С.Д. Эрьзя лемсэ музейсэ невтеви «Город Поэтов» выставкась. Истя лемдезь экспозициясь, кона пурнынзе Петербургонь колмо художниктнень 60-де ламо графической ды живописной произведенияст.
Андрей Бодровонь творчествазо, кона тейсь коське салмуксонь техникасо пейзажт, содавикс Саранскоень изобразительной искусствань вечкицятнень туртов, эдь сонзэ выставкась иеде икеле невтезель Мордовиянь прявт ошсо ды пек тукшнось тесэнь эрицятнень ды инжетнень мельс. Вана нейгак Андрей Бодров невтни эштё вейке графической пейзажонь седейс токиця серият, конатне теезь акватинтань, чевте лаконь, картон лангсо гравюрань техникасо.
«Город Поэтов» выставканть художественной лувокс аштить советской графикенть ды живописецэнть Анатолий Давыдовонь важодевкстнэ. Сонзэ искусствантень кись сюлмавозель Ине Отечественной войнань иетнестэ лисезь тевтнень марто.
1942 иень эйзюрковсто Художественной Академиянь ёроков студентэнть блокадной Ленинградсто эвакуировакшнызь Самарканд ошов. Иень ютазь, Ташкентэнь пулемётной училищань нурькине курсатнень прядомадо мейле, Давыдов младшей лейтенантось тюрсь 3-це ды 2-це Украинской фронттнэсэ, ютась войнань ламо вайгельбеть – Запорожьясто саезь Южной Германиянть видьс.
Эсензэ боевой казнетнеде: Якстере Тештень ды Отечественной войнань II степенень ордентнэде, Польшанть олякстомтоманзо кисэ «Грюнвальд» ордендэнть ды ламо лиятнеде Анатолий Захарович ёвтнеме а вечки.
Изнямодонть мейле сон прядызе Ленинградонь И.Е. Репин лемсэ Архитектурань, скульптурань ды живописень институтонть. Терявтнесь артомс эрьва кодамо жанрасо: карикатурасо ды плакатсо, артсь баталият ды ламо лия мезе… Кемень иень перть вешнематнеде мейле сонсь видькстась: «Эсь прям лован камерной художникекс. Ломанесь ды природась – те се, мезенть невтян важодемасон (артовкстнэсэ). Вечкеви тень печатень фактурась, артовкстнэсэ мельс тукшныть линиятне, кецян, зярдо эсень роботатнесэ ули вадря кенярдомань ёжомарямо,эдь сестэ сон юты ваныцянть туртовгак. Ламо важодян литографиясо, офортсо, артовкссо, сёрмадан коцт лангс оень краскасо».
Пек вечкевить Давыдовонь ломанень портреттнэ, конатнесэ невтеви ломантнень стака уцяскаст, истя жо XIX-XX пингень сёрмадейтнень – Пушкинэнь, Достоевскоень, Блоконь, Есенинэнь, Гумилёвонь, Ахматовань, Цветаевань, Булгаковонь, Пастернаконь, Ахмадулинань графической портреттнэ…
Штобу марямс «Город Поэтов» выставкань атмосферанть, лездыть Анатолий Захаровичень Людмила Витальевна нинзэ живописень пейзажтне, конатне артозь икелев ванозь, келейстэ вадевксэнь теезь. Штобу седе валдосто невтемс картинатнень фактурностенть, масляной краскатнес сон кайси ямкст, чувар, клей… Секскак краскасо артозь сонзэ картинанзо лездыть ваныцятненень неемс ды марямс се умонь шкань Петербургонь коштонть.
«Город Поэтов» выставкась невтневи Эрьзя лемсэ музеень главной корпуссонть, таштамковонь 8-це чистэ саезь ожоковонь 4-це чис.
Мила БОГАТОВА