Четверг, марта 28, 2024
Важное
 
Ютась ниленьгемень иеде ламо, кода минь, 1980 иестэ школань прядыцятне, ушодынек тонавтнеме Мордовиянь Н.П. Огарёв лемсэ государственной университетэнь филологиянь факультетсэ, эрзянь группасо. Пурнавинек вейс республикань ламо районтнэнь велетнестэ, малав весе школань прядыцят. Ютксонок ансяк вейке ломанесь кенерсь тонавтнеме Ицялонь педагогической училищасо.
Те ульнесь Михаил Иванович Ломшин. Мон а стяко сёрмадыя лемензэ тетя лем марто. Васняяк секс, сон ульнесь анок тонавтыця, сонзэ ялгатнестэ ламот истя тейстькак, тонавтнемаст прядомадо мейле тусть важодеме школав.

Михаил Иванович Ломшин чачссь-кассь Дубенка буень Антоновка велесэ эриця ламо эйкакшонь триця семиясо. Тетязо-авазо Иван Михайлович ды Антонина Михайловна Ломшинтнэ трясть-кастасть вете эйкакшт. Вейкень коряскак визьксчама эзть кирде, эрьвась юткстост муизе эрямосо кинзэ. Эрьванть тонавтызь улемс алкуксонь ломанекс: стакачиде а пелицякс, ламо паро тевень тееме бажицякс.

Михаил Ивановичень ульнесь якстере дипломозо, сонзэ куш кодамо школав седейшкава саевлизь, ансяк сон кочкась эстензэ лия ки: поладомс тонавтнеманзо вузсо, алтамс эрямонзо наукантень, студентэнь тонавтомантень.

Ледстневи, сестэ минь, велестэ сыцятне, эринек общежитиясо. Одт ульнинек, покш мельсэ яксилинек кинов, театрав… Ялганок жо Михаил Ломшин лекциятнень прядовомадост мейле библиотекав чииль. Сон эрьва экзаменэнтень, зачётонтень анокстась алкукс, зярдояк эзь сайне мартонзо, кода мерить, шпаргалкат. Свал кемсь ансяк эсензэ содамочитнень лангс.

Виде, эрьва предметэнть коряс домка содамочитнень кисэ сонензэ свал путсть ансяк «вететь». Тонавтнема иетнень перть вестькак арасель истямо тев, штобу Михаил Ломшин шкастонзо а саволь лекциятнес эли меельцестэнть туевель шкадо икеле.

А мезть сёпомс, сестэ минек ютксто ламотне эзть чарькоде сонзэ эрямо лувонть. Кода истя чинек-венек тонавтнемс, аштемс книгатнень велькссэ ды весе юткошканть алтамс тонавтнемантень. Эдь од порасто ульнесь покш мель эрямс олячисэ, теемс сень, мезесь седей вити, ёжомарямонть кепеди. Вана ансяк кементь иетнень ютазь минь чарькодинек: эрьва тевенть ули эсензэ шказо. Неень шкане учёнойтне кемевтить содамочитнень пурнамотнень, сынст парсте чарькодемантень эрямостонок явови цётазь шка. Вана те шканть юткстонок видестэ ютавтызе вейкесь – Михаил Ломшин.

Бути парсте весементь арсемс, сестэ ломанесь лия тевтькак кенери топавтомс. Сон эзь аште ве ёно общественной роботанть эйстэяк. Невтемакс, минь сонзэ васенце курссто саезь кочкинек группань старостакс. Теде башка, Михаил Ивановичень эштё университетэв самодо икеле теевсть кеме сюлмонзо эрзя-мокшонь писательтнень марто, васенцекс юткстонок сёрмадовксонзо печатазельть республикань газетатнесэ, Мордовиясо нолдавиця книгатнесэ.

Ледстневи, лангозонзо ванозь, миньгак ялгам Лида Годяева (Шумкина) марто совинек од сёрмадыцятнень туртов теезь «Тештине» литературной вейсэндявксонтень, конань ветясь содавикс писателесь Василий Кузьмич Радаев.

Ледстневи, 1986 иестэ саимим покш каштанчи, зярдо Ленинградсо вузонь прядомадо мейле Саранскоев самсто маринь кенярксов куля: минек ялганть Михаил Ломшинэнь лиссь эйкакштнень туртов васенце книгазо. Сон лемдевсь «Килеень сельведть», кавто иень ютазь омбоце – «Ильичень нуцьканзо». Виде, сестэ минь эринек советской шкасто, сёрмадынек истя, кода эйсэнек тонавтсть школасо, вузсо. Ней допрок полавтовсь эрямось, писательтнеяк полавтызь лувост-шкинемаст. Кие соды, зяро бу книгат эйкакштненень ды покштненень нолдаволь Михаил Иванович, бути эрямонь васень тевекс кочкавлизе писателень тевенть.

Сон жо тусь наукань ды тонавтомань кияванть, эрямонзо сюлмизе од ломантнень марто. Вузсо кармась ветямо истят дисциплинатнень, кода «Русский язык и культура речи», «Введение в специальность», тиринь эрзянь келенть. 1990 иестэ саезь – Н.П. Огарёв лемсэ МГУ-нь вузсо тонавтнемадо икелень ды средней профессиональной образованиянь факультетэнь декан.

Минь, сонзэ марто тонавтницятне, покш мельспаросо аштетяно Михаил Ивановичень кувалма, кода маринек, вузонь прядомадо мейле вете иень ютазь сон идизе филологиянь наукань коряс кандидатскоензэ, шкань ютазь кармась педагогической наукань докторокс, доцентэкс, профессорокс, ульнесь кафедрань прявтокс, совась сестэ эштё СССР-нь Журналистэнь вейсэндявксос.

Михаил Иванович научной тевензэ ветямсто покш мель явсь тиринь ды рузонь кельтнень раськень (национальной) школатнесэ тонавтома лувонтень. Сон домкасто тонавтнинзе Приуральянь ды Равчирень (Поволжьянь) раськетнень литератураст виевгавтомань историянть ды сынст теориянь стакачитнень. Сон ванкшнызе высшей школань национальной группатнесэ неень шкань литературной образованиянь научно-методической юронть (основатнень). Михаил Иванович анокстась 120 ламо научной ды тонавтнемань методической важодемат, конатнень ютксо – кото монографият, тонавтнемань кавто пособият. Сон сови Мордовской госуниверситетэнь советс. Педагогической ды социальной наукань член-корреспондент.

Те эрзянь цёрась свал бажи содамочитнес. Михаил Ломшин кастсь квалификациянзо «Мордовский республиканский институт образования» дополнительной образованиянь государственной бюджетэнь образовательной учреждениясо, Москов ошонь дополнительной профессиональной образованиянь виевгавтомань институтсо, М.В. Ломоносов лемсэ МГУ-нь тестированиянь ды развитиянь центрасо, Московонь физико-технической институтсо ды истя седе тов.

Сеедьстэ савкшны неемс Михаил Ивановичень ошонь ульцятнестэ, Саранскоень куншкакуросто. Сон свал юты ялго, свал капши. Лиясто, маряви, икельди эрямонть, бажи теемс ламо тевть, лездамс тензэ пшкадицятненень. Сон тень машты тееме прянь апак шна ды теде киненьгак апак ёвтне. Вана нейгак, зярдо энялдынек тензэ аламошка ёвтнемс эсензэ ланга – эзь карма. Те ломанесь бажи аволь ёвтнемс, кодамо сон паро, а седе ламо теемс.

Ламо иень перть парсте важодеманть кисэ Михаил Ивановичень ламо казнензэ. Сынст ютксо: РФ-нь Образованиянь ды наукань, МР-нь Образованиянь министерстватнень Почетной Грамотатне. Сон – «Трудовая Слава России» весероссиянь общественной проектэнь лауреат, РФ-нь Ёроков тонавтыцятнень ассоциациянь образованиянь сферасо сехте паро публикациянь весероссиянь пелькстамонь лауреат. Сонензэ максозь «Мордовия Республикань наукань заслуженной деятель» ды «Российской Федерациянь высшей профессиональной образованиянь Почётной роботник» лемтне.

Мартонь 11-це чистэ Михаил Ломшин тешкстызе 60 иень юбилеензэ.

Михаил Иванович! Ёвтатано Тыненк юбилеенк коряс поздоровт! Арсетяно кеме шумбрачи, эрямосо уцяска ды весе арсеманк топавтома!

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».