Эрьва кудосонть те шкане пидильть ведьсэ лакавтозь прякинеть. Сынст топось теевиль эрьва мейстэ – кие мезе цюлансто муи ды каськасто тарги. Сехте пек вечкевиксэкс ды вастневицякс ульнесть модамарь ды рестазь чурька марто прякинетне.
Сынст анокстылизь васенце кельменть прамо шкасто, эдь прякинетнеде тейневильть покш семияс сядодо ламо, ды кудазоравась кельмевтилинзе лаз лангсо ушосо. Ведьсэ пидезь прякинетне тейневильть истя жо сюлосто, пидезь топосто, ой марто рестазь капстасто, кие седе сюпаволь – тувонь сывельстэ.
Кода ансяк а мерильть неть прякинетнеде эрзятне. Эрьва велень, содатано, эсест лемест неть тантей каванявкстнэнь. Кие мери котёлсо эли чугунсо прякат, кие ведьс эли сыргавтнезь прякинеть... Икелень
шкане кудазораватне пидсильть эйсэст каштомсо ведь марто чугунсо.
Прякинетне весе велетнесэ теевильть вейкетьстэ: почтс каявиль вейке ал, аламошка ловсо, сал ды ичевиль чапакс. Эйстэдензэ стопкасо-мейсэ керявильть круккеть, потмозост каявиль топось, ды прякинетне менчевильть-сивердявильть.
Отяжелень райононь Таразбуе велень эрицясь Николай Степанович Живаев ёвтнесь тенек, кода сон тейни прякинеть апак пиде модамарьстэ:
Эряви саемс ниле-вете модамарть,
300 граммат тувонь куя (сала) ды ютавтомс сынст сывелень нолдамкава.
Модамарьстэнть лепштинк ды валынк веденть, каядо юткозонзо керсезь чурькат, сал, раужо перець ды кавтошка пейнечурькань прят.
Весе топонть эряви парсте човорямс, ды топось прякинетнес анок.
Каямс сынст эряви лакиведьс ды пидемс кеменьшка минутат, ярсамсто валомс велькссэ.
Тантейстэ ярсамс тенк! Сыця номерсэ минь ёвтнетяно, кода панемс модамарень панжакайть.
Модамарень прякинеть
- Подробности
- Категория: Домашнее хозяйство