Пятница, октября 23, 2020
Важное

Те иень апрельстэ Лямбирень райононь Аксёнова велесэ ушодовсь покш тев: Тесэ кармасть школань стявтомо.

Ташто школантень ведьгеменде ламо иеть, сон пек таштомсь, ашти ве ёно ды тов пачкодемга кись весе яжазь. Эрицятне усксить эйкакшост тонавтнеме Саранскоев ды Покш Елховкав. Мелят Аксёновась тешкстынзе 350 иензэ. Велесь покш. Тесэ эрить малав 1300 ломанть. Ламот эйстэст татарт.
Школань стявтомадо кулясь пек кецявтынзе эрицятнень. Кода ёвтни велень прявтось А.Ж. Юсупов, сынь тень учость 40 иеть.

– Мон чачинь Аксёнова велесэ. Тонавтнинь Н.П. Огарёв лемсэ МГУ-нь историянь факультетсэ. 38 иеть важодинь школасо. Ледстнян, кода армиядо мейле, 1980 иестэ, сынь школав ды карминь важодеме военрукокс. Весе кортасть: тон уцяскават, сы иестэ од школа строить. Ансяк эрямось ладизе лиякс. Од школанть учинек, ловт, ниленьгемень иеть. Сестэ школасонок тонавтнесть 600-700 эйкакшт.
Телевизорга кулянь ваномсто, зярдо невтильть косояк школань панжома, седеесь скирятыль. Эх, миненекак эряви школа. Ней прок Пазось маримизь. Сюкпря райононь прявтонтень Ю.И. Головнень ды МР-нь Прявтонтень В.Д. Волковнень. Те сынст мелест, виест, вешемаст коряс тевесь сыргась таркастонзо. Од школанть пек учотано. Минь, весе эрицятне, покш кемема марто вантано, кода юты школань стявтомась. Арседе тынсь, кода учить од школанть эйкакштне! Тесэ кармить тонавтнеме нуцькан, – корты А.Ж. Юсупов. Сонзэ кунсолозь, истя жо кецят паро полавтоматненень.

Эряви меремс, школань стявтомась совавтозь «Образование» национальной проектэнтень, ярмактне явовить федеральной ды республиканской бюджеттнэстэ. Школанть сметной питнезэ – 197 млн. целковойть. Кавто этажсо зданиянть стявты «Строитель» ООО-сь.

– Школась карми 165 тонавтницяс. Весе юты графикень коряс. Эрьва недля пурнатано планёркат, кортасынек стакачитнень ды лия кевкстематнень. Ней вельтить латонть, потсо молить витнемань-мазылгавтомань тевтне. Электриктне ветясть электричества ды Интернет. Карми покш столовой, арсетяно, кодамо теемс дизайн. Карми актовой зал эрявикс аппаратура марто. Спортзал, косо карми эрявикс спортинвентарь. Школасонть карми неень шкань пек паро оборудования. Информатикань ды биологиянь кабинеттнэсэ – эрявикс кедьёнкст. Васенце этажсонть карми начальной школась. Класстнэнь каршо улить удомань таркат. Школанть вакссо ушодсть стявтомо стадион, карми футболсо налксемань пакся. Кецявты эйсэнек ушось, лембе ды маней. Ансяк эряви пштистэ ваномс качестванть мельгаяк, – корты Аксёновань средней школань прявтось М.Г. Каштанов.

– Максим Геннадьевич, зяро эйкакшт кармить тонавтнеме школасонть?
– Тесэ кармить тонавтнеме 73 эйкакшт. Зярыя кармить усксеме Иняты велестэ. Тонавтницятнеде кармить седеяк ламо. Кой-кить берянь киденть усксить эйдест ошонь школав (сынсь важодить ошсо). Кода тенек алтасть, килангонть Аксёновасо витнесызь. Од школась ашти пек паро таркасо. Эйкакштнеде велесэ ламо, ансяк арась эйдень кужо.
Максим Геннадьевич Каштанов – од ломань, эрзянь цёра. Сон чачсь Лямбирень райононь Александровка велесэ. Тетязо-авазо – Орданьбуень райононь Пиксяси велень. Сынь эрясть Покш Елховкасо, косо сон прядызе школанзо, ды мольсь тонавтнеме М.Е. Евсевьев лемсэ сестэ МГПИ-в. Прядызе тонавтнеманзо «История и право» специальностенть коряс 2010 иестэ. Ие служась армиясо. Армиядо мейле вейксэ иеть важодсь Покш Елховка велень школасо тонавтыцякс. Ветясь история, обществознание, ОБЖ. Сонензэ макссть васня васенце, мейле – тонавтыцянь высшей категория. Од тонавтыцясь нолдась кавто класст. Варчинзе виензэ «Иень тонавтыця» райононь пелькстамосо. Валонзо коряс, те конкурсось пек лездась тензэ. Макссь вийть, од мельть ды арсемат, од содамочить. Сон лиякс кармась ваномо тонавтома тевенть лангс.

Тонавтыцясь кенери важодеме школасояк, яви мель общественной тевтненень. Сон – Покш Елховка велень депутатонь советэнь депутат. Од ломаненть редизь. Кизна райононь прявтось тердизе ды мерсь улемс Аксёнова велень школань прявтокс. Ды ней малав эрьва чи М.Г. Каштанов стройкасо. Тевтнеде ды мелявкстнэде ламо. Башка тев ветяви эйкакштненень ливксэнь путомань коряс. Ломантне а содытькак, мезекс те эряви.

Школань стявтоманть арсить прядомс те иень декабрясто. 2021 иень январьстэ сон панжсынзе кенкшензэ кенярдыця эйкакштненень ды тонавтыцятненень. Тесэ гайгезеви баягинесь, школась пешкеди эйкакшонь весёла вайгельтнеде.

Татьяна Маторкина.
Фототне Эдуард Ретунскоень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».