Среда, августа 12, 2020
Важное


Аштемковонь 20-це чистэ Н.П.Огарев лемсэ МГУ-сонть ушодсть саеме документт абитуриенттнэнь пельде. Кода карми молеме примамонь кампаниясь тедеде, неть читнестэ Печатень кудосо ёвтнесь университетэнь ректорось С.М.Вдовин. Тешкстызе, коронавирусонь пандемиясь путсь эсензэ тешкст, невтемакс, тедеде документтнэ кармить саевеме ансяк дистанционна эли почтанть вельде.

Университетэнь сайтсэнть ушодсь важодеме «Личный кабинет абитуриента» сервисэсь, конань вельде мереви кучомс документтнэнь кудосто апак лисе. Весе эрявикс кулянть мереви кевкстемс 8-800-222-77-13 «пси линиянть» коряс. Эряви кучомс паспортонь, аттестатонь копият, медицинань справканть мереви максомс мейле.

– Икеле иетнестэ уш кавто тёжадо ламо абитуриентт кучокшнызь яволявтомаст электронной лувсо. Тедеде жо минь нолдынек од сервис, – тешкстызе С.М.Вдовин.

Сон евтызе, поладозь документтнэнь максомань шкась: тонавтнемань очной формантень документтнэнь мереви максомс умарьковонь 18-це чинтень, омбо масторонь эрицятнень пельде яволявтоматне саевить ожоковонь 17-це чинть самс. «Васенце волнанть коряс» бюджетэнь таркас саемадо приказось лиси умарьковонь 24-це чистэ, «омбоце волнанть» – умарьковонь 26-це чистэ.

Истя жо поладозь СПО-нь программатнень коряс документэнь саемань шкась: умарьковонь 15-це чинтень – творческой специальносттнес молиця абитуриенттнэнень, умарьковонь 25-це чинтень – весе лиятнень туртов.

Ректорось ёвтызе, коронавирусонь пандемиянть ушодовомсто университетсэнть студенттнэ куроксто ютавтозельть тонавтнемань дистанционной лувонтень, те лездась топавтомс весе вешематнень ды вадрясто прядомс тонавтнема иенть.
2020 иестэ Н.П.Огарев лемсэ МГУ-нтень явозь бюджетэнь 2 643 таркат. Те 160 таркадо седе ламо ютазь иенть коряс. Студенттнэ саевить анокстамонь 153 ёнкстнэнь коряс: бакалавриат – 65, специалитет – 15, магистратура – 59, СПО – 14.

Эйстэст тонавтомань 4 программатне топавтовить англань кельсэ: «Лечебное дело» (специалитет), «Фундаментальная информатика и информационные технологии» (бакалавриат), «Строительство» ды «Теплоэнергетика и теплотехника» (магистратура).

Тедеде васенцеде явозь бюджетэнь таркат «Химическая технология» (Физикань ды химиянь институт), «Медиакоммуникации» ды «Актерское искусство» (Национальной культурань институт), «Правоохранительная деятельность» (юридической факультет) бакалавриаттнэнь ды специалитеттнэнь, истя жо «Конструкторско-технологическое обеспечение машиностроительных производств» (Рузаевскань машиностроениянь институт) магистратуранть коряс.
СПО-сонть панжозь кавто од специальностть: «Информационные системы и программирование» ды «Земельно-имущественные отношения».

Сеть абитуриенттнэнь туртов, кить кармить тонавтнеме ярмак лангс, кемекстазь льготат. Вузонь ученой советэнть мелензэ коряс, скидка максови ЕГЭ-нь результаттнэнь ваннозь: бути средней баллось 67 – сестэ скидкась ули 10%, бути 90 баллдо седе ламо – 50%. Истя жо максови скидка спортсо изнявкстнэнь кисэ.

Тедеде истя жо саевить 9-це классонь прядыцят Н.П.Огарев лемсэ МГУ-нь лицеентень, тосо тонавтомась моли кавто ёнкстнэнь коряс: «Информатика. Математика», «Химия. Физика».

Вузов понгомсто башка абитуриенттнэнень максовить дополнительной баллт, конатне вейсэндявить ЕГЭ-нь результаттнэнь марто. Истя, Н.П.Огарев лемсэ МГУ-нь абитуриентэнтень «За особые успехи в учении» медаленть кисэ максовить 5 баллт. 2 баллт – спортонь пелькстамосо изницятненень, ГТО-нь сырнень тешксэнть кисэ, 3 баллт – республикань олимпиадань ды пелькстамонь изницятненень.

Татьяна ИКОННИКОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».