Суббота, сентября 26, 2020
Важное

Исяк, аштемковонь 17-це чистэ чачома чинзэ тешкстызе Покш Березникень муниципальной райононь Симкина велень поселениянь прявтось Любовь Ивановна Астайкина. Те эрзянь авась истя вечксы тиринь велензэ, чачома тарканзо, маряви маштоволь эрямонзо кисэнзэ максовлизе. Неть аволь виев валт, алкукскак Любовь Ивановна эрьва тевенть, конась сюлмави сонзэ веленть марто, топавты алкукс ды вечкезь. Лиясто мартонзо кортамсто маряви, сонензэ суткань 24 частнэяк а сатыть, штобу топавтомс те эли тона тевенть ломанькс ды киньгак апак покорда.


Кодат стакачить течи цидярдыть минек велетне, башка толковамс а эряви. Ансяк тень лангс апак вано, бути велесэнть ули алкуксонь азор эли азорава, сестэ сон а ёми, эрямось эйсэнзэ а лепами. Эште кезэрень шкасто Симкина велесэ пандо прясо калмазырентень пачкодемстэ минек покштятне-бабатне печтясть покш стакачить берянь кинть кувалма. Лишмесэ, седе тов тракторсо пачтясть меельце ки лангов туицятнень… Ней тов паро, валаня ки теезь, те таркась свал кирдеви ваньксстэ, а пирявксось истямо, кодамо Саранскойсэяк арась. Малав эрьва кудосонть ули сэнь уштомапель, ведеськак ламот велень эрицятненень видьстэ кудос ветязь.

Тиринь газетань лопатнесэ минь ловныцянок туртов уш пачтинек, кодамо мазый ды паро церькова стявтовсь кавто иес те эрзянь велесэнть. Теньсэяк покш путовксозо Любовь Ивановна Астайкинань.
Те иень тундось казимизь ламо пиземев чисэ, тикшесь эрьва кува пек ламо кассь, сонзэ ледемеяк эрьва чистэ пелюма марто якась сонсь велень азоравась. Виде, велень тевтнень топавтомстояк покш лезкс максы эрий ялгазо – мирдезэ Виктор Сергеевич. Истя вейсэ, вейке-вейкень чарькодезь ды кунсолозь, Астайкинтнэ трясть-кастасть кавто тейтерть: Татьянань ды Маринань. Ней покш мельспаросот нуцькаст Варварань ды Александрань кувалма.

Теке шкасто Любовь Ивановнань седеезэ ризны-палы велесэ азортомо кудотнень, ськамост кадовиця эрицятнень кисэ. Те эрзянь аванть покш мелезэ, штобу Симкинав эрямо саст седе ламо од ломанть, кить бу вельмевтевлизь покштяст-бабаст юртонть, тетяст-аваст кудотнень. Сонзэ валонзо коряс тосо ули весемесь, васняяк ванькс ды мазый пертьпельксэсь, модась, конань лангсо чачи-касы эрьва мезе ды кода кортыть эрзятне, тиринь таркась, конась максы вийть кемекстамс шумбрачинть ды поладомс тетятнень-аватнень ушодксост.
Любовь Ивановнань ризны-палы седеезэ Шугуровасто – Симкинав кинть коряс, аволь покш юткось кольсти ёжомарямо, яжи техника, ялатеке ули кемема сонзэ витнемантень. Секс, мекс совавтозь государственной программас.

Эште Л.И.Астайкинань превсэ ули истямо арсема, штобу Симкинань велентень савольть истят ломанть, кить ушодовольть од тевть, конатнень вельде тосо эрицятненень муевель важодема тарка. Сестэ кудотнесэ улевельть ков седе ламо од эрицят, сынст чачовольть эйкакшост, нуцькаст. Зярс жо тов сыть ансяк кизэ лангс эрицят, куш ламот юткстост кармасть кадовомо теле лангскак.

Течи Любовь Ивановнань лемс ёвтавить ламо лембе валт ды паронь арсемат. Кадык сынь весе топавтовить. Кадык Пазось те эрзянь авантень максы кеме шумбрачи ды ламо вийть тиринь ёнксонть лезэс. Кадык весе арсезесь топавтови ды ламолгавтови!

Валентина ЮДИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».