Вячеслав Юрьевич Заварюхинэнь Мордовиянь ломантне содасызь кода историкенть, ученоенть, краеведэнть ды коллекционерэнть, кона пурны кезэрень эрьва кодат кедьенкст ды ташто ярмакт.
Вячеслав Юрьевич нолдась 220 научной важодевкст, 20-те ламо книгат ды монографият. Публикациянзо лиснесть кода республикань, истя весероссиянь келес содавикс СМИ-тнесэ. Теде башка, эрзянь ды рузонь кельтнесэ сермады валморот. Минь вастневинек лиятнень енов а молиця те ломаненть марто ды кортнинек эрямодонзо-аштемадонзо.
Вячеслав Заварюхин чачсь Покш Березникбуень Судосева маласо вирень кордонсо. Тетязо, Юрий Михайлович, вирьваныцяль. Семиясонть эйкакштнеде котольть: кавто патят ды ниле лелят-ялакст. Вячеслав меельцель. Евтнематнень коряс, чачомадонзо мейле ковонь перть арасель лемезэ. Кода-бути тенст састь вельсоветстэ ломанть ды неизь эйкакшонть, кевкстизь, кода лемезэ, тенст мерсть, зярс кодаяк. Тесэ радиосо кортазевсь Вячеслав Молотов ды сонензэ путызь те содавикс ломаненть лемензэ. Седе тов эсь эрямодонзо Вячеслав Юрьевич евтни истя:
– Кода монень топодсь вейке ие, тетидем тусть Отяжбуень Сырезвелень кордонов. Тетям тосояк ульнесь вирьваныцякс-объездчикекс. Свалшкань эрямо таркакс тетям-авам рамасть кудо виренть вакссо аштиця Смирновка вишка поселкасонть. Школасо тонавтнемс савсь зярыя таркава. Вишка класстнэсэ тонавтнинь маласо аштиця Полянань школасо (Поляна ды Смирновка – Сабанцелень вельсоветс совиця поселкат), мейле Шейн-Майданонь школасонть-интернатсонть, косо эринек ды тонавтнинек лелянь марто, прядынь кавксо класстнэнь, а вана 9-10-це класстнэсэ тонавтнинь Дубенкань райононь Поводелесэ, косо тагояк эринек интернатсо. Эйкакш шкасто весе лелят-ялакст вечкинек книгань ловномо, те тевденть кияк эйсэнек эзь карда, эзть пане, кода лиятнень, «важодеме тинге лангов».
Школадо мейле Вячеславонь саизь Советской армияв: служась Закавказьясо (1975–1977), Тбилисисэ (Грузия) ды Азербайджан марто Иранонть (Персия) ютксо границясо, казезель «Отличник Советской армии» тешкссэ.
Армиядо мейле, 1978 иестэ, комсомольской путевкань коряс тусь тонавтнеме СССР-нь МВД-нь Горький ошонь высшей школав (ней – РФ-нь МВД-нь Нижегородской академия), ков сайсть ансяк церат ды ансяк армиядо мейле.
Курсантокс улемстэ уш кундась вооруженной преступник, кона тейсь зярыя саламот ды розбойной каявомат, мезень кисэ казезель «Отличник милиции» тешкссэ.
Ульнесь Московсо ютыця Олимпийской налксематнесэяк. Тень кисэ тензэ максозель Благодарность СССР-нь внутренней тевень министранть пельде ды «Участнику охраны общественного порядка на XXII олимпийских играх. Москва-80» тешксэсь. Вузонть прядомадо мейле макссть тензэ «правоведение» специальность, квалификациязо – «юрист», конань сон кандсь 40 иень перть.
Вячеслав Юрьевич ламо иеть служась ОБХСС-сэ, кассь, кода кортыть, служебной кузтемаванть. Службань коряс командировкатнень пингстэ ардтнизе, ловт, весе Советской Союзонть. Ды эряви тешкстамс, весе кудораськесэст лелятне-ялакстнэ военнойть: Михаил покш лелязо – внутренней службань полковник, Владимир – космической войскань подполковник, Николай ды сонсь Вячеслав – внутренней службань майорт. Эйкакшокс улезь, тенст покш примерэкс ульнесть тетянзо-аванзо кудораськетне: весе цераломантне (аванзо ендо колмо лелятне ды тетязо ялаксонзо марто) войнасольть.
– Тетянок-аванок – Сабанцелень. Тетям, Юрий Михайлович, чачсь 1924 иестэ. Эйкакш шканзо жо тетям ютавтызе Свердловсо, тосто, 1942 иестэ, лелянзо марто саезель войнав. Войнань шкане кучозель тонавтнеме Баку ошонь военно-морской училищав, тосто (авань валонзо коряс) ильтязель Пелевеёнксонь ведь алга укшныця венчсэ старшей торпедистэкс. Лездась пачтнемс Советской Союзов ленд-лизэнь коряс кучневиця ули-паронть. Зярыяксть, келя, сакшнось кудов. Ней чарькодеви: неть отпусктне максневсть васолга укшномадо ды ранявомадо мейле, пичксемга. Казезель «За оборону Советского Заполярья» медальсэ.
Тетям велявтсь войнасто инвалидэкс, зярыяксть ранязель. Нейгак сельмень икеле рунгосонзо стака румовкстнэ... Сонсь аламо ёвтнесь войнадонть. Содан: Пелевеёнксонть ванстась аволь ансяк ведьсэ — мода лангсояк, якась атакас... 1945 иестэ кучозель Бакув. Тосонь высшей военной морской училищань 3-це курссо тонавтнемстэ инвалидностень коряс ильтязель кудов – орматне эзть максо поладомс военной тевенть. Мерсть, улезэ перьканзо ванькс кошт, ды истя сон кармась роботамо вирьсэ…
Тетянь ялаксозо, Яков Михайлович, Отечественной войнанть ютызе авиациясо стрелококс-радистэкс. Бомбась Берлинэнть, Кенигсбергенть. Казезель «За отвагу», «За победу над Германией» медальтнесэ. Архивстэ таргинек весе наградноест авань ендо лелятненьгак...
Шкась юты пек эрязасто, эзь марявояк, кода сонсь Вячеслав лиссь пенсияс. Кода содатано, МВД-нь важодицятнень ильтить пенсияс ранаяк. Ансяк В. Ю. Заварюхин эзь тонадо аштемс тевтеме. Церась свал бажась од содамочитненень ды очна прядызе МР-нь Правительстванть юрсо ГН-нь НИИ-нь аспирантуранть, косо идизе «Памятники нумизматики и бонистики в региональном историко-культурном процессе (на примере Мордовского края)» лементь ало пек мельстуиця диссертациянть.
– Диссертациясь вадряль, темась аволь костояк «салазь», педе-пес эсень. Сермадынь ярмак ланга, кияк эдь а соды, што эрзятнень ды мокшотнень ульнесть эсест государственной образованияст, эсест ярмакост. Н.Ф. Мокшин профессорось кевкстнесь, косто материалонть саик? Мерян, те материалонть 20 иеть пурнынь, сон дивсесь тенень. Диссертациянь идемась сэтьместэ ютась, кияк кодаткак кевкстемат эзь максне. Паряк, теде а содыльть, ней мон тень ланга апак лотксе евтнян, книгасонгак невтезь, кодат ярмакт ульнесть минек кезэрень раськенть: сиянь мордовкат – колмо уголсо, овальнойть, чеканязь, пижень (медной), латунень, бронзань. Нолдынь «Каталог денежных знаков Мордовского края». Россиянь ярмактнень ютксо панжинь од муевкст, конатнень лангсо ульнесь сермадовкс: «Контора Вырыпаевской экономии» (ней МР-нь Ромодановской район). В.А. Юрченков ученоенть-краеведэнть марто сынек чарькодемас: 1905 иень Рузаевской Республикась тевс нолдась кода 3 целковойс бонат (эсь ярмакт), истя жо лия ярмакт…
Аспирантуранть прядомадо мейле исторической наукань кандидатось В.Ю. Заварюхин кармась тонавтомо студентт Кооперативной институтсо, косо ульнесь публичной правань кафедрань доцентэкс. Тонавтсь весе юридической дисциплинатнес: «уголовное право», «уголовный процесс», «криминология», «криминалистика», «преступления в сфере экономической деятельности», «предупреждение преступлений среди несовершеннолетних» ды лия. Сонзэ студенттнэ сайнесть васенце таркат весероссиянь пелькстамотнесэ ды научной важодевксэнь олимпиадатнесэ.
Вячеслав Юрьевич вейсэ тонавтыцянзо ды роднянзо, профессоронть, исторической наукань докторонть Н.В. Заварюхин марто нолдасть: «Дубенский район. История. События. Люди» ды «Сабанчеево и Мордовские Дубровки. История и современность» тиринь енкссто научной книгат. Ризксэнтень, Николай Васильевич тусь эрямосто апак учне, стака ормадо…
Теде мейле Вячеслав Юрьевич архивной материалтнэнь лангс нежедезь нолдась: «Смирновка и Ульяновка: к 100-летию образования Полян» покш исследования.
Наукасо важодемадонть башка Вячеслав Заварюхин сермады рузонь ды эрзянь кельтнесэ валморот. Эрзякс лиссть колмо пусмонзо: «Тиринь енкс», «Сан мон апак учо», «Карми валдо чись: стихть, баснят, поэмат». Рузокс: «Васильковое море», «Четверостишия», «Всполохи». Меельце пусмонть лангсо невтеви умонь шкань вейсэнь фотось, косо ашти тетязояк китаень шелконь панарсо. Ве ено ашти лишме вакссо цера. Лишмесь ломанденть неяви седе алкинекс, те видеяк, вакссонзо аштиця церанть сэрезэ 2 метрат 20 сантиметрат. Ломантне жо састь Смирновкав ды учить чиполаст ташто ведьгевенть икеле, конань вакссо аштесь Заварюхинтнэнь кудост.
Нама, эрзянь келентень вечкемась сась Вячеславнень кудораськестэ. Сонзэ мазычиде ды келейчиде ученоесь корты истя:
– Эрзянь кельсэ ламо падежт, кавксть седе ламо рузонседенть. Ды тень коряс келесь седе тюсовсто невти пертьпельксэнть. Модась-масторось, лейтне, лей чиретне, пиже виртне, мерят, налксезевить зярыя тюссо. Келенек пек мазый ды ламо мезе эйсэнзэ евтави. Темат валморосон панжан эрьва кодат: тиринь пертьпельксстэ, вечкемадо, Паздонть, валонть ланга, кода сон евтави. Пек ризнан эсенек масторонть кис… Вана курок лиси эрзянь кельсэ башка пусмом, косо пурназь басням, истят, кода: «Баран ды Ортат», «Реве ды Верьгиз», «Псака ды Чеерне» ды ламо лият. Эйсэст кортави аволь шожда обуцядо ды превтемечиде…
Паро ялгам ульнесь Саша Арапов. Ветешка иеть туемадонзо мейле эзинь совсе «Сятков», ризнынь, те пек покш емавксось эрзятнень туртов. Ялгакс теевинь ламо писательтнень ды поэттнэнь марто «Собеседник» куросонть. Седеетькак лавшоми кунсолозь, кода эрьвась евтни эсензэ валморонзо. Тематне тосо эрьва кодат, меельцеде ловнынек войнадо, кода яттнэ саексэлизь моданок Ине Отечественной войнанть шкасто. Нейгак масторонок печти стака шкат. Ансяк, кода яттнэ сыть, минь весе вейсэндявтано ды мездеяк а пельтяно, зярдо эряви, цидярдтано, аноктано эсенек седеенекак кадомс толбандянь паксяс…
Вячеслав Юрьевичень ули вечкевикс семиязо. Низэ, Светлана Федоровна, чачсь-кассь Дубенкань райононь Орданьбуесэ, 45 иеть важодсь терапевтэкс. Трясть кавто эйкакшт, Екатерина тейтерест историк, цераст, Федор, пек вадря адвокат. Кавонест университетэст прядызь якстере диплом марто.
Неень шкасто В.Ю. Заварюхин анокстась сисемшка покш важодевкст, конат зярс апак нолда ярмаконь аразьчиденть.
Марина Агафонова