Кочкуровань райононь Семилеень средней школась панжозель 1979 иестэ. Неень шкасто тесэ тонавтнить 157 эйкакшт, конатнень эйстэ 80 якить тей шабра велетнестэ – Красномайскойстэ, Од Мурзасто, Ташто Мурзасто, Воеводскойстэ. Иеде икеле школанть прявтокс аравтозель эсь тевень содыця специалистэсь Андрей Иванович Истляев.
Андрей Иванович 25 иеть роботась Красномайскоень школасо. Ветясь математика ды информатика. Зярдо тосо школанть пекстызь, тонавтницятне ды тонавтыцятне ютасть Семилеень средней школав.
Андрей Истляев кармась ветямо физика ды информатика. Ней, вейсэ прявтонь тевтнень марто, А. И. Истляев вети «Теория вероятности» предметэнть, дополнительной образованиянь коряс – робототехниканть. Те ёнкссонть эйкакштнень марто невтить ёрокчист республикань пелькстамотнесэ ды олимпиадатнесэ. Ютазь иестэ Мордовия Республикань Прявтонь казнензэ лангс пелькстамосонть Андрей Ивановичень тонавтницязо сайсь омбоце тарка.
– Коллективесь минек пек вадря, весе опыт мартот, важодить ламо иеть. Семилеень школасонть весемезэ лововить 28 тонавтыцят, улить од специалистэнекак. Кадратнень коряс кодаткак мелявкст арасть, – ёвтни Андрей Иванович. – Тонавтыцятнень ютксо улить Мордовия Республикань образованиянь заслуженной роботникть, зярыя истят, кить тешкстазь Российской Федерациянь Просвещениянь министерствань «Отличник просвещения» знаксо, высшей категориянь тонавтыцят. Минек тесэ роботыть эсь тевень содыця алкуксонь специалистт, конатне профессиянтень максызь эрямост.
Эряви ёвтамс, од ломантнеяк Семилеень школав важодеме сыть покш мельсэ. Меельце иетнестэ састь кавто специалистт. Важодить психологокс ды прявтонь советникекс.
– Неть эсенек школань прядыцятне. Тонавтнесть вузсо ды дипломонь получамодо мейле велявтсть мекев эсест школав, – ёвтни Андрей Иванович. – Ней нолдави истямо ёнкс, кода договоронь коряс вузсо тонавтнемась. Вейсладямо тешкстави вузонть, тонавтницянть ды важодема таркань максыцянть ютксо. Ней минек истят договорт улить ветешка ломань марто. Зярдо тонавтнемаст прядсызь, сыть миненек важодеме. Школань коллективесь эштёяк одкстомтови. Секскак тонавтыцятнень арасьчинь коряс мелявкст минек овсе арасть. Минь арсетяно вандынь чиде ды эсь туртов кадратнень анокстатано уш течи.
Икеле ёвтынек, школасонть тонавтнить вете велестэ эйкакшт. Весе сынь школав ды мекев кудов пачтявить автобуссо. Школанть улить колмо автобусонзо ды стакачить эйкакштнень пачтямонть коряс а лиснить. Автобустнэ пек лездыть лия тевтнесэяк: эйкакштне ардтнить ве ёно ютавтовиця мероприятиятнес, лия ошов экскурсияв. Ней вана, сёксень каникулатнестэ, истя жо арсезь экскурсият.
– Эряви тешкстамс, минек тонавтыцятне эсь тевентень кандовить творческой ёнкс марто. Сынь парсте чарькодить эрьва тонавтницянть, редить эрьванть содамочитнень, ёрокчитнень ды вешематнень, маштыть муеме мартост кель-вал. Парсте содыть, мезе эряви неень шкань эйкакштненень. Секскак уроктнень ветить истя, штобу покш мельсэ кунсоловоль эрьвась. Тонавтомань лувонтень совавтыть интеллектуальной пелькстамот, эрьва кодат просветительской ды культурной мероприятият. Ды домкасто ванныть сень мельга, штобу неть пелькстамотнесэ ды мероприятиятнесэ эсь ёрокчинть невтевлизе эрьва тонавтницясь.
Паряк, тень кувалма Семилеень средней школань тонавтницятне сеедьстэ лиснить изницякс райононь, республикань ды мастороньгак пелькстамотнесэ, олимпиадатнесэ. Свалшкане примить участия эрьва кодамо кевкстематненень алтазь конференциятнесэ ды форумтнесэ.
Тешкстасынек, Семилеень школасо класстнэ пурназь весе. Ды тонавтницятнеде эрьвасонть лововить аволь аламо, кавксоце класстнэде натой кавто. Велень школанть туртов те пек вадря. Пек виев 10-це классось. Сынь тонавтнемантеньгак явить покш мель, общественной важодемантькак ве ёнов а кадыть. Прявтонть валонзо коряс, неть тонавтницятнень ютксо кармить зярыя медалисткак.
Кода мерсь Андрей Иванович, сы иестэ васенце классоськак пурнави аволь вишкине, учовить косо-бути 17 эйкакшт. Ней эрьва субутасто сынст туртов важоди «малышкина школа». Вишкинетнень туртов занятиятне ушодовить валскень 10 чассто. Сынст тонавтыцясь аволь ансяк содавты школань койтнень марто, истя жо ветяви тонавтома прявт предметтнэнь коряс – математиканть, рузонь келенть, пертьпельксэнть.
Семилеень школась овсе а явови ошонь школатнень эйстэ. Зярыя иеде икеле тесэ панжозь «Точка роста», явови мель физико-технической ёнксонтень. «Точка роста» куронтень совить химиянь, технологиянь кабинеттнэ, панжозь шахматсо налксемань туртов ды робототехникань кабинетт. Робототехникась явозь колмо курос – БЛА-тнень теемань ёнксось, 3D-принтерсэ важодемась ды сонсь робототехникась. Дополнительной тонавтоманть туртов истя жо ули агрокласс. Те ёнкссонть важодемась ветяви омбоце классто саезь.
Те весемесь пек паро. Берянь се, Семилеень школась, конась свалшкане ульнесь национальнойкс, зярыя иеде икеле, зярдо сонзэ юрс вейсэндявсть шабра велетнень школатне, те ёнксонть полавтовтызе. Ней эрзянь келесь ветяви ансяк 5-це, 6-це ды 7-це класстнэсэ. Недлязонзо явови вейке час. Нама, те пек аламо. Ды уроктнестэ кодаткак отметкаткак а путневить. Те корты седе, предметэнтень эйкакштне кандовить мельде-валдо. Тень лувсо эрзянь раськень эйкакштнеяк аламо шкань ютазь овсе рузыить ды тиринь келентькак стувтсызь. Самай те пек мелявтовтыяк.
Патриотической
ёнксось – эрявикстнэстэ вейкесь
Пек покш мель Семилеень школасонть явови патриотической ёнкссонть важодемантень. Тонавтнемань эрьва недлясь ушодови масторонь флагонть кепедемасто ды эрявикстэнть кортамотнестэ. Покшнек-вишкиненек тешкстыть, те пек эрявикс ёнксось. Тесэ зярдояк а стувтнить эсь велень геройтнеде, конатне невтизь пряст Ине Отечественной войнанть шкасто, Чеченской ды Афганской войнатнесэ, зыянов лия шкатнестэ. Ламо кортави специальной военной операциядонть. Семилеень, Воеводскоень, Од Мурзань, Красномайскоень ды Ташто Мурзань цёратне течи вейсэ лиятнень марто ванстыть Тиринь масторонь сэтьмечинть. Геройтнень лемс школасонть панжозь ледстнемань лазт, «Героень Партат».
Тонавтыцятне ды тонавтницятне истя жо снартнить теемс эсь путовксост вейсэнь тевентень – сынь кодыть кекшемань алтымат, пурныть гуманитарной лезкс. Пек бажить куш мейсэяк лездамс минек цёратненень.
Профессиянть кочкизе эштё школасо
Андрей Иванович Истляев чачсь-кассь Кочкуровань райононь Красномайск велесэ. Прядызе тосонь школанть ды тонавтнесь М. Е. Евсевьев лемсэ МГПИ-нь (ней – университет) физико-математической факультетсэ. 1997 иестэ мекев велявтсь тиринь велень школав. Ансяк ней уш тонавтыцякс. Ды 25 иень перть роботась эсест школасо.
Тонавтыцянь тевенть Андрей Иванович кочкизе эсь мельсэ. Раськесэст те профессиянть марто сюлмавозь кияк арасель. Сон жо школасо тонавтнема шкасто пек вечкилизе математиканть, ды уш средней класстнэсэ эстензэ кемекстызе, карми тонавтыцякс ды ветямо те предметэнть.
Весемезэ жо важодемань иетнень перть покш килангов Андрей Истляев нолдась вете выпускт. Эйкакштнень ютксо улить истят, кить школаст прядызь сырнень медаль марто. Теке марто веенстнэ тонавтнемаст поладокшнызь кода эсенек, истя лия регионтнэнь вузтнэсэ ды получасть эрявикс профессия, лиятне зярс тонавтнить сы шкань тевентень.
Эряви тешкстамс, эрямонь тевенть кочкамосо школасо тонавтыцятне пек лездыть эсь тонавтницятнень туртов. Эдь сынь парсте содыть эрьванть содамочинзэ ды маштоманзо, содыть, кодамо ёнкссонть седе виев те эли тона эйкакшось. Ды, эряви меремс, профориентационной важодемантень неень шкане минек республикань школатнесэ явови башка мель. Сы шкань профессиянтень эйкакштнень анокстыть уш основной школасо тонавтнемстэ.
Профессиясо изнявкстнэнь кисэ Андрей Иванович Истляев тешкстазь «Отличник просвещения» Российской Федерациянь Просвещениянь министерствань знаксо, ламо эрьва кодат Шнамонь конёвонзо ды Почётной грамотанзо. Кода жо сонсь корты, ули эштё мезес ютамс ды мезе лангсо важодемс. Эдь алкуксонь тонавтыцясь сонськак тонавтни весе эрямонзо перть!
Юлия Еремина
Фототне
Эдуард РЕТУНСКИЕНЬ.