Течи Печатень кудосо ютавтовсь пресс-конференция МР-нь Правительствань Председателень полавтыцянть Галина Лотвановань, МР-нь Образованиянь министранть Галина Явкинань ды лиятнень марто. Кортамось мольсь тедеде ЕГЭ-нь максомадост.
Кортасть ЕГЭ-нь максома лувдо
- Подробности
- Категория: Образование
Г.А.Лотванова пачтясь, тедеде республикасонть школаст прядызь 3305 эйкакшт. Государственной вейкине экзаменэнь максомо жо кармить 3294 эйкакшт. Ледстясынек, 11-це классонь прядыцятне, конат бажить поладомс тонавтнемаст СПО-сэ, саевить тов аттестатонь коряс. Кинь жо ули мелезэ молемс тонавтнеме вузов, эряви максомс ЕГЭ-ть.
Мордовиясо экзаментнэнь максоманть туртов теезь 22 таркат ды эштё вейксэ таркат – кудосо.
Мордовиянь Образованиянь министранть валонзо коряс, тедеде 11-це классонь весе прядыцятненень максозь аттестат, конаськак эйстэст эзизе прядо школанть справка марто.
Галина Лотванова мерсь, экзаментнэ ушодовить медьковонь 3-це чистэ ды прядовить медьковонь 25-це чистэ. Дополнительной шкась карми умарьковонь 3-8-це читнестэ. Экзаменэнь максомань весе таркатнесэ кармить топавтовомо сэтьмечинь весе вешематне. Совамсто карми онкставомо температурась, шлявить кедтне. Ваньскавтовить весе класстнэ-нупальтне. Экзаменэнь максыцятне кармить озадо вейкест-вейкест эйстэ 1,5 метрадо аволь седе маласо. Экзаменэнь ютавтыцятне кармить маскасо ды перчаткасо, те а токши эйкакштнень. Теде башка, экзаменэнь анокстыцятнень-ютавтыцятнень пельде саевить анализт коронавирусонть лангс.
- Экзаментнэнь ушодовомс кадовсть кавто недлят. Эйкакшт, ванстодо эсь прянк. Экзаментнэ – те тынк вандынь чинк, сынст эйстэ ашти эрямонь тевень кочкамось. Вешематнень а топавтомась, апак арсе теезь эскелькстнэ ве шкасто полавтсызь весе бажамонк-арсеманк. ЕГЭ-с учотанок тынк шумбракс, эсь вийтнес кемицякс, анокстазекс, - мерсь Галина Лотванова.