Ютазь середасто С. Д. Эрьзя лемсэ музейсэ панжовсь «Многоликий град Петра» фотовыставка, конась алтазель Мордовиясо Санкт-Петербургонь читненень ды Петр I инязоронть чачома чистэнзэ саезь 350 иетнень топодемантень. 

Выставкантень Нева чирень ошстонть ускозельть 33 фотографият, конатне теезельть «Просто Фотоклуб» вейсэндявксонтень кото совицятнень кедьсэ. Вастовомантень сакшность юткстост колмотне: минек ёнкссо чачозесь Марина Романовская, Юлия Старкова ды Юлия Алмаметова.

Музеень прявтось Людмила Нарбекова тешкстынзе Мордовиянть ды Санкт-Петербургонть ютксо кеме сюлмотнень, конатне эрить уш ламо иеть. Мокшонь ды эрзянь раськетнень регионъютконь вейсэндявксонь прявтось Юрий Мишанин ёвтнесь минек раськень диаспорадонть, конась эри те ошсонть, ды сеть творческой ломантнеде, конатне кецявтыть эсь шкинемасост. Выставкантень сакшность Мордовиянь заслуженной художникесь Анатолий Баргов, Н. П. Огарёв лемсэ МГУ-нь профессорось, философиянь наукань докторось Ольга Беломоева, содавикс фотографось Валентин Крайнов. Выставканть кураторось Виктор Махаев тешкстызе, неть 33 фотографиятнесэ невтеви аволь классической Санкт-Петербургось, а истямо, конанть а весе некшнизь, фототнесэ ламо лирикань ёжо. Автортнэ бажасть каземс ошонтень вечкеманть неть роботатнень вельде ды те тевесь тенст топавтовсь.

Сазь фотографтне ёвтнесть фотоклубонть важодемадо, косо ды кодат выставкат сынь панжтнесть Россиясо ды омбо масторсо. Марина Романовская, невтемакс, ульнесь «Равось – ояксчинь лей» этноэкспедициясо ды тосо невтекшнинзе эсь роботанзо. Сон истя жо минек газетань паро ялга, вете иень перть минек внештатной корреспондент ды тиринь эрзянь кельсэ газетанть ловныця. Марина сёрмадстни газетанть Ицялбуев ды эстензэ, Санкт-Петербургов. Сонзэ фототне а весть минек ловныцятне некшнизь «Эрзянь правдань» лопатнесэ. Выставкась карми молеме августонь 1-це чис ды сонзэ лувсо анокставить фотографтнень марто эштё зярыя творческой вастовомат. Кинь ули мелезэ, садо, инескеть, тестэ нетядо ламо мазычи!

Марина Девятова