Пятница, марта 29, 2024
Важное

Эх, эрямо, эрямо! Кие пингень перть экшели славасо, кие жо
кодамо паро илязо тее, кода парсте илязо важоде, кияк а редясы…


Монь ули мелем ёвтнемс Луховка посёлкань «Луховский лицей» МОУ-нь рузонь келень ды литературань, эрзянь келень тонавтыцядонть, эрзянь авадонть Нина Акимовна Девинадо.

Нина Акимовна Девина (тейтерьксэнь фамилиязо Дудникова) чачсь-кассь Покш Березникень райононь Шугурова эрзянь велесэ ламо эйкакшонь триця семиясо. Аким Исаевич ды Анастасия Павловна Дудниковтнень ульнесть вейксэ эйкакшост. Сынь, кода се шкань велень ламо эрицятне, важодсть колхозсо, трясть эйкакшост. Ансяк те эрямонь сэтьмечинть колызе войнась.

1942 иестэ Аким Исаевичень саизь ятонть каршо тюреме. Анастасия Павловна кадовсь вете эйкакш марто ськамонзо. Сехте покшонтень, Васянень, ульнесь кевейкее ие, вишкинентень, Палайнень, жо ансяк вейке ие. Шкатне пек стакальть. Ламот кирдсть вачочи, пенгетькак арасельть, штобу уштомс кудотнень. Сынст мельга тельня, цят якшамоне, салазке марто якильть вирев, пурныльть тарадт ды уштыльть кудотнень. Анастасия Павловна, куш ульнесь сэрьс а покшке ды пек ёлганя, ялатеке виевель. Войнань шкань вачочинть ды лия стакачитнень лангс апак вано, ванстынзе весе эйкакшонзо.
Аким Исаевич жо идесь масторонок яттнэде. Войнанть прядызе Будапештсэ.

Сон казезь «За боевые заслуги» (20.06.1944 ие), «За победу над Германией в Великой Отечественной войне 1941-1945 гг.» (09.05.1945 ие) медальтнесэ, Якстере Тештень орденсэ (18.09.1945 ие) ды Отечественной войнань II степенень орденсэ (06.04.1985 ие).

Кудов Аким Исаевич велявтсь 1945 иень сёксня. Войнадо мейле, истякак покш семиясь, седеяк покшолгадсь. Сынст чачсть эштё ниле эйкакшост, конатнень ютксо веженсесь Нина. Нася патясь, истя тензэ мерильть велесэ, Нинань чачтызе 47 иесэ. Вейксэнест эйкакштне кассть кунсолыцякс, кодамояк роботадо а пелицякс, вейке-вейкенень лездыцякс. Школанть прядомадо мейле эрьвась эстензэ кочкась мельстуиця профессия. Сынст ютксо ульнесть тракторист, скалонь потявтыцят, железнодорожник, моряк, бухгалтер. Нина жо кочкизе тонавтыцянь тевенть.

Школанть парсте прядомадо мейле од тейтересь сайсь мель молемс тонавтнеме Мордовиянь М. Е. Евсевьев лемсэ государственной педагогической институтонь (ней университет) филологиянь факультетс. Тонавтнема шкась эзь марявояк, кода ливтясь. Ды 1980 иестэ саезь сон – Луховкань средней школань тонавтыця. Секе жо иестэнть сонензэ макссть класс ды ладизь классной руководителекс. Кодамо покш талнома ульнесь од тейтеренть седейсэ, течинь чис ашти мельсэнзэ. Лангс ванозь, сонсь эштё «пиже» эйкакш, а уш тонавтыця! Класстнэсэ ламонь-ламонь тонавтницят. Эрьвантень эрявсь явомс мель, эдь эрьва эйкакшонть эсензэ обуцязо. Кие саеви сёвномасо, кие шнамосо. Тонавты эйсэст арсеме, эсест мелест-арсемаст ёвтамо. Нина Акимовна эрьванть марто мукшны кель-вал. Сон обуцянь коряс шожда ломань, вечки пеедькшнеме ды чарькоди пеедькшнематнень, вечки якамс кинов ды театрав, ловномс ламо художественной ды лезэв литература.

Ламо иень перть Девина ульнесь Луховкань школань завучокс. Тонавтыцясь кодат ансяк мероприятият а ютавтни эйкакштнень марто, эрьва кодат олимпиадатнесэ участвовить. Невтемакс, 2013 иестэ сонзэ тонавтницязо Заварцев Андрей кармась изницякс республикань сочинениянь конкурссонть «Войнасо киртазь од пора» теманть коряс. Сон алтазель воинтнэнень, конат маштовсть Северной Кавказсо боевой действиятнень пингстэ, 2015 иестэ Родькина Алина кармась эрзянь келень коряс Республиканской олимпиадань муниципальной этапонь призёрокс ды истя седе тов. Пандемиядонть икеле яксесть экскурсияв, ардтнесть эрьва кодамо ошов.

Теке жо Луховка посёлкасонть сон вастызе вечкевикс мирдензэ, Павел Серафимович Девинэнь, кона истя жо ульнесь Шугурова велень, ансяк вейкест-вейкест эзть сода. Ютксост кирвазсь вечкема ды сынь урьвакстсть-венчасть. Павел Серафимович важодсь теке посёлкань совхозсо бригадирэкс. 1996 иестэ чачсь сынст кувать учовикс, вейкине цёрынест Сергей. Кенярксонтень пе арасель. Сергей кассь кунсолыцякс, превей эйкакшокс. Школанть прядомадо мейле тонавтнесь М. Е. Евсевьев лемсэ МГПУ-со.

Теке шкастонть Нина Акимовна мирдензэ марто эзизь кадо Нина Акимовнань сыре тетянзо-аванзо, конатне сестэ уш эрясть Луховка маласо, Макаровка велесэ. Сынь пекстызь эсь квартираст ды тусть эрямо ваксозост. Якасть мельгаст. Куломадост мейле велявтсть одов эсест квартирав.

Кода корты Нина Акимовна, семиясо вишка эйкакшонтень явови сехте ламо мель ды вечкема. Ансяк касозь, сонензэ эряви велявтомс те вечкеманть одов. Эдь тетятне-аватне, лелятне ды патятне сыредить ды сыненст эряви явомс ламо мель.

Истя уш эрси, эрьва ломаненть эрямосо улить кенярксткак, кажоткак. Нина Акимовнань эрямосояк ульнесть эрьва кодат шкат. Пек уш стакаль 2016 иесь. Те иестэнть мельга-мельцек апак учо тусть эрямосто Нина Акимовнань кавто патянзо, патянзо мирдезэ, лелязо ды вечкевикс мирдезэ. Мейле саизь армияв вейкине цёрынензэ. Сон арсесь, а цидярды. Те виев авась, марявсь, синдевсь, ормалгадсь. Ансяк школасо важодемась ды лелянзо-патянзо эйкакштнень пельде мелень явомась макссть тензэ вийть.

Ютась те стака шкаськак. Армиясто сась Сергей цёразо, урьвакстсь. Шкань ютазь чачсь Варя тейтернезэ. Нина Акимовна теевсь сырькаекс, ансяк, тень лангс апак вано, мерят, одкстомсь. Юткошканзо ютавты нуцькинензэ марто. Сынь эрить вейсэ, ояксчисэ. Сергей важоди Мордовиянь МЧС-сэ, Карина урьвазо – фармацевтэкс.

Нина Акимовна те шкас важоди школасо тонавтыцякс. Сонзэ васенце категориянь квалификациязо, казезь РФ-нь Образованиянь ды наукань Почётонь грамотасо, Саранск ошонь округонь Администрациянь Социальной политикань коряс департаментэнь Почётной грамотасо. Важодемань стажозо – 42 иеть. Те шканть перть сон нолдась сисем класст. 2021 иестэ Девина таго нолдась 11-це класс. Классонть ульнесь 21 тонавтниця. Нина Акимовнань кенярксонтень сынст ютксто кототне – медалистт, рузонь келень коряс экзаментнэнь жо ламотне максызь 96 баллс.

Тонавтницянзо ютксо улить эрьва кодамо профессиянь ломанть, бути арась ансяк космонавт. Сынь срадсть масторлангонь келес. Ансяк зярдояк а стувтнить вечкевикс тонавтыцяст. Гайневтить, кевкстнить шумбрачидензэ, сакшныть инжекс. Тедеде сон таго сайсь 5-це класс. Те оймамонь а содыця аванть лангс ванозь, эрямонть лангскак кармат ваномо лиякс, мелеть кепети паро тевень тееме.
Нина Акимовна, ульть свал шумбра, уцяскав, эрямонь ды ломанень вечкицякс! Кадык тонавтницят тонь лангсто саить пример!

Мария Яксяргина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».