Эрьва иень апрелень 16-це чистэ тешкстави Эрзянь ды мокшонь кельтнень весероссиянь чись. Тенень свал алтавкшныть промкст, вастовомат ды ламо лия мероприятият. Нейгак ульнесть конференцият, столь экшсэ кортамот, вастовомат. Вейкесь эйстэст – «Мордовские языки в диалоге культур» лементь ало промксось – ютавтовсь А. С. Пушкин лемсэ Национальной библиотекасо.
Сонзэ важодемасо ульнесть учёнойть, ВУЗ-тнэсэ ды школатнесэ тонавтыцят, студентт, образованиянь ды культурань учреждениятнень важодицят, эрзянь ды мокшонь кельтнень тонавтыцят, раськень редакциятнень важодицят, Эрзянь ды мокшонь раськетнень регионъютконь общественной вейсэндявксонь Исполкомонь члент ды седе тов. Вастовоманть лувсо кортавсь эрзянь ды мокшонь кельтнень ванстомадо ды виевгавтомадо, тешкставсть талновтыця кевкстематне ды сынст решамонь ёнкстнэ.
Промксонть панжизе Финнэнь-угрань раськетнень культурань Равчирень центрань прявтось Екатерина Модина. Екатерина Олеговна арсесь весенень домка ды лезэв важодема. МР-нь Культурань, раськень политикань ды архивень тевень министрань васенце полавтыцясь Александр Карьгин пурнавозтненень пшкадемстэ мерсь, истят кортамотне лездыть аволь ансяк панжомс мелявкстнэнь, истя жо тешкстамс кенярксов ёнкстнэньгак.
– Нама, эрзянь ды мокшонь кельтнень тонавтнемасо мелявтовтыця кевкстемат улить. Аволь весемесь эштё ашти парсте. Теке марто улить редявикс полавтоматкак. Пек паро, минек раськень кельтнень тонавтнемась совавтови эйдень кужотнесэ, – мерсь Александр Иванович. – Седе домка важодема эряви ветямс од ломантнень мартояк. Эйстэст течи ашти пек ламось. Сынь маштыть важодеме интернет-площадкатнесэ, ветить эрзянь ды мокшонь кельтнесэ эсь важодеманть соцсеттнесэ. Истят од ломантнеде эрявить седе ламо.
Самай те ёнкссонть эсь важодемадо промкссонть кортасть М. Е. Евсевьев лемсэ МГПУ-нь филологиянь факультетэнь 4-це курсонь тонавтницясь Константин Ещиганов, кона невтизе эрзянь-мокшонь фольклоронть юрсо теезь проектэнть, «Вайгель» радионь корреспондентэсь Оксана Белкина, кона вети интернет-блог мокшонь кельсэ, ды М. Е. Евсевьев лемсэ МГПУ-нь 5-це курсонь студентэсь Владислав Антонов. Владислав – «Моя страна – моя Россия» весероссиянь пелькстамонь участник. Те конкурсонть туртов сон анокстакшнызе «Развитие и продвижение аккаунта «Valmerevks» в социальной сети» проектэнть. Кода тешкстызе Владислав, аккаунтось теезь эрзянь кельсэ ды сонзэ прявт ёнксозо – эсь раськень келень ванстомась ды виевгавтомась.
Эрзянь ды мокшонь раськетнень регионъютконь общественной вейсэндявксонь прявтось, Мордовия Республикань Правительстванть юрсо гуманитарной наукань научно-исследовательской институтонь прявтонь полавтыцясь Юрий Мишанин кортась «Сохранение и развитие национальной культуры, государственных языков Республики Мордовия и других языков в Республике Мордовия» государственной программадонть. Сон тешкстызе, те программанть коряс течи ветяви покш важодема.
– Кода содатадо, программась тевс нолдави Мордовия Республикань Прявтонть А. А. Здуновонь мереманзо коряс. Ды топавтоманзо мельга ваннови пштистэ, – кортась Юрий Александрович. – Течи эряви ванномс, кода минек раськень кельтне тонавтневить школасо, кодат улить кевкстемат, мелявкст. Кода те важодемась ветяви лия регионтнэсэяк, косо эрить эрзят ды мокшот. Минек туртов те истя жо эрявикс. Программанть лувсо седе домка важодема ушодовсь Саранск ошсояк. Од проект нолдави ошонь общественной транспортсо. Бути кие меельце шкастонть ардтнесь 6-це № автобуссонть, марясь, лоткамо таркатне ней ёвтавить рузонь, эрзянь ды мокшонь кельтнесэ. Маласо шкастонть истя карми весе транспортсонть. Арсян, те ушодксось а берянь.
Седе тов кортамось ветявсь докладтнэнь коряс. Ванновсь, кода эрзянь ды мокшонь кельтне тонавтневить школатнесэ ды ВУЗ-тнэсэ, кодамо важодема ветяви од ломантнень марто, кода ветяви раськень кадратнень анокстамось. Истя, республикань Лямбирень райононь «Большеелховская СОШ» МБОУ-нь эрзянь келень тонавтыцясь Екатерина Паршина ёвтнесь, кода тиринь раськень кельтнень тонавтнеманть коряс тевтне молить сынст школасо.
– Ламо содамочить максовить эрзянь культуранть, койтнень-кирдатнень, фольклоронть вельде, – тешкстызе Екатерина Ивановна. – Эйкакштне покш мельсэ кунсолыть ды тонавтнить валморотнень, морынетнень. Превезэст седеяк кадови, бути ёвтнемстэ тевс нолдавить кодаткак кедьёнкст. Сынь алкукс бажить содамс эсь тиринь раськеденть, чарькодемс келенть.
Ансяк вана аволь весемесь лиясто ашти тонавтыцянть эйстэ. Кода тешкстызе Саранск ошонь 43-це № лицеень мокшонь келень тонавтыцясь Наталья Чернышова, кельтнень тонавтнемасо улить мелявтовтыця ёнксткак. Васняяк, эрзянь ды мокшонь кельтнень тонавтоманть лангс недлязонзо максови пек аламо шка – вейке час школасо важодеманть лангс ды пельчас аволь уроконь тевенть лангс. Теке марто тиринь кельтнень тонавтыцятне тешкстыть сеньгак, ней арасть отметкат. Те ёнксось пек полавты важодеманть. Эйкакштнень тонавтнемантень мелест лавшоми. Ламо стакачить лиснить тетятнень-аватнень мартояк, конат молить эрзянь ды мокшонь кельтнень тонавтнеманть каршо. Весе неть кевкстематнень алкукс эрявить ванномс ды муемс сынст решамонь ёнкст. Тень лангсо маласо шкастонть эрявияк важодемс.
Юлия Еремина
Фототне:
Эдуард РЕТУНСКИЙ