Ноябрянь 26-це чистэ М.М. Бахтин лемсэ Научной библиотекань информационно-ситуационной центрасо ютавтовсь «Мордовский народ в истории и культуре Российского государства: от прошлого к современности» теманть коряс вастовомась ды панжовсь «Жизнь в науке» выставкась.
Мероприятиятне алтавсть Н. П. Огарёв лемсэ МГУ-нь содавикс учёноенть, исторической наукань докторонть, Историко-социологической институтонь Россиянь историянь кафедрань профессоронть Елена Николаевна Мокшинань 55 иетнень юбилеентень.
Профессоронть Елена Мокшинань весе эрямозо сюлмавозь Мордовиянь университетэнть марто. 30 ламо иетнень перть сон кемевикс эсь вузонтень. Исторической факультетэнть прядомадо мейле, 1992 иестэ, сась роботамо университетэв Этнографической музеень фондтнэнь ванстыцякс, косо важодсь 2018 иенть самс. Аспирантуранть прядомадо мейле, 1997 иестэ, Елена Николаевна идизе кандидатской диссертациянть ды ушодсь роботамо дореволюционной отечественной историянь, археологиянь ды этнографиянь кафедрань старшей преподавателекс, 1998 иестэ саезь кармась доцентэкс. Те званиясь тензэ максозь 2002 иестэ. 2004 иестэ Елена Мокшина идизе докторской диссертациянть, 2005 иестэ кармась дореволюционной историянь, археологиянь ды этнографиянь кафедрань профессорокс, 2013 иестэ – Россиянь историянь кафедрань профессорокс. Профессоронь лемесь максозь 2024 иестэ.
Кода учёной Елена Мокшина покш путовкс тейсь эрзятнень ды мокшотнень этнической историянь, общественной ды семиянь бытэнь, материальной ды духовной культурань мелявкстнэнь тонавтнемантень, седе пек Мордовиясо религиозной эрямонть, этнокультурной ды этноконфессиональной тевтненень.
«Эрзянь-мокшонь раськетнеде кевкстемась, религиясь, эсь пазтнэнень кемематне монь научной ванноматненень пек малавикст. Эрзятне-мокшотне – те темась, конань лангсо мон важодян весе эрямон перть, конантень алтавить научной ламот важодевксэнь. Те раськесь нейгак теи покш путовкс Россиянь государственностенть, сонзэ историянть виевгавтомасо», – мерсь Елена Мокшина.
Елена Николаевна анокстась исторической наукань 4 кандидатт, кармась 350 ламо научной важодевкстнэнь авторокс, теке марто нолдась XIX-XX-це пингетнень отечественной историянь, эрзятнень ды мокшотнень историянь ды этнографиянь, теке марто неть раськетнень этнической, этнокультурной ды этноконфессиональной кевкстематнень, финно-угроведениянь, краеведениянь, этномузееведениянь коряс 14 монографият, тонавтнемань 12 пособият, конатне лиссть Россиясо ды омбо масторсо.
Юбилеентень алтазь кенярксчинтень сакшность профессоронть Елена Мокшинань сазорозо – профессорось, историянь наукань докторось Юлия Сушкова, тонавтницянзо, важодиця ялганзо, студентэнь шкасто мартонзо тонавтницятне, малавиксэнзэ. Историко-социологической институтонь дирекциянть пельде Елена Николаевнанень поздоровт ёвтась философской наукань кандидатось, информатизациянь коряс прявтонь полавтыцясь Александр Ширшов. Сон тешкстызе, наукантень вечкемась, профессиянтень кемевиксчись, эрямонь вийтне, важодемань вечкемась, ответственностесь – профессоронть Елена Мокшинань сеть ёнкстнэ, конатнень коряс мельспаросот коллегатне ды тонавтницятне.
Сонзэ лемс лембе поздоровт ёвтась Россиянь историянь кафедрань прявтось Виктор Арсентьев. Сон тешкстызе учёноенть вечкевикс тевензэ ды эрямо кинзэ.
«Мон течи карминь содамо истямо мельстуиця кулядонть, Елена Николаевна важодема кинзэ ушодызе Этнографической музеень фондтнэнь ванстыцянь тевсэ. Должностесь те шкас ули ды ловови Историко-социологической институтонь алкуксонь сюпавчикс. Елена Николаевна саи покш тарка минек институтсо, сонзэ эрямонь энергиясь виевгавты кафедрасо важодеманть. Мон каштанчисэ сонзэ шкинемань ёрокчиденть. Сон свал исследовательской важодемасо, вешнемасо, муи кель-вал эрьва студентэнть марто. Пек эрявикс ёнксось, Елена Николаевна полады эсь тетянзо, профессоронть Николай Мокшинэнь койтнень ды теи пек ламо минек региононь исторической науканть виевгавтомга», – тешкстызе Виктор Арсентьев.
Каршо валсонть Елена Николаевна ёвтась покш сюкпря пурнавозтненень эсь лемс лембе, седейстэ ютыця поздоровтнень кисэ. Сон тешкстызе, наукантень кинть сонзэ туртов панжизе тетязо, конань марто вейсэ роботасть малав колоньгемень иеть.
Важодемань иетнень перть Елена Мокшина кармакшнось Мордовской госуниверситетэнь Огарёвской премиянь лауреатокс, казезель И. А. Бунин лемсэ «За верность русской культуре и литературе» литературно-общественной премиянь дипломсо, Н. П. Огарёв лемсэ МГУ-нь, Саранск ошонь Администрациянь, МР-нь Раськень политикань государственной комитетэнь, МР-нь Государственной Собраниянь, республикань Образованиянь министерствань Почётной грамотатнесэ ды ламо лия казнесэ.
Юлия ЕРЕМИНА