Сентябрянь 20-22-це читнестэ МР-нь Някань государственной театрась вастсь инжеть. Тей сакшнось Бурятия Республикань Улан-Удэ ошсто «Аянша» някань передвижной театрась. Сон тесэ важодсь «Покш гастрольть» федеральной программанть лувсо («Большие гастроли для детей и молодёжи» ёнксось).

Эйкакштнень туртов истямо программась тевс нолдави РФ-нь Правительстванть Россиянь Культурань министерствантень кармавтоманзо вельде. Сон ушодсь важодеме 2017 иестэ саезь. Эйкакштнень ды од ломантнень туртов программась сехте вешевикс.
Бурятиянь инжетне содавтызь вишка ваныцятнень С. Я. Маршаконь «Кошкин дом» ёвксонзо коряс спектаклянть марто. Путовксось невтезель минек эйдень зярыя кужотнева ды вастозель пек лембестэ.

Истя жо МР-нь Культурань, национальной политикань ды архивень тевень министрась С. Н. Баулина вастневсь «Аянша» някань передвижной театрань прявтонть, Бурятиянь народной артистканть Эржена Будажанаевань-Будаевань ды МР-нь Някань государственной театрань прявтонть Евгений Романовский марто. Улан-Удэнь някань театрань прявтось казевсь МР-нь Культурань, национальной политикань ды архивень тевень министранть С. Н. Баулинань пельде Благодарностьсэ.

Октябрясто «Покш гастрольть» программанть вельде Мордовияв сыть лия инжеть. Те – Адыгея Республикань Государственной филармониянь «Золотой кувшин» някань театрась. Вишка ваныцятнень туртов невтьсызь «Золушка», «Король Вруляля», «Господин Дракон» спектаклятнень. Седе тов минек артисттнэ сыргить Адыгеяв. Тосо невтьсызь «Проделки Козы-Дерезы», «Сто тысяч «Почему?», «Три поросёнка и Волк» путовкстнэнь.