Даволковонь 23-це чистэ Самара ёнксонь Тольятти ошсо ютасть армейской рукопашной тюремань коряс пелькстамот, конат алтазельть Тиринь масторонь ванстыцянь чинтень.

Сынь мольсть «Союз» ФОК-со. Пелькстыцятне пурнавсть эрьва ёндо. Пелькстамосо эсест виест невтеме якасть зярыя од ломанть Мордовиястояк. Вейкесь эйстэст – Самир Богданов. Сон ськамонзо сайсь васенце таркат 10-11 иесэ цёрынетнень ютксо колмо пелькстамотнесэ.

Теньсэ покш путовксозо сонзэ тонавтыцянть. Те – Павел Мигунов, конань минь седе пек содасынек, кода «Тюштя» клубонь прявтонть ды ломаненть, кие покштояк покш путовкс тейсь ды теи минек раськень спортонть кемекстамонзо туртов. Сон весе виензэ путы спортонь сеть койтнень вельмевтемантень, кодат ульнесть эрзя-мокшонь раськенть эрямосо седикеле. Тень туртов ютавтни эрьва кодат вастовомат кода эсенек республикань школатнесэ, истя лия регионтнэсэяк.

Нейгак Самара ёнксов якамозо ютась аволь чавосто. Васня Самара ошсо вастневсть тосонь самбисттнэнь марто, омбоце чистэнть тердезельть инжекс Тольятти ошонь мокшэрзянь автономияв, конань прявтсо В.В. Кшнякин. Весе, кинь марто вастневсть, ильтясть эйсэст кемема марто: Самир Богданов лиси изницякс. Ды сынст кемемаст Самир эзинзе кола. Ёвтатано тензэ покш поздоровт ды арсетяно седе товгак улемс свал икеле.

Раиса Щанкина