Маень 28-це чистэ эрзянь поэтэнтень ды журналистэнтень Николай Ишуткиннэнь топодевельть бу 70 иеть. Апак учне сон тусь эрямосто 2021 иень январьстэ. Николай Ивановичень весе эрямозо сюлмавозель журналистиканть ды литературанть марто. Сон кенерсь важодеме «Чилисема» журналонь прявт редакторокс, мукшнось шка сёрмадомс стихть, нолдамс эсензэ ды лия автортнэнь книгаст.
Н. И. Ишуткин чачсь Покш Березникень райононь Симкина велесэ. Ней жо теке райононь Парынзэлесэ ютась творческой чокшне ды сонзэ ледстнемга панжозель Книгань кудо. Вастовомантень сакшность поэтэнть малавиксэнзэ, содыцянзо, коллеганзо. Инжетнень туртов васняяк ютавтозель «Коень кудосо» экскурсия, весень вастызь кши-сал марто ды каванизь тол икеле ансяк пидезь пачалкседе. Сонсь промксось мольсь Культурань кудосо. Те чокшнесь ютась Культурань инициативатнень Президентэнь фондонть лезксэнзэ вельде («Приземление 2.0. Иероглифы мордвы» проектэнть коряс). Арсицязо – «Од веле» велетнень виевгавтомань республикань общественной вейсэндявксонь прявтось Е. Е. Ледяйкин.
– Николай Ишуткин – эрзянь раськень алкуксонь ломань. Сон тейсь покш путовкс минек литературантень. Вейсэ ламо ардтнинек эрьва кодамо покш тевс ды вастовоматнес. Маштсь ломантнень вейсэндямс. Кода сонсь арсесь паро весенень, лиятнеяк тензэ пандсть паросо, – кортась МР-нь культурань, национальной политикань ды архивень тевень министрань васенце полавтыцясь Александр Карьгин.
– «Эрзянь правда» газетанть трокс ютасть минек ламо писательтне ды поэттнэ. Эрямосон лован сехте паро шкакс, зярдо редакциясо ве шкане важодсть Н.И. Ишуткин, В.И. Дёмин, ялакстнэ Зиновьевтне. Чарькодеви, ламо ардтнинек районтнэва, лия регионтнэва. Эрьва косо сонзэ содасть ды лембестэ вастсть. Мейле кармась ветямо «Чилисема» журналонть. Чевте седей, валдо ойме. Сон эзь пижне ды эзь кепсе вайгель важодицянзо лангс. Мартонзо шождаль роботамс. Соват – зярдояк а мери – шказо арась. Маштыль кунсоломо ды превень максомо. Кенеринь сёрмадомо эйстэнзэ очерк, конась совась «Эрьванть эсензэ уцясказо» книгантень. Видькстан, пек ризнынь, туи-а туи мелезэнзэ. Кецнинь, зярдо ёвтась сюкпрянь валт, – ледстнесь «Ламзурь» фольклорной ансамблянь ветицясь Раиса Щанкина.
– Николай Иванович 33 иесэ кармась журналонь прявт редакторокс ды 33 иеть важодсь те таркасонть. Арсетяно, сон теевель эштёяк ламо, ансяк апак учне тусь эрямосто. Сон пек вечксь важодеме од ломантнень марто, башка мель явсь те ёнксонтень, кода-бути чарькодсь-несь ёроков эйкакштнень. Минь поладынек тевензэ – од автортнэнь семинаронь ютавтоманть. Виевгавтынек республикань томбале эриця ловныцятнень марто сюлмотнень. Неень шкасто анокстави печатьс Н.И. Ишуткиндэ ледстнемань книга, сон лиси июньстэ. Теде башка, яволявтынек од автортнэнь туртов Ишуткинэнь лемсэ литературань премия, – кортась «Чилисема» журналонь прявт редакторось Елена Барцаева.
Паро валт истя жо ёвтасть «Якстерь тяштеня» журналонь прявт редакторось Вера Брындина, МР-нь народной поэтэсь Рая Орлова, МР-нь заслуженной поэтэсь Геннадий Гребенцов, А. С. Пушкин лемсэ библиотекань важодицятне. Стихть ловность од автортнэяк. Морот казсь Н. П. Огарёв лемсэ МГУ-нь тонавтыцясь Николай Карпов.
Седе тов промксось поладовсь велень школасо, тосонь омбоце этажсо панжовсь Н. И. Ишуткинэнь лемсэ Книгань кудо. Тесэ пурназь ламо книгат, писательтнень портретэст. Улить стольть ды чевте озамо таркат, косо мереви ловномс эли ютавтомс творческой вастовомат. Омбоце нупалесь алтазь эйкакштнень туртов, колмоцесь – прессань. Башка тарка явозь Николай Ишуткинэнь творчествантень. Тесэ невтевить книганзо ды лия ули-паронзо, конатнень максызь малавиксэнзэ.
– Монень течи пек мельспаро, тетянь содасызь, вечксызь ды а стувтнить. Тиринь ёнкссонзо панжсть истямо Книгань кудо. Нама, нусмакавты се, тетям арась вакссонок, тедеде весе вейсэ бу тешкставлинек 70 иень юбилеензэ. Сюкпря весенень, кить сакшность, сюкпря валдо лемензэ кундамонть кисэ, – кортась Ишуткинэнь тейтерезэ Елена Асмолова.
Татьяна Маторкина