Пятница, марта 29, 2024
Важное

Толайкинтнэнь семиясь ней Дубенкань районсонть содавикс. Сынь Лариса тейтерест марто кирдить «Жемчужина» кафе, Александр Ивановичень ули пилорамазо. Зярыя иеде теде икеле панжокшность кавто лавкат, ансяк шкань ютазь савсть пекстамс. Сетевой лавкатне, келя, манизь рамицятнень седе дёшова товартнэсэ.

Сестэ Татьяна Фёдоровна весе виензэ путынзе эсест кафенть стявтомантень-кепетемантень: тесэ одкстомтозельть залтнэ, рузонь койтнень-кирдатнень коряс строязель чувтосто нупаль. Ярсамопельтне тесэ овсе а явовить кудонсетнень эйстэ. Кода рединь, районтнэсэ весе столовойтне истямо лувонть вельде роботыть: пидить тантейстэ ды питнетнеяк аволь менельстэ саезь. Кода корты Татьяна Фёдоровна, районтнэсэ кафетнень-столовойтнень клиенттнэ весе эсест, ошсто-косто сыцятнеде аламо. Оштё зярыя иеде теде икеле кафесэнть седе сеедьстэ налксесть свадьбат, юбилейть, чачома чить, ней жо тесэ, ловт, эрьва чистэ калмамот ды ледстнемань чить. Од ломантне бажить оргодеме Московов ды лия покш ошов, секскак сыретнень ламоксчись касы иестэ иес. Татьяна Фёдоровнаяк уш пенсиясо, ялатеке сонзэ эрязачизэ а максы тензэ оймсемс. Аванть улить эсензэ салавачинзэ, кода ванстомс шумбрачинть. Пильге вийтнень кемекстамонть туртов сон рамась тренажёр, конанть чаравты юткошкасто. Седе сеедьстэ те эрси тельня, кода скандинавиянь якамонь тренировкатнеяк. Кизна жо физкультуранть Татьяна Фёдоровнань туртов полавтсызь пиресэ тевтне, конатне велень азораватнень зярдояк а прядовкшныть. Сон кирди колмо теплицат, косо касты помидорт, куярт. Нама, кода весеяк, путни модамарть, чурькат, капстат ды зярыя иень перть виноградт. Сынденст азоравась тейни тантей компотт, кости эйсэст прякас. Эмежтнень вечки авась консервировамс, сонзэ улить ламо рецептэнзэ, кода пекстамс баклажантнэнь, морковонь, дураккуяронь, капстань банкатнень.

 mg 7285

Ялатеке Толайкинань сехте покш вечкемазо ды каштанчизэ – кудоюртозо ды вакссонзо садпирезэ. Татьяна Фёдоровна корты, кудоюртонть мазычись – те ансяк авань тевесь. Кадык кудонть строизе мирдезэ, теизе сонзэ «ёвксонь теремококс», нама, азоравась. Уш васолдо неявить калиброванной чувтосо вельтязь кудовальматнень (те дизайнось ней ловови пек модноекс) ашолдыця узор марто налешниктне. А уш кода соват кудонть икелев – седеезэть паро! Садпиресь пештязь сливань, умарень, атемарень чувтотнеде. Сынст алга аштить ёвксонь геройть: гномикть, ватракшт, ашо локсейть. Мазый кедьгева цветить розат, фиалкат, астрат, ирист, нарцисст ды оштё зярыя а содавикс цецят. Сынь аштить эрьва кува: масторга, крыльця пева, понгавтневить вальма алга ды чувтотнень тарадтнэс. Видьметнень кастомс авась рамси Интернетэнть вельде, тосто жо ванкшны ландшафтной дизайнонтькак. Садонть мазылгавтомга Толайкина саинзе ававтонзо кудосто ташто кринкатнень, ды ней сынь эрить омбоце эрямо. Канализациянь латконтькак кекшизе парсте: лангозонзо теевтсь чувтосто лисьмань кундо, понгавтсь эйзэнзэ ведрыне. Чувтотнень алга Татьяна Фёдоровна ладсесь оймсема эземнеть, верьгаст понгавтнесь цивтёрдыця лампочкат. «Кодаткак лембе масторт а эрявить, вана косо «релаксось»­ – овсе кудо икеле!»  – корты авась.

 mg 7281

Кудопотмоськак Толайкинтнэнь дивавты ваньксчисэ ды мазычисэ, косояк шукшпринеяк арась. Пидемань-панемань нупальсэнть ашти Татьяна Фёдоровнань каштанчизэ –рузонь каштомось. Ней кудотнесэ истят каштомтнень яжить. Татьяна Фёдоровна жо, мекевлангт, одкстомтызе сонзэ ды лови эсензэ васенце лездыцякс. «Ялган-оян рамсить микроволновкат, аэрогрильть, кшинь панема каштомнеть, оштё минень-сюнонь устройстват. Монень жо мезеяк истямо а эряви. Каштомсонть ямось, кашась, прякатне ды кшись пидевить-паневить куроксто ды весе вейсэ! Танстесткак духовкасо пидезтнень эйстэ явови. Нама, каштомонсетне сехте тантейть!» – ёвтни азоравась. Видестэ корты рузонь валмеревксэсь: «Кудось мазый аволь потмосонзо, сон мазый прякасонзо!». Пенгетнень каштомонть уштомс анокстыть вейсэ мирдензэ марто. Сырькаест пельде прякатнень-каймактнень ярсамо жо сакшныть кавто нуцькинест. Лембе каштомлангонть жо вечксызь Барон ды Сёмочка каткатне.

Татьяна Фёдоровнадо ёвтнемстэ ули мелем тешкстамс оштё вейке ёнксонть, конадонть сон, видькстан, эзь мере сёрмадомс: Толайкинтнэ Дубенкань райононь малав весе покш мероприятиятнень, кенярксчитнень, спортонь пелькстамотнень, турниртнэнь спонсорт. Вейкеяк энялдома сынь а кадыть мельтеме.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».