Июнень 3-це чистэ Эрзянь-мокшонь раськень драмань театрасо пекставсь 88-це сезонось. Инжетнень туртов анокставкшнось пек сюпав программа.

Васняяк пурнавозтнень содавтызь Мордовиянь ды целанек масторонь ине скульпторонть Степан Эрьзянь шкинеманзо марто, невтевсь документальной фильма. Мейле жо весень учось Валентина Мишанинань пьесанзо коряс «Эрьзя. Валдос ливтиця» спектаклясь ды ваныцятненень мельстуиця казне театрань артисттнэнь пельде.

Театранть туртов те сезонось ульнесь сюпав од спектаклясо, арсевкссэ, эрьва кодамо фестивальсэ ды пелькстамосо эсь ёрокчитнень невтемасо. Аволь умок актёртнэ велявтсть Йошкар-Оласто «Майатул» раськеютконь фестивальстэ, косо невтевсь Валентина Мишанина драматургонть «Эрьзя. Валдос ливтиця» пьесанзо коряс Борис Манджиев режиссёронть путовксось. Фестивалень невтевкстнэнь коряс «Цёрань сехте вадря роль» номинациясо изницякс лиссь минек республикань Раськень драмань театрань актёрось Павел Михайлов, кона невтизе ине скульпторонть эрямонзо.

Теке марто сонзэ коллегазо Евгения Акимова актрисась, кона налксизе прявт героень вечкевиксэнзэ роленть, тешкстазь омбоце планонь авань роленть кисэ. Скульпторонть ялганзо, Луис журналистэнть, Антон Саранкин актёрось ёвтазь омбоце планонь цёрань ролень сехте вадря налксицякс.

Кода тешкстызе Эрзянь-мокшонь раськень драмань театрань прявтось Светлана Дорогайкина, «Эрьзя. Валдос ливтиця» спектаклянть марто сынст учить сыця 89-це театральной сезононь эштё кавто покш фестивальтнесэ – «Крымень театральной сёксьсэ» Ялтасо ды «Федерация» раськень театратнень весероссиянь фестивальсэ Грознойсэ.

Те чистэнть истя жо ёвтазельть 2021-2022 иетнень театральной сезононь сехте вадря артисттнэ, конатнень кочкинзе прявт жюрись – ваныцятне. Истя, «Иень актёр» номинациясонть изнясть Дмитрий Мишечкин ды Евгения Акимова. Лембе поздоровт тенст!
Минь жо, ваныцятне, покш мельсэ учотано театральной 89-це сезононть панжоманзо ды од спектаклятнень.

Юлия Еремина