Среда, апреля 01, 2020
Важное


Малавгали Ине Изнямонь 75-це иень покш чись. Сонзэ тешкстамо аноксты весе мирэсь-масторось.
Уш ней ютавтневить войнань ды тылэнь ветерантнэнь марто ламо вастовомат, чокшнеть, нолдавить од книгат, фильмат. Вана рузонь содавикс поэтэсь Алексей Громыхингак шкинемань меельце чокшнензэ алтызе те покш чинтень. Сон ютась панжиковонь 12-це чистэ Печатень кудосонть.

Шкинемань чокшнев, конань ютавтызе Мордовия Республикань сёрмадеень союзонь прявт курось, сакшность поэтэнть ялганзо, содыцянзо, шкинемань вечкицянзо. Пурнавозтне покш мельсэ теевсть содавиксэкс Алексей Громыхинэнь книгань выставканзо марто. Сонзэ анокстызь А.С. Пушкин лемсэ раськень ды П.С. Кириллов лемсэ ошонь прявт библиотекань важодицятне. Седе тов инжетненень невтезель видеорядось, косо ёвтневсь поэтэнть эрямонь ды шкинемань кинзэ.
Сёрмадеесь те чистэнть эсензэ лемс марясь ламо лембе валт. Шнамс сонзэ алкукскак ульнесь мезень кис. А.А. Громыхин, ловт, весе эрямонзо алтызе поэзиянтень. Чачсь сы шкань поэтэсь Пенза ёнксонь Беднодемьяновскбуень Татаронь Шелдаисс велесэ. Кавксо иень школань ды Зубова Полянань педучилищань прядомадо мейле тонавтнесь Н.П. Огарёв лемсэ эрзянь-мокшонь госуниверситетсэ ды М. Горький лемсэ литературной институтсо. Важодсь райгазетасо, М.Е. Евсевьев лемсэ госпединститутсо.

Ней сон – Мордовия Республикань сёрмадеень союзонь прявтонь полавтыця. Поэзиянь ды прозань малав комсь книгань автор. Мордовия Республикань заслуженной поэт, МР-нь государственной премиянь лауреат.

Шкинемань чокшнесэнть гайгсть поэтэнть стихензэ, лия кельстэ ютавтовксонзо, валонзо лангс сёрмадозь моронзо. Стихтнень ловность инжетне, сонсь авторось.
Сёрмадеентень паронь арсемат ёвтасть Мордовия Республикань писателень союзонь прявтось Н.И. Ишуткин, МР-нь заслуженной поэттнэ А.М. Шаронов, В.Н. Корчеганов, Р.К. Орлова, С.Г. Белоключевский ды лият.

Шкинемань чокшнесь ламонь седейс кадсь паро ледстнемат, ламо лембе, валдо.
Поэзиянь покш чинть ветясь Мордовия Республикань писателень союзонь литконсультантось Татьяна Маланьчева.

Е. АСМОЛОВА
Фототнесэ: шкинемань чокшнень шкасто.
Фототне авторонть
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».