Пятница, октября 23, 2020
Важное

Октябрянь 1-це чистэ Н.П. Огарёв лемсэ МГУ-сь тешкстызе МР-нь Высшей школанть чачома чинзэ. Эстензэ вузонтень топодсть 89 иеть.

 

Те чистэнть Большевистской куросонть аштиця тонавтнемань васенце корпусонть икеле ютавтовсь торжественной промкс, конась тейсь ушодкс юбилеень мероприятиятненень. Эдь сы иестэ кармить тешкстамо 90 иетнень.

Виде, пандемиянь а шожда шкась совавтсь полавтомат кенярксчинть ютавтомантень, икеле пурнавкшность вейс ков седе ламо ломанть. Неень шкасто од ломантне топавтсть весе шкань вешематнень.

Кенярксчистэнть сыненст поздоровт ды паронь арсемат ёвтасть: Мордовиянь Н.П. Огарёв лемсэ Национальной исследовательской государственной университетэнь ректорось С.М. Вдовин, вузонь президентэсь Н.П. Макаркин, математикань ды информационной технологиянь факультетэнь деканось, трудонь ветеранось И.И. Чучаев. Сынь вейсэ университетэнь студентэнь ды аспирантонь профкомонь прявтонть Н.М. Андрюшечкина, студсоветэнь прявтонть Н.Н. Шевороков марто путсть ушодкс МГУ-нь 90 иетнень топодемантень алтазь «90 казнеть ды од ушодкст тиринь региононть лезэс» программанть топавтомантень.

– Минек республикань ледстневиця читнень ютксо вана уш комсь иень перть тешкстави покш дататнестэ вейкесь – Мордовия Республикань Высшей школань чачома чись, – мерсь С.М. Вдовин. – 89 иеде икеле топавтовсь эрзя-мокшонь эрицятнень покш мелест – эсенек регионсо тонавтнемань высшей заведениянть панжомась!

Истя, 1931 иень октябрянь 1-це чистэ ушодовсть занятиятне Мордовиянь агропединститутсо.

Ректоронть валонзо коряс, васень кемень иетнень перть эйсэнзэ анокстазельть тёжат специалистт. Эдь се шкане пек эрявсть од кадрат: тонавтыцят, велень хозяйствань кепедицят ды виевгавтыцят. Ине Отечественной войнанть прядовомадо мейле минек экономикась пурнась вийть, кармась кемекстамо. Республикась аграрнойстэ теевсь индустриально-аграрноекс. Се шкане пек эрявиксэкс ульнесь од предприятиятнень панжомась, весе отраслятнесэ тевтнень паролгавтомась, секс васень таркасо ульнесь тевест парсте содыця, покш квалификация марто од кадратнень анокстамось.

Шкань ютазь сон теевсь ламо профилень вузокс, конась течи содавикс аволь ансяк минек регионсо, истя жо Россиянь келес ды сонзэ томбале.

– Покш важодема теезель аволь вейке пингень перть. «Огаревецтнэнь» путовксост вельде, васняяк, сетнень, кить макссть домка содамочить ды течияк поладыть тонавтомо студенттнэнь, – мерсь С.М. Вдовин. – Теньсэ покш путовксост студентэнь ламот поколениятнень, кить тесэ тонавтнесть ды нейгак поладыть те тевенть, те – вейсэнь покш путовкс университетэнть весе сообществанть ёндо. Миненек лезкс максыть республикань прявттнэ, РФ-нь Президентэсь В.В. Путин. Весе тень вельде вузонок течи сови Россиянь ды Раськеютконь сехте паро тонавтнемань заведениятнень юткс. Истя жо сон ашти Россиянь сехте паро 21 вузтнэнь ютксо.

Кода мерсь вузонь президентэсь Н.П. Макаркин, течи вузсонть тееви весемесь седе домкасто науканть тонавтнемга, сонзэ коряс программанть топавтомга. Тонавтницятненень пшкадемстэ тешкстась, штобу сынь седе ламо мель явовольть эсь пряст лангсо важодемстэ, содамочист ламолгавтомсто.

Седе тов сон ёвтась седейшкавань поздоровт весенень, васняяк, ветерантнэнень, кить ламо иень перть ды нейгак максыть весе содамочист, виест тесэ тонавтницятненень. Сюкпрянь валт тонавтыцятненень ды студенттнэнень, кить ламо ёнксонь коряс теить содавиксэкс минек вузонть.

Вузонть чачома чистэ С.М. Вдовин ламо казнеть макссь студенттнэнень, тонавтыцятненень ды тосо важодицятненень.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».