Меельце шкасто Мордовиянь культурасо сеедьстэ гайги Рузаевкань од артыцянть Юлия Бакаевань лемезэ. Эрьва кодамо учреждениясо, лиясто фойесэ ладсезь сонзэ важодеманзо.

Монь, кода А.С. Пушкин лемсэ библиотекань свалшкань ловныцянть, мелезэнь тусь сонзэ важодематнень выставкась, кона ашти «Пушкинкань» фойесэ. Эрьва кодамо тюсонь пейзажтнеде ды натюрмортнэде ловнома кудоськак теевсь седеяк валдокс ды мазыекс.

Кие те авторось? Теевтяно содавиксэкс. Ёроков од артыцясь Юлия Бакаева чачсь 1974 иестэ Рузаевка ошсо. Тонавтнесь Ф.В. Сычков лемсэ Саранскоень художественной училищасо. 2011 иестэ саезь – Россиянь Художникень союзонь член.

Минек искусствоведтнэ тешкстыть: «Ю. Бакаева ламо важоди. Сон вадря живописец. Сёрмады пейзажт, натюрмортт, портретт, важодеманзо свал невтевить эрьва кодамо выставкасо…»
Эряви меремс, яви мель графикантеньгак. 2001 иестэ саезь сонзэ картинанзо невтневить ошонь, республикань, регионъютконь ды весероссиянь выставкатнесэ ды фестивальтнесэ. Сынст ютксо – «Молодость России» (Саратов, 2008), «Красные ворота» (Москов, 2016; Саратов, 2017) регионъютконь выставкатне. Ульнесть ниле персональной выставканзо (2002, 2005, 2008, 2014 иетнестэ).
2007 иестэ Мордовиянь Художникень союзось ютавтсь Сыре Шайговань районсо пленэр, 2011 иестэ – Вирь ало Тавласо, тосо ульнесь Юлияяк. Коллегатне макссть тензэ покш питне. Сынь редизь касоманзо, ёрокчинзэ. Неень выставкасонть эрьва кодат важодеманзо, ули картинань башка серия, кона алтави ташто Саранскоентень ды Рузаевкантень, ули серия, косо Мордовиянь церьковатне. Невтевить натюрмортт ды Мордовиянь ломантнень портретэст. Артыцянть важодеманзо лиснить республикань изданиятнесэ. Выставкатнесэ кецявтыть весе ваныцятнень!

Геннадий Гребенцов