Республикань школатнесэ меельцеде гайнесть баягинетне. Эйкакштне максыть экзаменэст. Вишкинетнень ушодовсть учовикс кизэнь каникуласт. Седе покштне учить выпускной чокшненть. Покш Березникбуень средней общеобразовательной школань «Шугуровань» обособленно-структурной подразделениянть туртов те иесь меельце. Тонавтнемань сы иестэ эйкакштнень кармить усксеме Покш Березникень средней школав. Те шкас кавто автобуссо тей усксесть тонавтницят Парынзэлестэ, Бузаевасто, Тазинасто. Весемезэ тонавтнесть 24 эйкакшт. Вейксэце классонть прядызь вете тонавтницят.
Школань прявтось – Иван Федорович Ларькин, весе эрямонзо алтызе тонавтомань тевентень. Сон чачсь Симкинасо. Прядызе Н.П. Огарев лемсэ МГУ-нь биологиянь факультетэнть. Вуздо мейле направлениянь коряс од специалистэнть кучизь важодеме Сыре Шайговань районов. Велесэнть ульнесь кавксо иень школа. Сон ветясь химия ды биология. Зярс-бути ульнесь тонавтыцякс, мейле ладизь школань прявтокс. Кода важодемс, мейстэ ушодомс, кода ветямс тевтнень – сонзэ превс путсь школань икелень прявтось Эдуард Федорович Пузаков, кинь таркас ладизь. Иван Федорович нейгак лембестэ ледстни те ломаненть, евты сюкпря, кежть эзь кирде, мекевлангт, макссь лезэв превс путомат.
Видьстэ меремс, школань прядомадо мейле сон бажась молемс тонавтнеме вирень техникумов. Пек вечксь пертьпельксэнть, виренть. Тетязо вирьваныцяль. Ансяк тонавтнемань таркатне весе веенольть, васоло, секскак эзь лисе. Пертьпельксэнтень вечкемась те шкас ванстовсь. Юткошкасто свал моли вирев якамо, кунсоломо, пангонь кочкамо, охотав эли жо лей лангов калонь кундамо.
Вете иень ютазь сон сась тиринь Симкина велев, косо кармась школань прявтокс. Ды роботась школанть пекстамс – 2011 иес. Седе тов ладизь Чугур велень школань прявтокс. Ней истямо уцяска прась те школантеньгак. Мезеяк а теят, велетне чамить. Низэ Галина Ивановна истя жо ветясь химия ды биология, ней сон пенсиясо.
Иван Федорович пек ризны, школань тонавтыцятне кадовить роботавтомо. Эдь Покш Березникев тонавтыцят а саить, тосо улить эсест педагогост.
Кенярксчинь линейкасонть, конась алтавсь тонавтнемань иень прядовомантень, школань прявтось И.Ф. Ларькин казинзе Весероссиянь предметной олимпиадань муниципальной этапонь изницятнень. Те – Николай Дудников, сон лиссь призерокс тиринь литературань ды немецень келень коряс; Дарья Арапова – биологиянь коряс; Иван Елисеев – эрзянь келень коряс; Александра Атемаскина – географиянь коряс. Истя жо грамотасо казевсть сетне, кить явсть покш мель творческой пелькстамотненень.
Вишка шкасто саезь бажась важодемс эйкакш марто
Татьяна Васильевна Дудникова 2006 иестэ саезь роботы Шугуровань школасо начальной классонь тонавтыцякс. Сон прядызе М.Е. Евсевьев лемсэ МГПИ-нть (ней – МГПУ).
– Мон уш эйкакш пингестэ саезь бажинь важодемс эйдень кужосо. Истя лисськак. Педагогонь ким ушодовсь эйдень кужосо, седе тов ютынь начальной классонь тонавтыцякс. Вишка классо эйкакштне кунсолыцят, бажить ламонь содамс, макснить эрьва кодат кевкстемат, сынст марто а кона шкане нусмакалемс. Авань ендо патям – Анна Федоровна Ларькина – ламо иень перть важодсь Пермезь велень школасо математикань тонавтыцякс. Вейке сазором роботы Саранскоень 16-це ды 10-це №№ школатнесэ эрзянь келень тонавтыцякс, омбоце сазором – эйдень кужосо воспитатель. Сюкпря евтавлинь И.К. Потапова васенце тонавтыцям туртов, О.Е. Семенова классной руководителем туртов. Сынст лангс ванозь, паряк, чачськак потсон мелесь важодемс эйкакш марто, – евтни тонавтыцясь.
Истя уш лиссь, меельце иетнестэ Татьяна Васильевна тонавты начальной зярыя класст. Вейсэ аштить васенце-омбоце, нилеце-колмоце классонь тонавтницятне. Нама, те аволь шожда. Эряви анокстамс урокт эрьва классонть марто, теке шкасто рузонь велень эйкакштнень туртов лия программа. Тематнень эряви толковамс мельга-мельцек, максомс задания. Те шкане явомс мель лия классонть туртов. Эрзянь келень уроктнесэ рузонь эйкакштне седеяк курок тонавтнить валтнэнь, ули мелест чарькодемс. Начальной классонть ульнесть кавксо тонавтницят, вейкесь эйстэст прядызе нилеце классонть.
– Эйкакштне полавтовить. Кодат ульнесть тонавтницятне комсь, кемень иеде икеле ды ней. Ней минь вейкень-вейкень туртов теке ялгат. Эрьва мезде кортатано, вастовомсто кутморятано. Чарькодеви, эрьванть эсензэ маштомачинзэ. Кие уш пек вишкинестэ невти содамочинзэ, кинь марто эряви ламо важодемс. Миненек, тонавтыцятненень, эряви муемс эрьванть марто кель-вал, максомс седейлембенть. Ванат, кие кода вети прянзо, мезентень яви мель. Кинь эряви кармавтомс, кие жо сеске кунды тевс. Весень весе вейкетьстэ а лиси тонавтомс, – тешкстызе Татьяна Васильевна.
Т.В. Дудникова – васенце категориянь тонавтыця. Аволь весть пелькстась «Иень тонавтыця» райононь конкурссо ды сайнесь изнямонь таркат. Истя жо эрьва кодамо пелькстамосо пряст невтить тонавтницятнеяк. Юлия тейтерезэ прядызе М.Е. Евсевьев лемсэ МГПУ-нь филологиянь факультетэнть, ней тонавтни магистратурасо. Николай церазо прядызе 8-це классонть. Юткошкасто Татьяна Васильевна вечки сурестэ кодамо. Дудниковтнень вальмалксост свал ванькс, мазый цеця потсо.
Покш Березникень райононь Чугур велень средней общеобразовательной школась панжозель 1974 иестэ. Весе неть иетнень перть эрямонь покш килангов сон ильтясь сядот тонавтницят. Тесэ пек сюпав веленть историянзо ланга музеесь. Сон панжозель 90-це иетнень ушодовомсто, 2003 иестэ сонензэ максозель паспортось ды музеенть кармась официальной статусозо. Экспонаттнэде жо течинь чине музейсэнть лововить малав 500. Эрьвась эйстэст евтни Чугур велень икелень историядонть, культурадонть, койтнеде-кирдатнеде.
Сехте кезэрень экспонатокс тесэ ловови неолит пингень (минек эрадонть икеле IV пингесь) кевень узересь, ванстовсть XIX-це пингень оршамот, 1909 иень учебник. Тезэнь ансяк чалги пильгеть, сеске прят марят лия шкасо ды превезэть сыть покштянь-бабань евтнематне. Паро, бути музеесь а еми, истямо таштазь-муезь сюпавчинть эряви ванстомс.
Татьяна Маторкина