопатнесэ минь уш аволь весть ёвтнекшнинек аватнеде, волонтёртнэде, школатнесэ тонавтницятнеде, предприятиятнесэ ды организациятнесэ важодицятнеде, конатне пурныть гуманитарной лезкс, кодыть-анокстыть кекшемань алтымат. Те важодемась ветяви весе республиканть келес.
Аволь умок содавтынек Кочкуровань райононь Семилей веленть. Велень администрациясо эрямодонть ды тевтнеде кортазь, молинек Социальной центрав. Тесэ вастовинек велень ёроков аватнень марто, конатне кодасть кекшемань алтыма. Те тевенть Семилейсэ ушодызь малав сеске СВО-нть марто, роботыть эрязасто, бажить лездамс минек цёратненень.
Кода весемесь ушодовсь ды кода моли аватнень важодемась, миненек ёвтнесь Семилеень эрицясь, кекшемань алтыматнень кодыцясь Нина Фёдоровна Пивцайкина.
– Семилейсэ чачинь-касынь ды весе эрямон перть теске эрян. Ней уш 72 иеть тень. Роботамс савсь эрьва кодамо тевсэ: школасо воспитателекс 22 иеть ульнинь, эсенек велень хозяйствань предприятиясо – заправщикекс. Ней уш зярыя иеть пенсиясан, юткошкасто велень аватнень марто сакшнан Социальной центрав, кекшемань алтымат вейсэ кодатано. Цёратненень эряви куш кодамояк лезкс максомс, вейсэнь тевентень эсенек пельде куш вишка пелькске путомс, – ёвтни Нина Фёдоровна. – Монь эсень цёрам, Сергей Васильевич Пивцайкин, чавовсь Чечнясо. Тосо командировкасо ульнесь. Кемгавксово иеть уш ютасть. Нуцьканок, сонзэ цёразо, кочкизе тетянзо кинть ды кармась военноекс. Истя жо ульнесь СВО-нь таркатнесэ. Нама, сонзэ кисэяк седеесь ризны, весе лия цёратнень кисэяк, кие течи канды службанть.
Кода ёвтнесть аватне, кекшемань алтыматнень кодыть уш колмоце ие. Сакшныть эрьва чистэ, кинь зярдо шказо пры. Кодамонть туртов эрявиксэнть ускить Саранскойстэ волонтёронь штабсто. Ускить весементь аноксто: панкскетне керсезь эрявикс келень ды кувалмонь, тонгонек эйсэст сеткантень ды весе тевесь.
– Пек лезды тенек «Норов» компаниятнень группань прявтось Александр Ильич Поздняков. Самай сон весе тевентькак ушодызе. Пшкадсь аватненень, ёвтнесь, весе велетнева ды оштнева ломантне пурнавкшныть ды кодыть кекшемань алтымат, Семилейсэяк те тевенть эряви ушодомс. Эряви лездамс минек цёратненень – Тиринь масторонь ванстыцятненень. Ды тевесь ушодовсь. Эрицятне кармасть сакшномо, лездамо. Алтыматнень кодамонть туртов минек пек вадря тарканок – велень Социальной центрась. Сон покш, валдо, лембе, – ёвтни Нина Фёдоровна. – Сакшныцятнестэ седе ламот – пенсиясо ломантне. Центрасонть важодицятнеяк – васень лездыцянок. Истя жо кой-кить важодить кудосо. Истятнэнь ютксо минек велень эрицясь Индира Шамиловна Беззубова. Сон алтыматкак коды, цёратнень туртов носкаткак, сты трусат. Ютксонок улить, кинь цёраст военнойть, кинь нуцькаст, улить истят, кинь малавиксэст специальной военной операциянь участникть. Эрьва войнась – те пек стака ды зыянов тев. Ансяк те весемесь Тиринь масторонть ды эрицятнень сэтьмечист ванстомга.
Кекшемань алтыматнень кодамо свалшкане сакшныцятнень ютксо Людмила Геннадьевна Прокина, Светлана Фёдоровна Брыжинская, Надежда Ефимовна Фатькина, Людмила Александровна Литяйкина, Светлана Семёновна Позднякова, Надежда Андреевна Фатькина, Елена Анатольевна Биушкина, Нина Ивановна Кипайкина. Кода тешкстызь аватне, командась сынст вадря. Сакшныть весе малав эрьва чистэ.
Семилеень эрицятне покш мель явить гуманитарной лезксэнь пурнамонтеньгак. Почтасо теезь башка тарка, козонь эрьвантень мереви путомс мезеяк эрявикс цёратнень туртов. Кода лия таркатнесэяк, тесэ те тевсэнть башка мель явови ламо шкань перть ванстовиця ярсамопельтненень, шлямонь-нардамонь кедьёнкстнэнень.
Семилеень аватнень кедьсэ теезь эрьва алтымантень путозь ойме. Кода сынсь тешкстыть, эсь тевенть ушодыть Пазонтень озномасто, важодеманть пертькак озныть. Кадык кекшемань эрьва алтымась вансты минек цёратнень – сэтьмечинть кисэ тюрицятнень.
– Специальной военной операциянть эйстэ ве ёнов течи кияк эзь кадово. Веенст минек масторонть кисэ аштить тосо, лиятне, изнямонть малавгавтомга, весементь теить тесэ. Те минек весень вейсэнь тев. Ды лездамо карматано семс, зярс эряви, – кемекстыть аватне.
Юлия Еремина