Неть читнестэ ёвтавсь Саранск ошонь «Иень воспитатель-2022» пелькстамонь изницясь. Те иесь яволявтозь Россиянь раськетнень искусствань ды аволь материальной культурной сюпавчитнень ванстомань иекс ды пелькстамоськак ютавтовсь тень юрсо. Сон аштесь кавто пельксстэ – заочнойстэ ды очнойстэ.
Мартонь 1-це чистэ саезь 31-це чис ульнесь заочной пельксэсь. Ёрокчист невтицятне дошкольной организациятнень интернет-сайттнэсэ ды педагогической сообществатнень лопатнесэ невтсть методической анокставксост, материалост, конатне пачтясть сынст профессиональной тевдест, ды «Мой педагогический маршрут» визитной карточкаст, конатнесэ ёвтневсь профессиональной ды общественной тевсэ пелькстыцятнень изнявкстнэде. Заочной пельксэнть коряс ливтевсть кемгавтово тонавтыцят.
Очной пельксэнтень кочказель «Монь педагогической муевксэм», «Педагогонь мероприятия эйкакштнень марто» пелькстамотнень ванномась. Неть пелькстамотнесэ вадрякс ёвтазельть сисем ломанть, конатне пурнасть седе ламо баллт. Сынь лисстькак финалс. Неть 5-це № эйдень кужонь музыкальной ветицясь Лариса Булатова, 44-це № кужонь воспитателесь Мария Гагарина, 80-це № эйдень кужонь воспитателесь Валентина Дыдыкина, 83 № эйдень кужонь воспитателесь Оксана Попкова, 85-це № эйдень кужонь воспитателесь Елена Пырчева, 99-це № эйдень кужонь тонавтыцясь-логопедэсь Татьяна Ерошкина ды 112 № эйдень кужонь воспитателесь Валентина Уронина.
Апрелень 15-це чистэ Саранскоень Культурань кудосо ошонь мэрэсь ёвтась поздоровт участниктненень. Игорь Ассабин тешкстызе: «Воспитателесь – вадря ды эрявикс профессия. Кие минек эйстэ а ледстни васенце тонавтыцянзо? Тынь сеть ломантне, кие тонавты эйкакштнень сехте прявтонтень ды эрявиксэнтень. Тевесь тынк а шожда. Воспитателентень эряви парсте содамс эрямонть, штобу маштомс тонавтомо. Кеман, тезэ пурнавсть вадрятнестэ сехте вадрятне ды эрьвантень лади «Иень воспитатель» лемесь.
Жюринть кемекстамонзо коряс жо «Иень воспитатель-2022» профессиональной ёрокчинь пелькстамосо изницякс кармась «Детский сад № 80 комбинированного вида» МАДОУ-нь воспитателесь Валентина Дыдыкина.
Арсетяно Валентина Владимировнанень улемс сехте вадрякс «Иень воспитатель-2022» пелькстамонь республиканской этапсонтькак.
Юлия Еремина