«Од веле» велетнень касомань-кепетемань Мордовиянь общественной вейсэндявксось совавты эрямос «Моё село: от культурных традиций к гражданским инициативам» проектэнть. Сон топавтови культурань инициативань Президентэнь фондонть вельде. Лиякс меремс, те – «Дом традиций» музеень-культурань центрань проектэнь поладомась, кона мольсь Покш Березникбуень Парынзэлесэ. Сонзэ ветясь «Од веле» общественной куронь прявтось Е. Е. Ледяйкин.

Кодамо сон, од проектэсь? Мезе эряви сонзэ топавтомга? Теде мольсь кортамось вастовомасонть, кона ютась Покш Березникень Культурань центрасо. Тей сакшность райононь велень администрациянь прявттнэ, культурань сферасо важодицятне.

– «Моё село: от культурных традиций к гражданским инициативам» проектэсь карми важодеме Покш Березникбуень комсь велетнесэ ды шабра райононь зярыя велетнесэ. Саемга, Кочкурбуесэ, Дубёнкабуесэ. Минь ёвтнетяно, кода эряви важодемс проекттнэнь коряс, кода изнямс грантт, кода полавтомс велетнесэ эрямонть. Лездатано панжомс общественной вейсэндявкст. Эряви невтемс, велесь – эри. Сон бажи паро эрямос, полавтоматнес. Миненек эряви невтемс прянок. Седе тов ютавттано республикань форум, бажатано тевс нолдамс проектэнть Мордовиянь весе районтнэсэ, – ёвтнесь Е.Е. Ледяйкин.
Сон ледстизе, Парынзэлесэ сынь ушодсть «Семейный клубный центр» проектэнть эйстэ, ков явозельть 500 тёжат целковойть. Теде мейле изнясть грант ды натой витнизь велень культурань кудонть. Мекс бу а варчамс важодемс истямо лувсо лия велетнесэ? Гранттнэнь вельде паролгавтомс велетнень эрямост, савольть тов инвестицият. Самай теде бажи пачтямс Евгений Евгеньевич.

Проектэнть лувсо кармить велетнес ардтнемат. Весе несызь, кода молить тевтне Парынзэлесэ, кода теемс истят жо парос полавтомат.
Од проектэсь ушодови социальной сеттнесэ важодемастонть. Ломантнень сыргавтомат. Сетнень, конат эрить велесэ ды конат умок тосто тусть. Васенце мелесь – савольть тей эрицят свалшкас эрямо эли кизэнь шкане. Иляст чамо велетне, иляст уле кадозь кудот.

Истя, Одноклассники, Вконтакте, Фейсбук социальной сеттнесэ панжовить велень группатне. Сынст кармить ветямо велень администрациянь, клубонь эли библиотекань важодицятне. Бути истят ломанть а муевить, бути сыненст стака маряви те тевесь – тердевить волонтёрт. Саемга, неке жо велетнень студенттнэ. Группань ветицятненень (администратортнэнень) пандовить ярмакт. Проектэнь цётамотнень коряс кочкавить кемень сехте вадря администраторт. Ванновить, кодамо группатне виевть, косо ламо участникть, мезде сёрмадыть группатнесэ. Сынст туртов казить смартфонт. Нама, эряви команда, кавтошка-колмошка ломанть, кить кармить важодеме группасонть, ёвтнеме велень эрямодонть.

Кода ветямс группатнень – весе тонавтовить. Васняяк, эряви пурнамс-тердемс тов ломанть. Седе тов путнемс кулят, сёрмадомс велень койтнеде, содавикс ды мазый таркатнеде, пачтямс содавикс ломантнеде, кить тесэ чачсть. Паро ули ветямс фотоисториянть. Пурнамс ташто фототнень. Ды, нама, ёвтнемс раськень ярсамопельтнеде! Тень эряви теемс фототнень ды видеотнень вельде.

– Группатне кармить велетнень информационной ресурсокс. Сынст вельде мереви пачтямс ломантненень весе тевтнень-кулятнень. Тердемс, саемга, велень эрицятнень концертэв ды лия вастовомас. Неть куротне кармить важодеме аволь ансяк проектэнь шкане – теде мейлеяк. Минь карматано вадря невтевксэкс весе масторонть туртов: кода эряви важодемс велесэ, мезе государствась теи минек велетнень туртов. Велесь эри, кадык сонзэ лангс варштыть, – кортась «Од веле» велетнень касомань-кепетемань республикань общественной вейсэндявксонь прявтось Е. Е. Ледяйкин.
Татьяна Маторкина