Лямбирень райононь велень хозяйствань предприятиятнесэ умок араселинек. Тувталтнэде зярыя. Тесэнь аграрийтне маштыть важодеме.
Эрьва иестэ велькска топавтнить сывелень, ловсонь, сюронь миемань аравтлувтнень. Иеде иес кастыть скалсто потявтовкстнэнь. Теньсэ, нама, покш таликазо ракшатнень орматнень каршо бороцямонь коряс станциянть, конань прявтсо ветеринарной врачось А.А.АВСТАНЧИКОВ.
Андрей Анатольевич Лямбирень райононь ракшань орматнень каршо бороцямонь коряс станциянь прявт ветеринарной врачонь тевенть топавты малав вейксэ иеть.
– Тенень кись а шождатнестэль, – ёвтни А.А.Австанчиков. – Мордовиянь Н.П.Огарёв лемсэ госуниверситетэнь Аграрной институтонь «ветеринария» специальностентень тонавтнемадо мейле косо ансяк эзинь важоде! Ялатеке мельсэнь свал кирдинь – важодемс эсь специальностенть коряс. Мелем топавтовсь 2009 иестэ, зярдо сынь ракшань орматнень каршо бороцямонь коряс станциянь ветеринарной врачокс важодеме. Кода кецинь тенень! А шнамга, тевень топавтынь седейшкава. Уш важодемань васенце иестэнть нучк-пачк ютынь райононь велетнень. Сеедьстэ вастневинь велень сеть эрицятнень марто, кить эсь кардазсо кирдить ракшат, реветь, тувот. Ульнинь крестьянонь-фермерэнь хозяйстватнесэяк.
ЭРЯМОНЬ ЭСКЕЛЬКС
А.А.Австанчиков чачсь 1983 иень февралень 21-це чистэ Саранскойсэ. Тензэ колмо ковт ульнесть, зярдо тетязо, Анатолий Васильевич, ды авазо, Анна Ивановна, сыргасть эрямо Ульяновскоень областень Коченяевка эрзянь велев. Те – Андрей Анатольевичень тетянзо тиринь велезэ. Коченяевка велень «Чернореченский» велень хозяйствань предприятиясонть А.В.Австанчиков агрономокс важодсь пенсияс туемазонзо. Анна Ивановна – складонь прявтокс.
Коченяевка велень средней школанть прядомадо мейле Андрей Австанчиков сась тонавтнеме Мордовиянь университетэнь Аграрной институтов. 2005 иестэ парсте прядызе тосо тонавтнеманть. Мейле тусь армияв, служась Балтийской флотсо.
– Армиясто велявтынь патянень, кона эри Лямбирьсэ, – ёвтни А.А.Австанчиков. – Зярыя шкань ютазь урьвакстынь. Ним лемезэ Валентина Вячеславовна. Раминек тестэ кудо. Хозяйствасонок кирдтяно ракшат. Аволь умок раминек пони вишка лишме. Нурькинестэ меремс, Лямбирьсэ кеместэ нолдынь ундоксон.
А.А.Австанчиковонь валонзо коряс, ракшань орматнень каршо бороцямонь коряс станциясонть важодить 28 ломанть. Сынь эсь тевень алкуксонь специалистт. Эдь важодицятнестэ ламотне станцияв самодо икеле важодсть райононь велень хозяйствань предприятиясо. Тесэ сынь эрьва иестэ вастневсть аволь ансяк скалонь, вазонь, тувонь трицятнень марто, ды, нама, бороцясть апаро орматнень каршо.
КЕМЕ НЕЖЕТЬ
А.А.Австанчиковонь валонзо коряс, кеме нежензэ ветеринарной врачтне, ветерантнэ: Галина Петровна Кискина, Константин Евгеньевич Мамаев, Фёдор Павлович Шлепаев, Абдула Рамазанович Амаров, Василий Фёдорович Сараев.
Станциясонть ансяк паро валсо кортыть Татьяна Юрьевна Ключниковадо. Сон тесэ важоди кавксо иеть, ветеринарной врачонь тевенть топавты уш комсь иеть.
– Коллективезэнек кеместэ совась ведущей ветеринарной врачось Юлия Олеговна Горохова, – ёвтни Андрей Анатольевич. – Кедьсэнек важоди аволь умок, кель-вал весень марто сеске мусь. Икеле важодсь «Агрофирма «Октябрьская» предприятиясо, государственной ветеринарной контролень отделсэ.
Станциянь ветеринарной врачтне ёвтнить велень эрицятненень ракшань апаро орматнеде, кода сынст каршо бороцямс. Ламо ёвтнить тувонь африкань чумадонть, тувонь кирдемань ветеринариянь правилатнеде.
– Истя жо тувонь кирдицятнень марто ютавтнетяно инструктажт, козонь путыть сынь эсь кедьчелькест, – ёвтни А.А.Австанчиков. – Макснетяно памяткат. Информационной стендс понгавтнетяно яволявтомат, тувонь африкань чуманть зыяновчидензэ толковамот. Течи ули эштё истямо ёнкс: тувотнень таркас кармавтыть кирдеме скалт, вазт, куркат… Явить натой ярмакткак. Видькстатано, Лямбирень районсо те тевенть шныть.
– Течи минек ветеринарной врачтне покш мель явить ракшатненень чипень путомантень, – ёвтни станциянь прявт ветеринарной врачось А.А.Австанчиков. – Мезесь уш теезь велень хозяйствань предприятиянь 2674 ракшатненень ды 637 скалтнэнень, эйстэст 180 – потявтовицят.
– Важодемазонок кеместэ совась «Меркурий» системась, – полады Андрей Анатольевич. – Те тевенть парсте топавты ветеринарной врачось Галина Петровна Кискина. Важодить участкат, пункт…
Тешкстасынек, Лямбирень райононь ракшань орматнень каршо бороцямонь коряс станциянтень совить Покш Елховкань ветеринарной участкась, Атемаронь участкась, Болотниковань ветеринарной участкась ды Первомайской ветеринарной лечебницась. Ветеринарной эрьва участкасонть ули неень шкань оборудования марто автомашина. Специалисттнэ виевстэ важодить велень эрицятнень марто, лездыть тенст ракшатнень кастомасо, вейсэ бороцить апаро орматнень а нолдамга: сибирской язванть, ящуронть, тувонь африкань чуманть ды истя седе тов.
Лямбирень ракшань орматнень каршо бороцямонь коряс станциянь ветеринарной врачтнень вановтост ало общественной секторсо 10558 скалт, эйстэст 3520 – потявтовицят, 14688 – тувот, 225 – лишметь, частной секторсо – 1800 скалт, эйстэст – 322 потявтовицят, 978 – тувот.
– Минек ветеринарной врачтне аволь ансяк шкастонзо редить ракшатнестэ апаро орматнень, истя жо пштистэ ваныть ярсамопельтнень вадрячист мельга, – ёвтни А.А.Австанчиков. – Якатано рынкатнес, косо микшневить эрьва кодамо сывель, ловсосто продуктат. Эдь тесэ микшневиця ракшань сывелесь 90% Лямбирень районсто.
Ветстанциясонть ули лицензированной аптека, конань прявтсо Л.В.Савинова. Тесэ микшневить ракшатненень надобият. Людмила Валерьевна врачонь тевенть содасы парсте. Сон кувать важодсь больницясо, кона ашти Берсеневка велесэ.
– Минь изнявкстнэнь лангс а лотксетяно, – корты Андрей Анатольевич. – Важодтяно свал виевстэ, тевень содазь, вейке омбоценень лездазь. Ськамон мезеяк аволинь тее. Ансяк вейсэнь вийсэ таштавить изнявкстнэ. Те алкукскак истя!
Пётр ЗИНОВЬЕВ.
Лямбирень район