Пятница, марта 29, 2024
Важное

Ноябрянь 20-це чистэ Мордовия Республикань Прявтось Артём Здунов содавтызе Отяжелень райононть. Сон якась зярыя предприятиятнес, ваннынзе ракшань кастомань покш хозяйстванть ды китнень витнеманть. Истя жо Артём Алексеевич кортась пандонь соксонь комплексэнть виевгавтомадо, конась тедеде панжови Отяжбуень Каменка велесэ.


Мордовиянь Прявтось теевсь содавиксэкс Отяжелень райононь
предпринимательтнень марто

Васняяк Артём Здунов якась муниципалитетэнь предпринимательтнень производстватнес, теевсь содавиксэкс важодемаст марто.
Владимир Потапов бизнессэ 15 иеде ламо. Отяжбуесэ важодить кавто лавканзо, ладязь тротуаронь плиткань нолдамось, тосо важодить райононь эрицятне. Панжозь керамзитно-бетононь блоктнень нолдамонь коряс цех, тевс нолдамонть коряс сынь малавикст кирьпецентень эли газоблоконтень, ансяк питнест седе алкине.
Артём Здунов кармавтсь райононь прявтонтень Виктор Прокиннэнь строямонь тевтнень ютавтомсто нолдамс тевс местной предпринимательтнень продукцияст.

Производствань ветицясь мерсь республикань Прявтонтень – пачтямотнень топавтоманть туртов пек эряви погрузчик. Региононь Прявтось кармавтсь МР-нь Экономикань, торговлянь ды предпринимательствань министрань тевтнень топавтыцянтень Алексей Грибановнень лездамс предпринимателентень кредитэнь льготань программанть вельде рамамс техниканть.
Мордовиянь Прявтось истя жо ваннызе шожда ды сталмонь усксиця техниканть, истя жо трактортнэнь, витнеманть коряс сервисэнь куншкакуронть. Сонзэ панжизе тесэнь предпринимателесь Сергей Чернышев. Неень шкане те двигательтнень обслуживаниянь коряс прявт предприятиятнестэ вейкесь, тесэ витневи техникась колмо регионтнэстэ. Предприятиянть ули велень хозяйствань техникасо «Мерседес-бенц» маркань двигательтнень витнемань коряс сертификатозо. Артём Здунов ёвтась мель руководителентень анокстамс специалистт WorldSkills Russia важодемань профессиятнень коряс Россиянь чемпионатонтень, конась сы иестэ ютавтови Саранскойсэ.


Ирина Молчанованень казевсь эйкакшонь триця авань диплом

Отяжелень районсо улемстэ республикань Прявтось теевсь содавиксэкс Молчановтнень ламо эйкакшонь триця семиянть марто. Мирдть-нить кастыть сисем эйдеть. О. Дмитрий служи Сабанцелень Святотроицкой церьковасонть. Ирина Владимировна важоди тонавтыцякс искусствань школасонть.
Покш цёраст Иван «ветес» прядызе школанзо, ней тонавтни Н. П. Огарёв лемсэ МГУ-со колмоце курссо. Сехте вишкине тейтерькантень, Машеньканень, 1,5 ие.

МР-нь Прявтонть Указонзо коряс Ирина Молчанова казезь Мордовия Республикань ламо эйкакшонь триця авань I степенень Почетонь дипломсо. Артём Здунов макссь тензэ ледстнемань казне, эйкакштненень – ламо ламбамо ярсамопельть.
Семиянь прявтось ёвтнесь Артём Здуновнень: государстванть ды тесэнь предпринимательтнень лезксэст вельде Молчановтнень ней ули эсест кавто этажсо кудост. А вана автомобилест арась.
Мордовиянь Прявтось кармавтсь муниципалитетэнь социальной службатненень саемс те кевкстеманть вановт алов. «Яводо соцтранспорт ды ваннынк семиянь автомобилень рамамонь коряс государственной программатнес семиянть понгомань ёнкстнэнь», – мерсь республикань Прявтось.
Теде мейле Артём Здунов вастневсь Орданьбуень ды Отяжбуень епископонть Вениамин марто. Кортавсть епархиясонть духовно-просветительской важодемань, истя жо православиянь зярыя объекттнэнь Мордовиянь туристэнь картантень совавтомань кевкстематне.

Велетнесэ эряви теемс важодемань од таркат

Седе тов Мордовиянь Прявтось Артём Здунов Отяжелень районсо улемстэ якась «Восток» МАПО-нь АПК-в. Сон теевсь содавиксэкс компаниянь производствань вийтнень марто, ваннызе ракшань кастомань комплексэнть.

Хозяйстванть 19 тёжат гектардо ламо моданзо. Тесэ кастыть товзюро, пинеме, кукуруза, ликша ды лияназ, ракшатнень туртов кором. Ракшань комплекссэнть 658 прят потявтовиця скалт, улить телкат, букинеть. Миеви кода ловсо, истя жо сывельгак. Топавтови 10 тёжат тоннас сюронь ванськавтомань ды костямонь коряс комплексэнь строямонь инвестициянь проектэсь.

Эрьва скалонть ули код марто бирказо. Программанть вельде сканерэнь экранс ливтеви ракшанть коряс весе кулясь. Стаданть мельга ваны аволь ломань, а компьютер.
«Восток» МАПО-сонть важодить 214 ломанть. Средней зарплатась 35 тёжат целковойть.

Артём Здунов ёвтась сюкпря фермертнэнень важодеманть кисэ ды покш мельсэ кунсолынзе касомань-кепетемань коряс арсематнень. «Велесэ производстванть келейгавтомась – те свал вадря, те важодемань од таркат. Минек туртов те пек эрявикс! Варштадо шабра велетнень лангс, арсян, тосонь эрицятнень ули мелест муемс вадря зарплата марто важодема тарка», – мерсь республикань Прявтось.

Панжови сокссо кирякстнемань комплекс

Меельцекс Артём Здунов якась «Каменка» сокссо кирякстнемань сы шкань комплексэнтень. Проектэнь инвесторокс кармась Виктор Бирюков, «Талина» компаниятнень группань теицясь. Те сезонстонть панжовить колмо трассат: тонавтнемань, прявт ды тюбингсэ кирякстнемань туртов; эрьвасонть кармить важодеме кепсемапельть.
Од иень оймсема читнестэ комплексэсь карми важодеме. Панжови кафе, оршнемань тарка, эйкакшонь нупальть, медпункт. Истя жо те сезонстонть карми важодеме 150 кавонзазь метрань покшолмасо катокось. Панжови инвентарень прокат: соксонь, сноубордонь, тюбингень ды конькань. Кармить важодеме инструкторт. Теевить важодемань малав 20 таркат.

Республикань Прявтось ваннызе комплексэнть ды кортась те тарканть вадрялгавтомань коряс арсематнеде. «Проектэсь пек вадря. Тесэ мереви оймсемс кода минек эрицятненень, истя жо шабра регионтнэстэ туристтнэнень. Прявт тевесь – явомс покш мель сэтьмечинь ванстомань кевкстематненень», – мерсь Артём Алексеевич.
Виктор Бирюков ёвтнесь сыця шкань арсематнеде. Бути проектэсь туи мельс, агрохолдингесь яви ярмакт инфраструктуранть седе тов виевгавтоманть туртов, тесэ анокт строямс гостиница ды санаторий. Теде башка, улить арсемат теемс сафари-парк, калонь кундамонь сёлтт, конноспортивной клуб ды профессиональной леднема тарка.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».