Эрзянь ды мокшонь Национальной драматической театрасо шкане ютыть покш репетицият. Тесэ учови «Бременские музыканты» (Ю. С. Энтин, В. Б. Ливанов, Г. И. Гладков) музыкальной ёвксонь премьерась. Сонзэ путыцякс кармась театрань прявт режиссёрось Дмитрий Крюков.

– Мон вишка пингестэ саезь пек вечкса те произведениянть. Минек шкане арасельть телевизионной сядо каналт ды Интернет. Несак телепрограммасто мультфильманть ды учат невтеманзо. Умок ульнесь мелем путомс «Бременской музыканттнэнь» сцена лангсо. А кодамо тосо Г.Гладковонь музыкась! Минь кадынек текень, ансяк теинек неень шкань аранжировка марто. Сынст лангсо важоди Александр Суворов, истя жо музыкань коряс лезды Мария Леонова, сынь Московсто. Бажинек ванстомс ретро-ёжонть. Тетятне-аватне марясызь рок-группань гайттнень. Те спектаклясь алтави весенень – эйкакштненень ды покштненень. Кемтяно, ваномо сыть семиянек, – ёвтнесь режиссёрось.

Художникесь-путыцясь – Екатерина Крюкова. Артисттнэнь лангсо оршамопельтне кармить лия ёнов а молицят, стилизованнойть. Хореографось – Юлия Михайлова, сон сась Минск ошсто. Аволь васенце спектакля лангсо важоди минек кедьсэ.
«Бременские музыканты» спектаклясонть налкси малав весе труппась, кармить кавто составт. Эрьва персонажонть эсензэ виев обуцязо. Принцессанть налксить Татьяна Биушкина ды Кристина Павлова; трубадуронть – Александр Усанов ды Никита Крюков; короленть – Анатолий Нуштайкин ды Тимофей Чудаев. Музыкальной ёвкссонть кармить ламо пейдемат, киштемат, морот. Эряви меремс, артисттнэнь марясынек алкуксонь морамост, аволь записьсэ.

Ёвксонть вельде эрьвась чарькоди: эрямосонть зярдояк а эряви нолдамс прянть, нусмакалемс ды ризнэмс. Мезе илязо лисе, паро ялгатнень марто весемесь изняви.
Спектаклясь невтеви февралень 8-9-це ды 16-це читнестэ 12:00 чассто. Сонзэ ваномо учовить эйкакштне, тетятне-аватне ды покштятне-бабатне.

Теде мейле Национальной театрасо кармить путомо Борис Васильевень «А зори здесь тихие…» повестензэ коряс спектаклянть. Сонзэ невтьсызь тунда.

Фототне театрасто ды Егор Горинэнь