«Круг спасения» проектэсь изнясь Президентэнь фондонь грант. Тень кувалма фондонь генеральной директоронть Илья Чукалинэнь кедьтешкс марто сась поздравительной телеграмма «Мордовский региональный комитет гражданского контроля» общественной правозащитной организациянь председателенть А. А. Сергеенко лемс. 

Эйсэнзэ кортави: «Меельце ковтнестэ лисезь тевтне эрьванть кармавтыть арсемс сехте эрявикстэнть: ломанень вечкемадонть, вейке-вейкенень лездамодонть, стакачитнень вейсэ изнямодонть. Тыньгак передовойсэтядо – свал аноктадо венстямс лезксэнь кедь, эскельксэнь эскелькс полавтомс мирэнть вадрянть ёнов, мик сестэяк, зярдо эрси стакадояк стака».

«Круг спасения» Гражданской контролень комитетэнь проектэсь ловозь сехте вадря социальной проектэкс. Сон нолдави тевс кемгавксово иеде седе вишкинетнень, конатне понгсть эрямонь стакачис, ресоциализациянь коряс дополнительной важодеманть ютавтомантень. Грантонь ярмактнень лангс панжовить гончарной кавто мастерскойть. Вейкесь эйстэст – стационарной. Тесэ кармить тонавтомо гончарной тевентень системной лувонь коряс. Гончарной тевень кедьчелькевтне тонавтсызь эйкакштнень сёвоньстэ кедьгень тейнеме. Психологтне жо, конатне истя жо кармить важодеме занятиятнесэ, лездыть стувтомс мартост лисезь апаротнень, тонавтомо, кода изнямс эсь кеженть.

Грантонь ярмактнень лангс панжовиця омбоце мастерскоесь карми таркасто таркас кандтневицякс. Мастерскоень оборудованиянть таркасто таркас кандтнемась лезды ютавтнемс эйкакштнень марто занятият районтнэва, истя жо Саранскоень 1 № СИЗО-со.
«Круг спасения» проектэнть тевс совавтомо ушодыть те иень августонь 1-це чистэ саезь. Прядови жо сы иень февральстэ – важодевксэнь выставкасо, конатнень эйкакштне тейсызь эсь кедьсэст.