Четверг, сентября 24, 2020
Важное


Панжиковонь 27-це чистэ «Россия – страна возможностей» президентэнь платформань «Моя страна – моя Россия» Весероссиянь XVII-це конкурсонь очной туронь пелькстыцятне невтизь эсь роботаст «Слово о моей стране» номинациясонть. Изницятнестэ вейкесь – Мордовия Республикасто Наталья Смирнова.


Московонь, Архангельскоень, Курскоень, Самарань, Волгоградонь ёнкстнэнь ды Мордовия Республикань од журналисттнэ жюринтень кучсть статьят, конат алтавить Россиянь территориятнень касомантень-виевгавтомантень. Наталья Смирновань, Ицялонь «Земля и люди» райононь газетань отделэнь прявтонть, «Свято место пусто не бывает» статьянзо эксперттнэ ёвтызь вадрятнестэ вейкекс.

«Труд велиненть лия ёнов а молиця историясь, косо сюлмавсь XVII-це пингесь ды советэнь шкась, колхозтнэ ды иневанькс лисьмапрясь, куломась ды эрямось – истя нурькинестэ можна тешкстамс «Свято место пусто не бывает» материалонь теманть. «Моя страна – моя Россия» пелькстамось – вадря тев ёвтнемс эсь тиринь ёнксонь таркатнеде ды получамс экспертэнь питне эсь роботантень», – ёвтни Наталья Смирнова.

«Моя страна – моя Россия» Весероссиянь пелькстамонть вельде минь панжтано ёроков авторонь од лемть, конат мелявтыть эсь региононть, эсь масторонть кисэ. Сехте вадря роботатнень автортнэнь минь покш мельсэ сайсынек «Россия – страна возможностей» платформань командас ды явтано эрявикс ресурст эсь содамочитнень кастомантень», – тешкстызе «Россия – страна возможностей» АНО-нь пресс-службань прявтось Сергей Коляда.

«Течинь эрямосонть эрьвась, кинь ули смартфонозо, вийсэнзэ невтемс эсь прянзо журналистэкс. Информациянь ламочинь шкастонть регионтнэстэ од автортнэнень яла седеяк стака невтемс эсь прянть покш аудиториянтень ды муемс вадря ловныцят. Пек паро, «Моя страна – моя Россия» Весероссиянь пелькстамось кармась площадкакс, кона максы ки ёроков од ломантненень», – пачтясь Коммуникациятнень коряс департаментэнь прявтось, «Регионы России» медиа-холдингень прявт редакторонь полавтыцясь Дмитрий Киселёв.

«Моя страна – моя Россия» пелькстамонь прявтонть, РГГУ-нь проректоронть Лариса Пастуховань валонзо коряс, панжиковонь 21-це чистэнть саезь аштемковонь 23-це чинть самс конкурсонь зярыя номинациятнень коряс ютыть онлайн-идемат. Васенце истямо онлайн-идема ульнесь панжиковонь 21-це чистэнть «Интеллектуальная собственность – будущее моей страны» номинациянть коряс, ней учови «Слово о моей стране» номинациясонть.

Информационной технологиятнень тевс нолдазь, проекттнэнь идемась карми «Мой город», «Экология моей страны», «Моё село», «Развитие ассоциации выпускников конкурса», «Моя гостеприимная Россия» номинациятнень коряскак.

«Течи ёвтазь роботатнень автортнэ, конат кармасть изницякс. Сынст каземась кемекстазь коень коряс ютавтови торжественна тедедень сёксня», – мерсь Лариса Пастухова.

Сехте вадря роботатнень автортнэнень мереви ютамс стажировка «Россия – страна возможностей» АНО-сонть ды истя жо кармить участникекс изницятнень марто пелькстамодо мейлень важодемань программасонть.

«Моя страна – моя Россия» конкурсось тевс нолдави «Образование» национальной проектэнь «Социальные лифты для каждого» федеральной проектэнть юрсо.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».