Июлень 14-це чистэ весе масторонть келес тешкставсь Россиянь Почтань чись. Те кенярксчистэнть ёвтасть ламо поздоровт те сферасонть важодицятненень, васняяк сетненень, конатне роботыть ломантнень марто.
Ютксост, нама, велень почтальонтнэ. Отяжелень райононь Дюрькина эрзянь велесэ командировкасо улемстэ совинек тосонь почтань отделениянтень ды теевинек содавиксэкс чевте седей аватнень марто. Почтанть прявтокс роботы Любовь Петровна Тужина, тензэ лездыть кавто почтальонтнэ: Елена Лапшина ды Любовь Михайловна Трошкина. Неть аватне велень эрицятнень нежест, почтаськак ськамост эриця ломантнень туртов вастовома, кортнема таркине.
Кода ёвтни Любовь Петровна, 10 иеде теде икеле Дюрькинасо почтась пекстазель, арасельть важодицят. Сонсь Тужина те шкане самай туекшнесь пенсияв ды сайсь мель панжовтомс отделениянть. Мольсь Отяжелев ды якавтынзе весе тевтнень. Истя, лиядо арсиця ды икелень шкадонть талныця авась панжсь эсензэ велес важодема тарка эстензэ ды кавто ломанень туртов. Кадык зарплатаст а покш, ялатеке ули робота.
Сонсь Любовь Петровна лангс ваномс сэтьмине, а кодашка оймень вий эйсэнзэ кекшезь. Истят минек велень аватне, кода кортави стихсэнть: лишме ардомсто лоткавтыть, палыця толс совить. Сон чачсь-кассь шабра Эрзянь Сыреська велесэ, тонавтнесь бухгалтерэкс, сась роботамо Дюрькинань виев колхозов специальностень коряс. Теске лиссь мирденень ды пенсияс важодсь ве таркасо. Зярдо чарькодизе, пенсиянь пандовиця ярмактне ковгак а сатыть, сайсь мель панжовтомс почта, арасель мелезэ эрямс нужасо. Тевезэ лиссь ды ней эрицятне ёвтыть тензэ покштояк покш сюкпря.
– Велесэнть весе тонадсть почтантень, эдь пенсиятне минек вийсэ кандтневить кудов. Отделениясонть улить эрявикс товарт, бути мезе арась, заявкань коряс сеске ускить тенек. Ломантне ламо тейнить интернет-заказт эрьва ёндо. Иезэнзэ кавксть панжови газетатнень ды журналтнэнь лангс сёрмадстома. Ансяк аволь весе мельспаросо тень теить, юткошканть саизь телевизортнэ ды Интернетэсь. Мон яла истятнэнь тандавтан: а сёрмадстадо газетат, пекстасызь, карматадо мейле Отяжелев чийнеме коммуналканть, светэнть ды газонть пандомо мельга. Седе пелезевить. Ялатеке велесэнть кияк а сёрмадсты кавто газетат, весе вейте-вейте. Тувталось – ярмаконь арасьчись. Лиядсть тезэнь пенсионерт ды лавшо шумбрачи марто ломанть. Зярдо важодсть школась, велень предприятиясь, сестэ сёрмадстыцятнеде ульнесть седе ламо, – корты Л.П. Тужина.
Почтань прявтонть ёвтнеманзо коряс, велесэнть эрзянь кельсэ сёрмадстыцят допрок арасть, бути вейке кияк «Эрзянь правда» эли «Сятко» сёрмадсты. Седе ламо вешить «Вперед» газетанть, штобу райононь кулятнень содамс. Тень кувалма почтальонтнэнь сумкасткак седе човиньгадсь, аволь кода ютазь пингень 80-це иетнестэ, кандтнитькак недлязонзо весть, пецясто.
Сонсь почтань отделенияськак веши витнемат-петнемат. Тень почтальонтнэ ды эрицятне пек учить.Сельмест сявадыть Сабанцелень почтань отделениянть лангс, сон одкстомтозель ды ней кенярдовты весень мазычисэнзэ. Арсетяно, Дюрькинансентькак а кадсызь вановттомо ды аватне кармить роботамо паро, лембе таркасо! Кенярксчинть кувалма арсетяно тенст шумбрачи, шожда ды уцяскав эрямо.
Марина Девятова